نعي بطور السبي وجبريل ينعاه
انتقلت روح زينب عفةْ الله

بأثر وگفة دواوين
ماتت أخت الحسين

•••••••••

رجب .. حاچوني يا ناس .. لو هذا مُحرّم
وهذا الينعه جِبْرِيل .. لو بشر ابنَ حذلم
بگبر عباس دُخان .. بيه عطر المُخيّم
ومثل اسكينه .. الحجاب .. عگب زينب تيتّم

چن هسه نذبح بالطف الحسين
وچن حُمرة سمة يا حُمرة العين

شَبَهْ بين القرابين
ماتت أخت الحسين

•••••••••


عقدوا مجلس أم عون .. (فَدَك) چانت حدوده
المنبر (تَلَّه) .. جِبْرِيل .. (رَكِض) .. رايد صعوده
ابثواب الحره .. عباس .. يوزّع ماي جوده
البقيه براسه ما اگول .. وابراسه عموده

الجود ابرگْبته والسبب معروف
عمت عيني عليه مگطوعه الچفوف

يبچي ونبله بالعين
ماتت أخت الحسين

•••••••••

بريشة راس عباس .. هالآية اكْتِبوها
(كلٌّ مَن عليها .. فانْ) .. اباب ابوها
بأثر وگفة دواوين .. وسَط جيش السبوها
ماتت عفةْ الله .. بس مو يم اخوها

بگبر جدها النبي مطفيه الانوار
فَگِدها اعله الزچية ثاني بسمار

القام بصوتها الدين
ماتت أخت الحسين

•••••••••

نعم مو چلمه تنگال .. حدود الله سترها
اذا متصير عباس .. ولا تعرف قدرها
وره الطف زينب تعيش .. أشو طوّل عمرها
يمكن حتى عزريل .. استحه يوصل خدرها

اشما يوصل تضيگ بصدره الانفاس
آخر مره اجاها بشكل عباس

بعد .. خِدر القرائين
ماتت أخت الحسين

•••••••••

هذا الطور مسموع .. قبل هَم مَر عليّه
سِمَعته ابيوم گادوه .. حمّاي الحميه
يعني اجروح الحْبال .. چانت حيدريه
وأنه لجروحي وجهين .. سقيفه وغاضريه

والسبّب مآسي الباب والطف
ذاك الـ عن أمر حيدر تخلّف

يحمل وِزر أمرين
ماتت أخت الحسين

•••••••••

(زينب إخت عباس) .. لتفرّد إسمها
حتى باللفظ چان .. ميفارگ رسمها
خيم ما ننصب انخاف .. نذكّرها بخيمها
بأخير العَزَه متروك .. مكان لگعدة امها

آنه الزهره وانعه وگلبي مفجوع
اجي المجلس ابنيتي واشعل شموع

هاي أم الثمانين
ماتت أخت الحسين

•••••••••

للشاعر
#أحمد_هادي_الشمري