Vasiyat

Ko‘zimning rangini so‘rama-
Sen bilgan ranglarga qorishmay!
Va yana yegudek qarama
axir, men... mayman, may!
Ich!
Qoningga qo‘shilsin zardobim,
Ashk obim etma tang.
(Tushungin-
men barin tushungan)
va o‘sha sen bilmas rang bo‘lib
kiradi ko‘zlarim tushingga-
mushtoqrang...

Havoday beqaror kezarsan,
To‘zg‘iydi hislaring to‘zimi.
ming yilki, ichmaysan,
ming yilki...
suzib uzataman o‘zimni.
Yig‘laysan,
yig’laysan har safar...
O, Nahot!
Yig‘ingga arzigan bo‘lsam men.
Mayliydi,
rost bo‘lsa... borimni
to‘kib yuborsam-u
o‘lsam men!

Mayligim maylga arzitmay
Aqida to‘qigan qay nadim?!
men ,,halol’’ yiqilgan bo‘ldim-u.
Haloling bo‘lmadim...
Bir kuni
(o‘lishdan oldinroq)
O‘zimni
qadahlab
ketarman...
Tagida qoldirsang yurakni.
Ko‘tarma,
qadahni ko‘tarma!

Tagida qoldirma yurakni...

Rashid Xo‘jamov



@AzizaShokirova