الإتنين اللي علاقتهم صح، وصحية؛ هيكونوا فاهمين إن "القمصة" مسموح بيها أحياناً بينهم؛ بس "القطيعة" لأ.. إن إختلاف وجهات النظر، والنقاش؛ حاجات طبيعي تكون بين طرفين كل واحد منهم عنده شخصيته؛ مش خناقة لازم حد يطلع منها كسبان!.. إن "الخلافات" محطات هيقابلوها على الطريق؛ مش نهايته!.. الأسوياء بيستوعبوا، بيحاجوا، وبيضللوا على شريكهم.. مش بيتلككوا، يمسكوا على الواحدة، ويفرضوا رأيهم!.. العلاقات بتكمل، وبتنجح لما بتكون متعكزة على إتنين ناضجين، وبتفشل، وبتتفشكل لما طرف منهم بـ ينخ، ويرفع راية المعيلة، والدماغ الصغيرة.