O‘zbekiston Respublikasi Prezidentining "Obod qishloq" dasturini 2018-yilda amalga oshirish bo‘yicha qo‘shimcha chora-tadbirlar to‘g‘risida"gi qarori bilan "Obod qishloq" dasturi doirasida joriy yilda amalga oshiriladigan ishlarning asosiy parametrlari, dastur doirasiga tushgan hududlarning manzilli ro‘yxati tasdiqlandi.
Avvalambor, olis va tabiiy iqlim sharoiti og‘ir hududlarda istiqomat qilayotgan aholining yashash sharoitlarini tubdan yaxshilash, turmush tarzi va darajasida sezilarli ijobiy o‘zgarishlarni ta’minlash, mazkur qishloq yoki mahallalarning qiyofasini zamonaviylashtirishga va unda istiqomat qiluvchilar uchun ish o‘rinlarini yaratishga qaratilgan dastur doirasida joriy yilda viloyatimizning 13 ta tumanidagi 26 ta qishloq va mahallalarda obodonlashtirish, qurilish-bunyodkorlik ishlari amalga oshiriladi.
Avval xabar berganimizdek, ayni vaqtda Chiroqchi tumanidagi Chiyal qishlog‘ida "Obod qishloq" dasturi doirasidagi ishlar davom etayotgan bo‘lsa, tumanning Uyshun mahalla fuqarolar yig‘inida ham bu borada gi harakatlar boshlanadi. Shuningdek, G‘uzor tumanidagi Yarg‘unchi va Opardi, Dehqonobod tumanidagi Beshbuloq, Obod, Qarshi tumanidagi Qovchin, Podaron, Qamashi tumanidagi Chim, Qorabog‘, Koson tumanidagi Mudin, Pudina, Kasbi tumanidagi Mug‘lon, G‘alaba, Kitob tumanidagi Denov, Sevaz, Mirishkor tumanidagi Pomuq, Yangi Mirishkor mahallalarida infratuzilma va shart-sharoit tubdan takomillashadi.
Bundan tashqari, Muborak tumanidagi Qarliq qishlog‘i, Qoraqum mahallasi, Nishon tumanidagi Paxtakor, Baynalmilal, Yakkabog‘ tumanidagi Xo‘jailg‘or, Esat, Shahrisabz tumanidagi Shamaton, Chorshanbi mahallalari hududlarida ham dastur doirasida obodonlashtirish, qurilish-bunyodkorlik ishlari olib borilishi belgilangan.
Dasturning amalga oshirilishi natijasida ushbu mahalla va qishloqlardagi 37 ming 855 ta xonadonda istiqomat qilayotgan 221 ming 331 aholi yashash uchun qulay shart-sharoitlarga ega bo‘ladi. Manzillar qiyofasi chiroy ochadi.
