#إسبوع_الكتمة
أو كما يسميه بعضهم زنقة الكلاب:

الحالة دي أغلب الطلاب بمرو بيها في مسيرتهم و هي فترة ما قبل الإمتحان بعد يعلقوا الجدول أو الإعلان و فجاة تكتشف إنك على شفا حفرة من Not pass the exam 🙂 و أمورك جايطة شديد و الSympathetic بتاعك شغال القرف لمَّن ما عارف تقبل على وين و تنذر مع نفسك لأن خرجنا من هذا لنكونن من الحفارين و تلفوناتك تشتغل للأقربين أن ألحقووني فإني ضائع لا محالة و يا أمي دعوات بعد الصبح خليها لي برااي أصلاً كل مره بنجحني هِن ، و تصلح علاقتك مع أخوك الصغير و تشتاق لاختك الكبيرة و دا كلو في سبيل أن تتنزل السكينة على قلبك ليطمئن و تشوف بعد كدا ح تجازفها كيف؟
ألذَّ من كدا تكشف يمين شمال تلقى فردك في نفس الزنقة مما يهون عليك و تقول في جواك ما كعب يا زول موت الجماعة عرس 😁
الظريفة لما صاحبك يأتيك مهرولاً ألحقني يا عمك أنا بضيع يا وديع و يكتشف أنك فايتو بالصبر و العمل الطيب و تنشقوا ضحك و إنتو في عز الكتمة 😂
- أها فهمك شنو ؟؟ = والله يا فردة دا أخر كورس تكتم فيني كدا
- أنا ذاتي والله دا ما كورس بستاهل لكن الجاي من أولو نحن ناس حفر بس .
و تعزموا على الكلام دا من أعماقكم مع ظهور ملامح طلس الجِد في وجوهكم و في نفس اللحظة تستحضروا إجابة برين لي بينكي لما يقول ليهو: ما الذي سنفعله في الحلقة القادمة يا برين = سنحاول الإستيلاء على العالم. 🙂
و من شدة الكتمة ما بتقدروا تطلعوا نفسكم كضابين و طلاسين 😂😂
أها تكربوا القاش و تدخلوا معسكر مغلق ما فيهو فرقة غير للصلاة و الأكل و قليلٌ من النوم ، يمر الزمن و كل ما الإمتحان يقرب تحس بشدة الكتمة و سخانتها زي حلة البرستو في النار 😂 و لما خلاص يكبس ورغم إنو السمبستك بخلي درجة إستيعابك عالية لكن قدر ما تقرأ تحس إنو المعلم ما داير يستلم و عامل زي البتحوش ليك في كوم رملة ترفعها بي جاي تنزل بهناك
و تعاين تلقى لسه عندك جزء كبير من المقرر ما شفتو بعينك
يلا بعد دا تفكر في عروض البيع بالتقصيد و تقوم كدا تجرد حساباتك و تشوف الأهم ثم المهم و الباقي شايلو الريح 🙂
يجي الإمتحان و تدخل مع الصناددة و الحفارين كراعك مع كراعهم بثبات زول حافر من أول يوم ، ثم تطلع النتيجة وسبحان القادر و إنت ما مصدق تلقى إنك pass 😎🤘🏻
تطلع من الكورس ناوي إنك المره الجاية تنجز من بدري لكن هيهات هيهات فالزمان يعيد نفسه في كل كورس و إنت تعيش على أمل في الجاي 🙂

#أصحى_يا_ترس
#تحديات_العودة_للجامعات