سهرت اللبارحه ليلي اناظر في جمال الكون
واناظر بالنجوم اللي تلالا في السما وتختال

وربعي جنبي اسمعهم انا اتأمل وهم يحكون
وفكري مع حبيبي اللي خذا له بالحشا منزال

واصارع سطوة اشواقن على قلبي ابوا يهدون
واناظر في طيوف اللي على عرش الغلا مازال

واقول اعشق تفاصيلك وقلبي بك غدا مسكون
واعيشك اصدق احساسن يسبب داخلي زلزال

احاسيسن وطت قلبن وسوا امن الغرام فنون
وعلى نار الغلا سوا الدلال وصب له فنجال

عشقت احساسك ونبضك عشقت اسلوبك الموزون
عشقت اوجودك الراقي وجودن يبعث الآماال

عشقتك والقمر شاهد عشقتك والبشر يدرون
عشقتك والفؤاد اضحى يعيشك كل يوم بحال

عشقتك كوكبن يلعج واشتت بك ظلام الكون
عشقتك غيمتن تسقي ضما قلبي مع الهمال

واقول الله لـ يحرمني وجودك يا دوا المغبون
اقاوم بك همومي اللي بقلبي تمكر وتحتال

ايا خلن تعلق بك فؤادي والغرام جنون
ترفق بي وانا بدحر بحبك هقوه العذال