GULRUX XUDOYOROVA IJODI

* * *
Yo'q.
Adashding,
Topa olmading,
Ranjimadim kelganingga kech.
Ranjimayman agar pishirgan
Ovqatlarim yoqmasa ham hech.

Ranjimayman men dazmol urgan,
Ko'ylaklarning topsang qatini.
Erkak zotin qahri hech qachon,
Yengmas ayol muhabbatini.

Ehtimolki, ketsang chidarman,
Qismat deya bariga ko'ngum.
Ammo ko'zyosh to'kkan chog'imda
Yupatmasang keladi o'lgim.

Chunki ayol ko'zyosh to'kkan chog',
Taslim bo'lar eng buyuk kuch ham.
Bori aybi kechiriladi
Yigit aytsa: Yiģlama, erkam.

Yo'q .
Adashding,
Topa olmading,
Ranjimadim kelganingga kech.
Men yig'ladim.
Sen yupatmading,
Tamom bo'ldi eng so'nggi ilinj.

© Gulrux Xudoyorova

Qo‘shiling: 👉 @Gulrux_Xudoyorova_ijodi

Мана, мен кетяпман!
Кетишим тайин.
Виқор-ла қаршингдан ўтяпман бу он.
“Қаёққа кетяпмиз?!”
Ҳеч англолмайин,
Ортимдан тўнғиллаб борар жомадон.

Мана, мен кетяпман!
Ўйлайман шу чоқ:
Нимадир бўлсайди, недир бўлсайди.
Дунё термулади беғам, эринчоқ,
Аксига олгандай ҳеч не бўлмайди.

Мана, мен кетяпман!
О, недир бўлса!
Юраклари ёниб кетса кимнингдир.
Пичирлар ул эски жомадон эса:
“О, унга барибир, унга барибир!”

Мана, мен кетяпман!
Кетишим – исён.
Балки енгилмоғим азалий тақдир.
Менга мадад берар эски жомадон:
“О, сенга барибир, сенга барибир!”

***
Qozonimda oshim bor,
Oshginamda toshim bor.
Toshlar bekor ketmasin,
Oting, mana, boshim bor.

Bu dunyo to'rt tomondir,
To'rt tomoni yomondir.
Yomon dunyo ichinda
Qaysi yaxshi omondir?!

Siz yomon-u, men yomon,
Kuymang yorim omon yor.
Yig'lab aytdim qo'shiqlar,
O'ynang yorim, omon yor.

Alpomishni choh ichra
Nolon-nolon ko'rganman,
Mashrab bobo, doringni,
Yig'lab-yig'lab qurganman.

Kechirilmas gunohim,
Qancha qilmay tavallo,
Qulman narxi bir aqcha,
Ammo ko'nglim ming tillo.

Ayol ko'ngli azaldan
Dunyo uchun ermakdir.
Alpomishlar bor lekin,
Oybarchinlar ertakdir.

Chil-chil ko'nglim, omon yor,
Tilsim ko'nglim omon yor.
Ochilmagin yovlarga
Sim-sim ko'nglim, omon yor.

Ertak aytdim o'glimga,
Ertak aytdim qizimga.
Ertagimni eshitsang
Yosh keladi ko'zingga:

"Ko'ngil ochmay hech kimga,
Hech kimga ochmasdan dil,
Eshigini yovlarga
Ochib bergan sodda el"

Savol qora qarg'aday
Dilginamni cho'qiydi:
Bizlar haqda avlodlar,
Ne deb ertak to'qiydi.

Na botirmiz, na yovqur,
Ayting, nima qilamiz.
Ertagi yo'q dunyoda,
Qolib ketar bolamiz.

Ro'molining uchiga
Ertak tuggan momolar.
Agar tug'sa, mard tuqqan
Erkak tuqqan momolar.

Ro'molingizni yopib,
Qo'shiq aytgum, omon yor.
Qo'shig'imga ismingiz
Qo'shib aytgum, omon yor.
Yaralguncha ertaklar,
Jo'shib aytgum, omon yor.

© Gulrux Xudoyorova

Umr nima?
"Men bilmasam, men bilmasam,
Sochi uzun, aqli kalta inson esam" -
Menga shunday ta'rif bergan ahli donish,
Anglarmikan: "Manim umrim so'zdir", desam.

Er zotini yo'ldan urgan edim o'zim,
Ul gunohsiz bo'lar edi men bo'lmasam.
Ertaklarga ketdim, yoshlar sochdi ko'zim,
Devlar meni o'ldirmadi, o'ldir desam.

Shayx San'onni yo'ldan urgan tarso edim,
Ishq yo'linda faqat o'zim rasvo edim.
Vijdoninggiz go'yoki pok qolar edi,
Meni sevsang, vijdoningni keltir desam.

Alpomishni Qalmoq yurtga boshlagan - men,
Makr aylab choh ichiga tashlagan -men.
Boybo'rilar sira ozor chekmas edi,
Ultontozni bu dunyoga keltirmasam.

Asli Arshi a'lolarda tug'ilgansiz,
Va men sabab jannatlardan quvilgansiz.
Ammo nega eslamaysiz, tan olmaysiz?
Siz men sabab, Siz men sabab sevilgansiz.
Siz men sabab, Ayol sabab sevilgansiz.

Tugamaydi dunyoning yo'qotmoq, topmoqlari,
Umrni uvol etar to'rt yonga chopmoqlari,
Gul vujudlar tubinda tosh yuraklar bo'lsa ne?
Tog'lar - bu gul dunyoning zil- zambil to'qmoqlari.

Tuyog'idan tillolar sochib ketgan kiyiklar,
Yetimlarni bolam deb quchib ketgan kiyiklar,
Bir zamonlar shoxida beshik keltirgan-u, lek
Beshikda yotganlardan qochib ketgan kiyiklar.

Endi kerib yurishga ko'kragimiz qolmagan,
Bolamizga aytishga ertagimiz qolmagan,
Alpomishni bobom deb aytolmaymiz, azizim,
Ul daraxtlar sarg'organ, kurtagimiz qolmagan.

Endi Qorajon ketmas Apomishni toparga,
Kenja botirimiz yo'q ajdarhoni choparga,
Yo pirim, deb yomonni yiqitmaydi Oybarchin
Go'ro'g'lilar jonini qo'ymas endi xatarga.

Bo'g'zimda qamishlardan xonish qolgan azizim,
Ayolman qismatimga ko'nish qolgan azizim,
Yaxshiyamki xudoyim o'zingni yaratmishdir,
Endi menga sevishdek yumush qolgan azizim,
Endi menga bir seni suyish qolgan azizim.

Gulrux XUDOYOROVA

Mening ruhim telbavor, Mashrablar bobom o'tgan,
Mening qalbim Boychibor, ichimga suron ketgan,
Manman degan qavmlar bariga qiron ketgan,
Men Haq desa yig'lagan ko'zlarning qavmidanman.

Men o'zimni bilmayman, o'zimni tanimayman,
O'zimni ko'rmaganman, yuzimni tanimayman,
She'r aytmasdan yo'l bossam izimni tanimayman,
Men o'sha "Yaral" degan so'zlarning qavmidanman.

Mening yoshim ko'rganlar, kulganimni ko'rmagan,
Kulganimni ko'rganlar, yig'laganim bilmagan,
Ha, men o'sha!
Men o'sha!
Hech kimga aytilmagan,
Faqat dilda yashnagan rozlarning qavmidanman.

Mening ruhimda bahor, xotirlarim gullaydi,
Suyaklarim gul ochgan, tomirlarim gullaydi,
Meni ko'plar tushunmas, meni ozlar qo'llaydi,
Axir men o'sha ko'pmas, ozlarning qavmidanman,
Men o'sha "Yaral" degan so'zlarning qavmidanman.

Gulrux Xudoyorova

Qizim, sening dardginang mening,
Yuragimga tig' bo'lib botar.
Nega tongda kulgularingmas
Ko'zyoshlaring meni uyg'otar?!
Nima qilay?
Qaylarga boray?!
Boshginangda ko'zyosh to'kaman.
Qo'llarimda ko'tarib seni,
Qayg'ularim ichra cho'kaman.
Balki qora, chirkin dunyoga
Kelganingga qilarsan isyon.
Isyon nima?
Bilmaydi onang,
Hammasiga chidaydi, ishon.
Momong ko'ngan, men ko'ngan hayot,
Sen ham ko'ngin, yashash chun kurash.
Azob chekar mitti jonginang,
Vujudimni yondirar otash.
Balki dunyo o'zgarar bir kun,
Balki sira o'lmas bolalar.
Urushlarning tugashi uchun,
Duo qilsa hamma onalar.
O'zgararmi dunyo, odamlar,
O bilmadim!
Yetmaydi ko'zim.
Dunyosida qolmoqligingga
Bitta sabab bo'lsa, u - o'zim.
Pok demayman bu kir dunyoni,
Yolg'onlarga ko'mmayman so'zim.
Gul ko'nglimni otash dunyoda
Yolg'iz tashlab ketmagin, qizim.

Gulrux Xudoyorova

Ketgin!
Mardona ket.
Nomardday ketma!
Ochiq yara bilan qoldirma meni.
"Endi qaytmayman" - de,
Va aytgin: "kutma",
Million yil kuttirib o‘ldirma meni.

Ketgin!
Umid berib ketmagin faqat,
Umidi yo‘qlarning o‘lmog‘i oson.
Menga qiyin o'lim tilaysanmi, ayt?!
Axir umid bo'lsa uzilmaydi jon.

Ketgin!
Ketganingni bilmasin hech kim,
Yotlarga kulmoqqa imkon qoldirma.
Qalbimni sevgisiz qoldirgin, lekin,
G‘urursiz qoldirma, orsiz qoldirma.

Ketgin!
Ketmaganing xo‘rlikdir asli,
O‘zimning qadrimni bilmoq istayman.
Axir qul bo'lmaydi Havvoning nasli,
O‘lsam ham ayoldek o‘lmoq istayman.

Ketgin!
Umid berib ketmagin faqat!

Gulrux Xudoyorova

Qaytdingmi?
Endi men qaytmam, bilsinlar...
Kechaga yuz burib, bugunga yetdim.
Bugungi yomonlar omon bo‘lsinlar,
Kechagi yaxshilar bahridan o‘tdim.

Men kechdim kechagi darddan...
Dard nima?
Kechagi baxtlardan kechib qo‘yganman.
Kechagi shodlikka yopgan eshigim,
Bugungi qayg‘uga ochib qo‘yganman.

Kimga dushman bo‘lsam, kecha bo‘lganman,
Bugun kek saqlasam, nomard bo‘layin.
Agar sevgan bo‘lsam, kecha sevganman,
Bugun sevolmasam nima qilayin?!

Balki baxtimdirman. Lek bari mubham,
Seni topolmayman bugun ko‘zimdan.
Hatto baxt uchun ham yoningga qaytsam,
Unda or qilaman o‘zim-o‘zimdan.

Gulrux Xudoyorova


@qaylardasanmendekoylovchi

Umr nima?
"Men bilmasam, men bilmasam,
Sochi uzun, aqli kalta inson esam" -
Menga shunday ta'rif bergan ahli donish,
Anglarmikan: "Manim umrim so'zdir", desam.

Er zotini yo'ldan urgan edim o'zim,
Ul gunohsiz bo'lar edi men bo'lmasam.
Ertaklarga ketdim, yoshlar sochdi ko'zim,
Devlar meni o'ldirmadi, o'ldir desam.

Shayx San'onni yo'ldan urgan tarso edim,
Ishq yo'linda faqat o'zim rasvo edim.
Vijdoninggiz go'yoki pok qolar edi,
Meni sevsang, vijdoningni keltir desam.

Alpomishni Qalmoq yurtga boshlagan - men,
Makr aylab choh ichiga tashlagan -men.
Boybo'rilar sira ozor chekmas edi,
Ultontozni bu dunyoga keltirmasam.

Asli Arshi a'lolarda tug'ilgansiz,
Va men sabab jannatlardan quvilgansiz.
Ammo nega eslamaysiz, tan olmaysiz?
Siz men sabab, Siz men sabab sevilgansiz.
Siz men sabab, Ayol sabab sevilgansiz.

Ustozimdan til va adabiyot haqida oltinga teng fikrlar. Albatta, ko'rib, ma'nan yana bir xazinadan bahramand bo'ling.