خلينا نفكرو شوية اعتبروها لحظة تأمل !
خلونا نوقفوا كل شي يصير ونقعدو بروحنا للحظات ونسئلوا نفسنا سؤال من انا ؟
هه ممكن بجد تضحكو على سخافة السؤال ولكن جربوا تسئلوا نفسكم من انا؟ وعلاش انا موجودة هني؟ خلينا نتاملوا في تفاهة الدنيا شوية نفارقو ناس نتعرفوو ع ناس نصاحبو ناس نعادو ناس تتغير شخصيتنا في ثواني ، بدون أدنى سبب ينقلب كل شي ضدنا ، في لحظات نحطو يدينا ع راسنا ونستسلمو لان معش عندنا استطاعة نكملوو ينكسر خاطرنا يغدرونا القراب منا شوية ع شوية قاعدة تتجرد ثقتنا من كل شي ، نهربوا من وجعنا للنوم بس احلامنا ترجعنا للواقع ، الذكريات والفراغ اسوء شي قاعد يصيرلنا بسببهم
الناس الي قاعدة تجرح فينا وتهين وتكسر فينا وحنا عاطينهم المجال !
في لحظة التأمل هادي حنعرفو اننا عاطين قيمة كبيرة للحياة ، تمام بس بنقولكم الحياة اتفهه من هكي ، لو ببساطة حددنا اهداف للحياة مكانش حيصيرلنا هكي ، لو كنا نحاسبوا أنفسنا اول بأول مكناش غلطنا ، لو كنا حطينا حدود لكل شخص مكانش حد تجرئ وفات حدوده ، لو كلنا شغلنا نفسنا وقتلنا الفراغ كنا انتصرنا على الذكريات
كل شي بأيدك احلامك بيدك ، متقولوش ان الحياة غدارة ربي موجود لو كان كل شي مستحيل مكانش حد فينا وصل لحلمه ، لا دنيا ولا ظروف ولا بلاد مهترء ومعدوم الأمن يمنعكم تحققوا أحلامكم انتم تقدروا ربي قال ( وأن ليس للأنسان إلا ما سعى ، وأن سعيه سوف يرى ) بس الموضوع محتاج صبر محتاج عزم وإرادة لما اطيح بيك متقعدش تنزل اقتباسات حزينة لالا قول قدر الله وما شاء فعل إنا لله وإنا إليه راجعون لان ربي قال ( وبشر الصابرين الذين اذا اصابتهم مصيبة قالوا إنا لله وإنا إليه راجعون ) ❤
الحياة جميلة لو انتم تشوفوها بإيجابية رغم خراب الواقع توكلوا على الله ثم على نفسك وخليك قوي وربي معاك طولت حكي بس ان شاء الله تكونوا استفدتوا.
𓆩 H𝖊𝖉𝖆𝖞𝖆 𓆪