واحدة كانت بتلف محشي واذن الاذان .. كان فاضلها اخر صف في الحلة .. وما ادراكم بلف المحشي وقعدة لف المحشي واخر صف في حلة المحشي
فضلت انها تقوم تغسل ايديها وتقوم تصلي وتبقى ترجع تكمل رغم ان مكنش فاضل كتير وتخلص
وقفت تصلي .. ماتت في الصلاة !
كانت هتموت قدام حلة المحشي !

بيحكوا عن مزارعين مسلمين في دولة ما
لما كانوا بيسمعوا (الله اكبر) لو الفاس كان مرفوع ورا ضهرهم
كانوا بيرموه ورا ضهرهم عشان ميبقوش عملوا حاجة بعد الله اكبر
حتى ولو بانهم جابوا الفأس لقدام ..
ممكن حد يحس بتكلف .. بس هو شيء ما وقر في القلب .. الناس دي بتسمع الاذان بقلبها .. و يمكن خرجوا من دايرة اللي الاية اتكلمت عليهم (وما قدروا الله حق قدره)
شيء ما ذاقوه عن الله .. كان له حلاوته

اعرف نماذج في عصرنا هذا حقيقي في رباط مستمر .. اما فرض يعدي مش بتتنهد وتقول كويس فرض وعدى ..
لاء هما عايشين حقيقي يخلصوا فرض يستنوا اللي بعده .. قبل ما الفرض الجديد يأذن بنص ساعة تلاقيهم وقفوا نشاط حياتهم وبدأوا يستعدوا .. اصل العصر هيأذن
ادهشتني مرة مقولة (انما جعل الاذان للغافلين)
حقيقي .. المصحصحين مش محتاجين حاجة تفكرهم بميعاد لقائهم بربهم!
رب اجعلني مقيم الصلاة ومن ذريتي
ربنا يبلغنا جميعا بركة الصلاة على وقتها
ويجعلنا ممن قدروا الله حق قدره

#ارحنا_بها_يا_بلال

#اقم_صلاتك_تصفو_حياتك