الشاعر سعد هادي الشمري

قصيده للقاسم ابن الحسن ع

//


الطف ابتده بدم الحسن ويختمه نحري
هذا انه جاسم يا علي وبزودي تدري

وعد الشهم ديَن
يا گلب الحسين

وبزودي تدري

•••••

من الطفوله امواعده والوعد باحلامي كبر
دم التخثر بالچبد هاليوم يجري من النحر
يالاكبر وشنهي الضمه مادام باحساسي نهر
خلي الفرات يشح وفه والكوثر بروحي انحفر

ال بِر والدينه بمنحره شلون يتصبّر
خليني للحومه اعتني قبلك يالاكبر

خليني اقُر عين
يا گلب الحسين

وبزودي تدري

•••••



هذا انته اول هاشمي بالطف لبس گلبه درع
شايل على اعيونك زعل ! لو وسعة اجفونك طبع
طبيت نار اعله العده وسبعين الف خيط وشمع
وارگابهم سكتت دمه وبس صوت سيفك ينسمع

والخيمه بجفوفي هوت ظِل ما اريده
ردت السبط بآخر نفس يظللني بايده

درب الوفه منين
يا گلب الحسين

وبزودي تدري


•••••

جسام يا روح الحسن وبروحه بس كلمة علي
آنه بدعاء امه البرز ومن السبط رخصه الي
الأكبر وبحساسي كبر صوت الوفه وظل يعتلي
اقتربت الساعه اعله العده ويالغاضريه اتزلزلي

گبلك تعنيت وضمه حسين بچبدتي
ولبيكَ يابن فاطمه چانت كلمتي

الطف ثمرة البين
يا گلب الحسين

وبزودي تدري


•••••

يجاوبهم المن ينسأل .. عني .. يگلهم بسمته
ويا جاسم شنفعي واصد بجفونه كبرت دمعته
عباس صح ظهر السبط بس آنه گلبه ونبضته
وراسي المن يظل عالنحر لو سلبوهه اعمامته


خليني يا جاسم اشد عزمك بذبحي
والذبح ما احسبه جرح بس حزنه جرحي

يشفه الجرح وين
يا گلب الحسين

وبزودي تدري


•••••

امتدت مناحرنه قلم وانكتب تاريخ الشرف
وسالت مناحرنه بوكت بحر الضماير مايه جف
برسومنه تاه الضمه معنى العذب بينه انعرف
وكلما نُمر منهه ،، خجل ،، عين النهر غضت طرف


و لو بيت الاحزان انبنه لـ أُمنه الجليله
بينه يواسن فاطمه رمله ويليله

تنزل دمعتين
يا گلب الحسين

وبزودي تدري


•••••

الشاعر الحسيني
سعد هادي الشمري

.


وجه النهر ليش انخطفت الوانه ؟!
خيام حسين بيهن طفله عطشانه

خَل تقره السمه الزلزله
زَعَــل عباس يا كــربلـه

ابعِز الظُهر خلّه الشمس بردانــه

••••

الغيره لوَن صارت بشر
چا صارت بهيئة گمر
اسألوه خل يحچي النهر
شصار هناك بجروفه ......

طب وبأيده جود وعلم
بعين الماي واگف سهم
تره النيران مو بالخيم !؟
النار بصولت اچفوفه ....

دگ فوگ النهر سيطره
خله الجيش يهجم وره
اتلاگوا مرحب وحيدره
وخيبر قصته معروفه .....


صاح ابكربله اتزلزلي
شوّفهه شمخلّف علي

كتب عالجرف فنّه الماي ينسانه

•••

بعينه اتجادحت غيرته
لگلب الصيف جاب الشته
اهتزت كربله ورايته
انه العباس ناداهه ...

اعتناهه وجوده عنده المهم
وبس سمعوا بهذا الاسم
الخيل اترادمت بالزلم
لجهنم سيفه وداهه ...

بلله الزلم عرفوه كلف
شجاهه الخيل ترجف رجف
بس أشر لماي الجرف
اعتنه للجربه باساهه ....


نسمه وللمخيم يهب
الماي يسمي چفه العذب

الحگ بچفوفه صار وسيفه ميزانه

•••

هله بكفال لبوة علي
الناده اخيامهه ادللي
الهوه والماي كلهن الي
ناده وما برد حيلي ...

بريتّهم لَـعثر النِفَس
لـ أكبر صوت اصير الخَرس
الفارس ما تلحگه الفرس
وكت الشرده من ويلي ...

السيوف السانهن ينعگد
أمر نار اعله راس البرد
ابن الشِطَر عمرُ ابنَ وِد
يا سَد يبقه يم سيلي ...

فحل وامربي زودي الفحل
اربايت نهروان وجَمَل

واحروف الحسين انطبعن اهنانه ❤️

•••

اسم حسين گلش عذب
صح مو ماي بس ينشرب
گلبي وياه شايل گلب
حيل يذوب باحساسه ...

اله چفين طاحن عشگ
وجفن فوگ السهم ينطبگ
خَل نحري بذبح يحترگ
عندي المهم انفاسه ...

هوه الذبح شنهو الذبح
يصح لخوّته الما يصح
اظل راس اعله راس الرمح
چا غير انه عباسه ...

لـمّن صلّت المشرعه
بچفوفي قرتّه الدعه

الوفه رايدني اصير اليوم عنوانه

•••


✍️سعد هادي الشمري✍️

@saadhadi83

╮ـ┄┄┄┄┄┄┄┄┄ـ╭
🚩 ابوذيه للطفل الرضيع🚩 ╯ـ┄┄┄┄┄┄┄┄┄ـ╰


•
•

الگلب يبني بهواك اندار
وانحاط
و گد حسنك زماني بيه
ون حاط
بدل نحرك تخلّه الگلب
وانحط
عسا ، وگطعوا نزاع القوم بيه

______________


✍️سعد هادي الشمري✍️

فگدناك
يحارس خيمة اختك
نخيناك
عِله الراس وعذرتك

...


يظِل ظلي ووجه خدري واماني
يضي عيني الفگد عينه وعِماني
يبسملة الحُسين ونحره قران
شرحت بنحرك السبع المثاني

الايات
تبّدت وي جِربتك
نخيناك
عِله الراس وعذرتك

....


شفت صدر الخيم بي ضاگت انفاس
ومن خوفي قريت الفلق والناس
يخويه الساتر الله اتأخرت ليش !
يا حيل الحسين .. إلحگ يعباس

شنو الماي
العِطش كله لكلمتك
نخيناك
عِله الراس وعذرتك


....


بخدري وبالخيم وبگلبي نيران
و ضماي من الچفوف الهوت خجلان
رساله لجربتك كتبتهه الدموع
هنيئآ شَيّعَتهه اچفوف عطشان

السهم ذاك
رماهه وفارگتك
نخيناك
عِله الراس وعذرتك

....


نخيتك وانته ابو الطف والمهابه
والـ امربيه علي اعرف جوابه
من گتلك حسينك .. گتلي بالعين
السهم صوب اعيونك خاف صابه

النظر غاب
الدمه تارس نظرتك
نخيناك
عِله الراس وعذرتك

....


بچيت .. ومو على الخيمه جرت عين
شسوي بخيمتي وامسلب حسين
شفت سيف الشمر مرفوع ليفوگ
وعرفتك يعباس بلايه چفين

صحت آآه
القصد بالآآه صحتك
نخيناك
عِله الراس وعذرتك

....


اعله طول الغاضريه شلون اجَمعك
يلموذر .. واريد بحرگه اشيعك
اشم الطف شبر يتبع شبر كوُن
من اريد اطلع يبو فاضل واودعك

بالدموع
يخي عن بُعد زرتك
نخيناك
عِله الراس وعذرتك

....


✍سعد هادي الشمري ✍

@saadhadi83

عباس .. مد چفك امسح دمعتي
تعنيت .. اوگف واطيح بحسرتي

تخليني وين امن أجي بلا چف يشوفونك
وماخذ مكاني السهم خليته بعيونك

.........

مگطوع درب الماي لو درب النظر
شو تيّهت شوفي بغيابك يا گمر
من جدمي لخيالي تملّكني الخطر
هوّه الامان انذبح لو ذبحوا نحر

صلّيت .. وسجادتِي ارماد وجمر
والليل .. بگد غيرتك رايد صبُر

شلي بنسيم الهوى واشتمه من دونك
وماخذ مكاني السهم خليته بعيونك

...........

عباس بدموعه المفارگ ينعرف
و جيتك وماي اعيوني ذَل ماي الجرف
اتمنه الگه احچايه الك بيهه انوصف
ما ظلّي لون بوجهي خاطر ينخطف

عباس .. وديني يم چف رايتك
بيا صوب .. چفك الشايل جربتك

بيا حال چنت ويصب جودك على امتونك
وماخذ مكاني السهم خليته بعيونك

.........

عباس خمسيني الگضن مدمع گضن
و ليلة امصابك ليش وحدهه زمن
العافت وطن تتسمه اسيره وبالمحن
شتتسمه گلي العافهه وراح الوطن

مذبوح .. ونظرات عيني الدامعه
بالآه .. تاخذني صوب المشرعه

يلغالي كلمة خجل اقراهه بجفونك
وماخذ مكاني السهم خليته بعيونك

...........

عباس فوگ الجمر صارت خِطوِتي
التچويني موش النار نظرة شامتي
ومن شافت الخيّاله نزلت دمعتي
امحنايه حافر خيلهه بدم اخوِتي

والخيل .. اشكم مره احس يمهه متت
من اتصول .. طحن الضلوع اسمع چنت

شافوك راية علي ورادوا يطيحونك
وماخذ مكاني السهم خليته بعيونك

...........

الطاحت من اچتافك يغالي بطيحتك
آمال چم طفله وطفل مو جربتك
عباس تدري انشم هوانه بشيمتك
كِسرة ظهر خيماتي طيحة رايتك

مرفوع .. عالرمح راسك يا گمر
والعين .. السهم داخلهه انكسر

ويم الفرات العده ضامي يوذرونك
وماخذ مكاني السهم خليته بعيونك


..........
✍سعد هادي الشمري✍

@saadhadi83
‏

هتفوا يا حُسين الروح الك فدوه
مُسلم بن عقيل وهاني ابن عروه

گالوا ريتك اتشوف
الرسايل صارت اسيوف

///

يبو السجاد يا جوهر عقيدتنه
قُرَب حَج الضماير وانته كعبتنه
السيوف اتلبي بسمك يا كرامتنه
و لِباس احرامنه يحسين كلمتنه

ما بين الصفا والمروه يسعي الدم
وبقصر الاماره اعمالنه تُختَم

الجروح اعله اسمك اتطوف

///

برسايلهم الك رادوا سفك دمنه
الثمار الاينعت قصدوا مناحرنه
بحبك ما دروا يحسين نتغنّه
ومن ندخل حرب چن ندخل الجنه

بسلامٍ آمنين المعركه انطبهه
وعلى روس ال اميه بموت نگلبهه

نجيهه بگلب ملهوف

///

حُسين الگالوا اقدِم ،، ذمم مبيوعه
لگيناهم علينه اسيوف مرفوعه
بهوى الكوفه محبتك صُفت ممنوعه
الزلم قلّت وفه وما وفت بس طوعه

الصلاه چانت جماعه يا ابو اليمه
ومن خلصت بقه بس مسلم بهَمّه

مسح كلمتهم الخوف

///

يَمن سِرت ابركِب انواره معروفه
حِداه غيرة علي العباس بچفوفه
علينه الصار ريتك سيدي اتشوفه
صارت باب للطف محنة الكوفه

ناس العاهِدت حيره اشنسميهه
گلبهه وياك چان وسيف بيديهه

صعب توصفهه الحروف

///

لـ (هل من ناصرٍ) ما نوگف انتاني
واحد عالمنايه ايسابگ الثاني
شنعاني سهل بس كوُن متعاني
حُسين وانته تدري بمسلم وهاني

واحد هاشمي ومعروفه ضرباته
وواحد حيدره امجربهه صولاته

عشگ للعتره معروف

///

✍️ سعد هادي الشمري ✍️
@Saadhadi83

لرؤية هلال شهر المحرم


•
•

زينب رفعت الناظر شافت هل المحَرَّم
صاحت بالحزن ويلاه على امصابك يشهر الدم

.......

رفعت شوفهه الحره لوجه السمه ووياهه
ارتفعت بالجفن دمعه وثگل بالگلب بلواهه
صهيل الخيل ذِكرتّه وخوف الـمَـر يتاماهه
ذكرت حركة الصيوان وذبح انحور ولياهه
وصاحت ويلي عالعباس چافل خدري الضيغم

.......

من شافت اهلال الموت زينب ذكرت الكافل
حنّت للمشت بحماه ومدمعهه بقه سايل
ذكرت محمل الناگه الما يوم بدرب مايل
العِفه صاحت على الدنيه من بعدك يبو فاضل
يعصابة الراس البيك أطرد كل ألم يلتم

.........

رسول الله من هاجر ليثرب شاعت اخباره
من طب للمدينه هناك ناده بصحبه وانصاره
السبيل لناگتي خلّوه هاي الناگه مختاره
وين اتنوّخ بيا صوب راد المصطفى داره
و لناگة الحره ازمام بيد الكافل اتوسمّ

..........

ناگة زينب الحره تشبه ناگة الهادي
اختارت چف گمر عدنان الهه بالدرب حادي
اشتّمّت عطر چفينه يلّه اطلَعَت للوادي
كل هاي الصور مرّت بزينب والحزن سادي
بوجهه بيوم شافت لاح للناظر اهلال الدم

.......

من فجر المحرم لاح زينب بالحزن صاحت
ومثل طيحة ابو السجاد بوداع الگمر طاحت
كل دمعه وألم كل سوط مر ابالهه وناحت
من اوداع گبر امهه لحد ما لليسر راحت
وتتقدم لحجر الموت كل ما يوم يتقدم

......

كُبَر بالسمه اهلال الآه وزينب صاحت اسم الله
بياض البهلال الهل يشبه نحر عبدالله
المدمع بالجفن كبّر وبالروح الهضم صلّه
وگلبهه من المصايب ذاب غير الألم ما ظلّه
ابمتنهه دار حوُل الآه وابمدمعهه تتحزم

.......

اذكَرت يوم الخرابه وسال مدمعهه وبقت تنحب
ومر ابالهه ابن ازياد بلسانه الگمر ينسّب
ووداهه الفِكر للشام واتفطّر گلب زينب
براس حسين سن مكسور واشفافه بعصى تُضرب
گلبهه من عرف عاشور زينب صار بيت الهم

........

بقلم ✍️
سعد هادي الشمري

@saadhadi83

(قصيده لمسلم بن عقيل)

•
•

مـن كـبّــر اذان المجــــد مسلم مناره
سيفه ذبح نحر الحكَمْ قصر الاماره

وين .. الضحّه دم
وين .. اللي حكَم

قصر الاماره

•••

التاريخ خلي انشوفه
ونعرف احداث الكوفه .. وما مرهه من مظالم

وابنَ زياد وظُلمه
وقصر الاماره وحكمه .. العلذبح والدم قائم

مهما الظُلم يتجبّر
نلگه النحر دم كبّر .. مظلوم قاتَل حاكم

مسلم تشيع اخباره
شلون اعتله بأصراره ..شلون انتصر عالظالم


دوُر السفاره بدنيته ابرز علامه
مظلوم وبصبره دوه جرح الأمامه

باب .. للطف صفه
باب .. للمصطفى

واضح شعاره

•••

باب الطفوف امصابه
ومن سِجَد في محرابه ..نقضت الناس البيعه

بعد الصلاه ما كملت
والگوم عنّه اتخلّت .. الگالت الأمر اتطيعه

واحد تأسّه بواحد
وللكوفه ليل الشاهد .. شلون الضمير اتبيعه

آلاف گالت إقدِم
تالي ابن عروه ومسلم .. لحسين ظلوا شيعه


والعاهدوا والكاتبوا ابن الزچيه
كل واحد اتحوّل سهم بالغاضريه

صار .. بالطف سهم
صار .. جرح وألم

ما تطفه ناره

•••

مسلم سفير العصمه
ومنهج حسين ايرسمه .. وللناس وضّح فكره

ولمن وضح موضوعه
تالي الكتُب بس طوعه .. قدمت ليه النصره

ما صِدگَت الرسايل
مسلم وحيد ايقاتل .. بجروحه بلّغ امره

وينادي مسلم اسمي
للدين ناذر دمي .. ويحسين لاخر قطره


ديني الحُسين وآنه اله ناذرهه روحي
وفوگ الأرض ترسم نصر غيرة جروحي

روح .. رسمت نصر
روح .. صارت نذر

لجل الغيارى

•••

مسلم وفه عنوانه
و سِر النصر ايمانه .. بأيمانه نال الرفعه

والجِثِته جريحه
كعبه صفه ضريحه .. واتطوف بيهه الدمعه

والما شِهَد بس الدم
قصر الاماره اتهدّم .. واتسمّه قصر البُدعه

و الطِغه وچان ايحكمه
اللعنه ظلت لاسمه .. والعار ظل ايتبعه


مسلم سمه ونحره يشع شمس المعارف
انزوره ويفوح ابحضرته عطر المواقف

ثار .. ثورة شرع
ثار .. غيّر وضع

واضح قراره

•••

وين الخسرهه اسنينه
وين اللي بايع دينه .. ابدنيه غيرَه وهمّه

بفعاله يرضه اسياده
وعنده الظلم عباده .. يرضي الطغاة بظلمه

ووين اللي طيب ذاته
وعمره ابتده بمماته .. والزود صايغ اسمه

مسلم لَوَن انذكره
الدنيه تلوذ بصبره .. هدّم اعروش بدمه


وين اليبيع آخرته لعيون المناصب
وين اليضحّي بدمه لجل الدين طالب

سال .. دم منحره
سال .. فوگ الثره

ظل ايتجاره

•••
✍ سعد هادي الشمري ✍
‏
@saadhadi83