-| ١٢:٠٠ صَ | ٢٠٢٠‏| ١٨ أذَار | يوم السبت | .
داكتب ألك هل رسالة والدموع مالية عيوني ..
اليوم مَر على وفاتك سنة كاملة!!
مَ چنت متصورة الأيام تمُر بهل سرعه
لحد الآن وأني مَ متقبلة فكرة وفاتك وروحتك للأبد ؟
ولحد الآن أتخيل حترجع وبعدك عايش !!
چأنـتَ حيل سنة صعبة بدونك خاليه من صوتك،أبتسماتك ونظرات عيونك الحلوة
تركت مكان كلش فارغ بحياتي من رحت
مَ تتخيل شگد مفتقدتك..
مثل هل يوم قبل سنة چأنـتَ الساعه ٧ بعد صلاة المغرب أتصل ابوية وجانت رجفة بصوته وگوه يحچي وبس أسمع يمه صوت صياح وبجي وگال أنو أنـتَ توفيت!
بوقتها مَ عرفت شنو أسوي بَــس حسيت قطعة من گلبي راحت بقيت جامدة بمكاني وخليت أيدي ؏ أذني حتى ما أسمع صوت البجي والعياط الي جان مالي البيت وجنت أصيح بصوت عالي
"لا ما مات جدو مَ يعوفني هوة گال ابقى وياج"
چنت أتمنى بهذاك الوقت يجي أحد ويچذب هل خبر وأيگول أنو أنـتَ مَ بيك شي بَــس للأسف لا چأنـتَ هاي النهايه
رحت وللأبد..
أول مرة بحياتي أشوف أبويه هلگد حزين ومتأذي والدموع تنزل من عيونه الحلوة
أتمنى أنو يطلع كُل هذا مجرد حلم، انو أنـتَ لهسه موجود ونگعد نسولف أني وياك وأحچيلك على إلي صار من رحت
بَــس هي حتبقى مجرد أمنية..
أتمنى أن تكون بخير ومكان أفضل من الدنيا هايه وتذكر دايماً ولاتنسى أنو أنـتَ بالي دايماً وحتبقى بگلبي خالد للأبد
بنتك يقين تحبك هوايه 🖤.