اونودماق ایسته‌رم؛ اؤزوم اؤزومدن-
بیر داها آیریلیب هاچالانمایام.
گئجه‌لر یاتیرام بیر فیکیرله من:
سنی دوشونمه‌یم، سنی آنمایام.

بو ائله قایغی کی، بو ائله غم کی،
آزدیرار یوز ایل‌لیک یولوندان سنی!
سحر ده، آخشام دا دوشونورم کی:
گرک دوشونمه‌یم هئچ زامان سنی.

اونودار فیکیرده، خیالدا تکجه
اونودماز اورکدن سئون، سئوه‌نی
من اؤزوم اؤزومه «اونوت!» دئدیکجه،
اؤزومو ایتیریب تاپیرام سنی.

«اونوتدوم» دئییرم، آنجاق نه فایدا؟!
یادیمدان چیخمامیش دوشورسن یادا
عشقیمین اودونو سؤندوره بیلمیر-
غضبیم، سئل کیمی آشیب داشسا دا...

#بختیار_وهابزاده

@Sevgidanizi1