💖 خسته قاسیم دیاریندان💖

بیر قوناق سئومز بیریسینه قوناغ اولوللار آشیق علسگر و شاگیردی میکائیل.استادی ، شاگیردی ایله بیرلیکده ، آپاریب بیر داخما دا یئرلشدیریللر. میکائیل آنلاییرکی ائو صاحیبی سس شور سئومه ین بیریسی دیر.تئز گئدیب آشیقا دییر کی بیردن چالیب اوخویارسان بو ظالیم گلر بیزی بوردان قؤووار.اوندا هارا گئدریک آی استاد. کیمین قاپیسین دؤیه ریک!بو آندا ائو صاحیبی میکائیلی ، علسگرله بیرلیکده گؤرور و دییر آی آغا نوکر!دانیشیق اوردا بازار ندی؟خبریمیز یوخدو بلکه بیزیم!!!. بو احوالاتی گؤره ن میکائیل ائو صاحیبی نین یانینا قاچیر و دییر  کی قوناغینیز  گؤیچه نین اوستاد صنعتکاری آشیق علسگردی.نه!!!!!!!!!! دئییر ائو صاحیبی. تئز نوکرینله بیرلیکده آشاغی مرتبه یه ائنیللر.آشیقین حوضورونا گلیللر.عذر خواهلیق ائدیللر و اؤزلریله بیرلیکده یوخاری مرتبه یه آپاریللار.بوردا قوربان کسیلیر، ساماوار قاینییر.بیر هنگامه قورولور گل کی گؤره سن!! آشیقین شاگیردی میکائیلیندا یاواش یاواش دؤنو آچیلیر. آشیق علسگر  گؤزونون اوجولا  میکائیلا باخیر اونون بو احوالاتین گؤرنده دییر گؤردون!اوستان علسگر بئله علسگردی! میکائیل دئییر  گؤردوم آی استاد. گؤردوم هونری نیده، حوُرمتی نیده.و آشیق بئله داوام ائدیر:

 

میکائیل !سن تانی قوجا بابانی
کم عاقلین نه کسیر بو تویدان ایندی!؟
راضی قالمیردین سن سازی چالماغا
یاخشی قورتارمیشیق آلوودان ایندی


گلنده گؤردونمو دانا دال دالا!؟
بوزوشموشدو یان با یانا دال دالا
حالال خوشون اولسون جانا دال دالا
دوُشه بوزارتمادان پولویدان ایندی!

مرد آدام گؤرنده سر کیمی تانی
دولاندیر گؤزونو هرکیمی تانی
اوستان علسگری نر کیمی تانی
سانا سان آچیلیب  جیلویدان ایندی.
💖خسته قاسیم دیاریندان💖

@Xastagasim

آشیق علسگر اوجاقی بیر چوخ استعدادلی آشیق و شاعیرلر یئتیشدیرمیشدیر.بونلارین سیراسیندا تئز پارلاییب تئزده سوُنن نورس ایمان چوخلارینین قلبینده اوُزونه یئر توتموشدور.یالنیز گوُیچه ده یوخ آذربایجانین گنجه،قازاق،قاراباغ ماحاللاریندا ائله جه ده گورجوستانین تورکلر یاشایان اراضی لرینده نورس ایمان حاققیندا چوخ سوُز صوُحبت گزیر،اونو اوره ک آغریسی ایله یاد ائدیللر.بو سببسیز دئییلدیر.
آدینین یانینا نورس(یئنی یئتمه)تخلوصونو یاراشدیران بو آشیق آرامیزدان نورس ده گئتدی.
چوخ زامان بیرینین حاققیندا"آرامیزدان گئتدی"ایفاده سینی ایشله در کن،اونون وفات ائتمه یینی نظرده توتوروق،آما نورس ایمان 1930-جو ایلده 27 یاشیندا اولار کن گوُیچه دن گئتدی و بیر داها گئری قاییتمادی.آشیق علسگر بو گنجی بویوک بدبختلیک گوُزله دیینی اوولجه دن خبر وئرمیشدیر.
نورس ایمان 1903-جو ایلده گوُیچه ماحالینین آغ کیلسه کندینده دونیایا گوُز آچمیشدیر.
آشیق علسگرین قارداشی مشهدی صالحین اورتانجی اوغلو ایدی.کوُرپه لییندن اوُز دوروشو و ترپنیشی ایله اومود وئرن اوشاغی روحانی ائتمک مقصدی ایله گوُیچه نین حوسینقولاقالی(نرمانلی) کندین ده بالا موللا آدلی ساوادلی بیر دین خادیمینین تشکیل ائتدیگی مکتب ده قویموشدولار.ایمان بورادا اوُز داورانیشی و اوخوما قابلیتی ایله هامینین دیققتینی جلب ائتمیشدیر.اونونلا بیرلیکده تحصیل آلانلاردان نرمانلی کند ساکینی آشیق-شاعیر بهمن دئییردی:ایمان گونده لیک درس دن علاوه بیر نئچه درس ایره لینی اوُیره نیردی کی،بو دا بیزی،ائله جه ده موللانین اوُزونو چوخ حئیرتلندیریردی.
مکتبی بیتیردیکدن سونرادا ایمان کیتابدان آیریلمیردیر.قوهوملارین سوُیلمه سینه گوُره او زامان اله کئچن دینی،بدیعی و تاریخی کیتابلارین هامیسینی ایمان اوخوموشدور.قورانی ازبر بیلیردیر.اونون پئشه سی کیتاب اوخوماق و شعر یازماق ایدی.

نورس ایمانین عائله ده حیاتینداکی خوشا گلمز حادیثه لر دا اونون دوغما یوردو ترک ائتمه سینده آز رل اوینامامیشدیر.
او قونشولوقدا اولان بیر قیزا نیشانلانمیشدیر.آرادان بیر آز کئچندن سونرا مشهدی صالح نیشانی گئری قایتاردی و بویوک اوغلو آشیق قورباندان قالان ایکی اوشاغین یئتیملیک عذابی چکمه مه سی اوچون اونون آروادی گول نیسه نی مجبورا ایمانا کبین ائتدیردی.آشیق علسگر بو ایشه راضی لیق وئرمه یه نده(گول نیسه آشیق علسگرین قیزی ایدی)مشهدی صالح گلیب اونون قارشیسیندا "قوربان اوُلدو،ائویم ییخیلدی،ایسته مه کی گول نیسه ائودن چیخا،بیرده ائویم ییخیلا"دئییب آغلامیشدیر.ایمان ایسه هئچ جور ایپه ساپا یاتماق ایسته میردی.نهایت آتاسینین گوُز یاشلاری اونا تاثیر گوُستردی.
بیر قده ر کئچندن سونرا ائله بیل کی ایمان یوخودان آییلدی.قارداشینین آروادی ایله ائولنمک ده چوخ بویوک قباحت ایشلدیینه گوُره ویجدان عذابی چکمه یه باشلادی.بئله لیکده ایمانین دردینین اوستونه بیر درد ده گلدی .بو درد اونو معنوی جهتدن چوخ سارسیتدی.ایمانا ائله گلیردی کی هامی اونا ریشخند ائدیر،بیر بی ناموس آدام کیمی توُهمتلندیریر و گوُرمک ایسته میللر.اودور کی ایمان جاماعات آراسینا چیخماغی اوُزونه عار بیلیر و گوُزه گوُرونمه مه یه چالیشیردیر.
مشهدی صالح بو تدبیری ایله چوخ بویوک سهوه یول وئردیگینی سونرادان آنلاییب و "ائویمی اوُزوم ییخدیم دئیه رک"عوُمرونون سونونا قده ر معنوی عذاب چکمیشدیر.

آشیقلیغا باشلادیغی زامان (1925) ایماندا غیر عادی کیفیتلر اوُزونو گوُستردی.او قارشیداکی آدامین نه فیکیرلشدیینی بیلیر ،شاهیدی اولمادیغی حادیثه لردن و گلجک دن خبر وئریردی.بو باره ده اونو گوُرنلر بیر چوخ ماراغلی خاطیره لر سوُیله ییبلر.بعضا اطرافینداکیلار اونو باشا دوشمه مه سینی،عائله حیاتینداکی آجیلیقلار،حتی بیر چوخلارینین "ایمان دلی اولوب،آغلینا گله نی دانیشیر"کیمی حاقسیز ایفاده لری،اینجه قلبلی صنعتکاری تئز تئز عصبیلشمه سینه،سبب اولموشدور.بئله حاللاردا او گئجه لر یاتماز،لامپا ایشیقیندا شعر یازاردی.چوخ زامان گئجه یازدیغی شعرلری"بونلارا کی قیمت وئرن یوخدور"دئییب جیریب توُکرمیش.دئییلنلره گوُره ایمان بیر نئچه درام اثری ده یازمیشدیر.بیر دفه عصبی حالدا اولارکن یازدیقلارینین هامیسینی آلاولو تندیره توُکوب یاندیرمیشدیر.
اجتماعی قورولوشون گئت گئده آرتان حاقسیزلیقلاریندان،عائله حیاتینداکی معنوی سارسیتیلاریندان جانا دویان ایمان همده،گله جه یین گئتیره جه یی فاجعه لرین شاهیدی اولماماق اوچون دوغما یوردو ترک ائتمک قرارینا گلمیشدی.اودور کی"باش گوُتوروب گئدجییم "دئیه ر کن ده گئتدی.
💖خسته قاسیم دیاریندان💖

@Xastagasim

علسگره خبر چاتیر کی سهله بانی نی زورلا باشقا سینا اره وئريبلر.عمي سي قيزي زهره نی گؤندرير احوال گئتيرمه يه.زهره گئديب قاييدير.آمما بئله باشي آشاغي،فیکیرلشیر آی آللاه من بو خبری علسگره نجور چاتدیریم؟آما علسگرده عاریف ایدی.زهره نین گلیشیندن آنلامیشدی نه وار نه یوخ،زهره گلیب دایاندی قاپی یا.بیلمیر نه دئسين نه دانيشسين.علسگر اوز توتور زهره یه:

علسگر
سؤیله قاصد،مختصری والسلام،
عرضیمی جانانا دئدين نه دئدي؟
بولبول تک آسمانا یئتيشيب نالام
صحن-گولوستانا دئدين،نه دئدي؟

زهره:
گئديب عرض حالين يارا سؤيله ديم
"اينجيمه سين مندن"جانانا دئدي
ظولم اليله منی یادا وئريللر
وئران قالسين بئله زامانا دئدي

علسگر:
یادیما سالاندا بوی بوساطینی
خسته کؤنلوم مینیر عشقین آتینی
گاه آختاریر یئرين يئددي قاتيني
گاه چیخیر آسمانا دئدين،نه دئدي؟

زهره:
ناكس مخنثین بوینو وورولسون
وای دوشسون ائوينه شیون قورولسون
محرمین اوغلانلاری قیریلسین
قالماسین یوردوندا نیشانا دئدي

علسگر:
عاشیق اولدوم بیر ناانصاف میللته
قولو باغلی مني وئردي جللته
اينجيله زبورا،صحفه توراتا
آند وئررم قرانا، دئدين،نه دئدي؟

زهره:
سئيراقوبلار آراليغي قاتديلار
ظولم ايله بوينوما كمند آتديلار
آتام آنام مني پولا ساتدیلار
اونلار یئتيشمه سين ايمانا دئدي

علسگر:
کؤنول گرک ایسته دیگین ایسته یه
دوستون سؤزون دوستا گرک دوست دئيه
رحم ائله دين من گوناهکار خسته یه
دردیمی لقمانا دئدين،نه دئدي؟

زهره:
زهره یم سینه مده درد و غم چوخدو
سینه مه توکولن پیکان دی اوخدو
دونیادا عدالت ،حاق دیوان یوخدو
یئتيره درديمي درمانا دئدي

علسگر:
کچ دولاندیرماسین خام خیالینی
جان قویان ایسته مز دونیا مالینی
یازیق علسگرین عرضی حالینی
سروی خورامانا دئدين،نه دئدي؟

💖خسته قاسیم دیاریندان💖

@Xastagasim

علسگرین خانيمي علسگره گیلئيلي دوشور کی هامیا تعریف یازیرسان آما منه یوخ.علسگر دئيير آي آرواد تعريف دئدييم گؤزللر مانا خلعت وئريللر سانا تعریف سویله سم منه نه وئررسن؟؟آرواد دا قاييدير كي سن منه تعريف دئه،من سنه باللي قايقاناق پیشیره رم.
-هه آی آرواد سن باللی قایقاناقی پیشیرمکده اول،منده سنه تعریف سؤيله ييم

آلا گؤزلو نازلی دیلبر
ائليندن خبرين وارمي؟
دورد بير يانين باغچا سؤيود
گولوندن خبرین وارمی؟

او زامان کی گلدیم سیزه
ماییل اولدوم قاشا گؤزه
زیبیلین چیخیبدی دیزه
کولوندن خبرین وارمی؟

او وعده کی گلین اولدون
قابیرغاسی قالین اولدون
قاینانانا ظالیم اولدون
دیلیندن خبرین وارمی؟؟

داها دوشوبسن حنکدن
سویون قورتاریب سنکدن
سینه ن چیخیبدی کؤينكدن
تولوندان خبرين وارمي؟!

آرواد قاییدیر کی منیم هر نه جهیزیم وار وئر گئديرم،آلدی علسگر:

علسگرله چکمه داوا
مهیریندی آلتی شاها
جهیزیندی قیریق تاوا
مالیندان خبرین وارمی؟

آرواد کوسور ایسته ییر کی آتاسی ائوينه گئتسين.دورور آياغا،علسگر قاییدیر کی آی آرواد هارا گئديرسن؟بو دونیادا مندن اؤتور سندن گؤزلي يوخدو،ايندي سانا بير تعريف سؤيله ييم بو تعريفي هچ کس ائشيتمه ميش اولسون.

گئتمه آماندي

گؤزللر سولطانی ملکلر شاهی
آلا گؤز جانانیم گئتمه آماندي
دردیندن خسته یم چکیرم آهی
اؤلورم لقمانیم گئتمه آماندي

جمالين گؤیچکدی بایرام آییندان
گؤرن دویماز قامتیندن بویوندان
لاییق دئييل قوربان كسم قويوندان
سانا قوربان جانیم گئتمه آماندي

من سانا نه دئييم آي مينا گردن
کسمه محبتین گل علسگردن
گوناهکار قولونام سالما نظردن
کرملی سولطانیم گئتمه آماندي.

سؤز سونا چاتدی،آما یئنه ده خانيم راضي دوشمه دي كي دوشمه دي،آتاسي ائوينه گئتدي.

آرادان بير موددت كئچدی،جاماعات دا ایشین ایچیندن آگاه اولدولار.هامی گؤزلويور کی علسگر نجور خانیمی راضی سالاجاق.اونلار دا نه قده ر چالیشدیلار آنا خانیم راضی اولمادی قاییتماغا.سون دا علسگر سازی گؤتوروب سينه سينه باسدي،آلدی گؤرك بوردا نه دئدي:

دؤنوبدو

آي بي مروت آخي سندن اؤتري
آه چکمکدن باغریم قانا دؤنوبدو
قد اییلیب گول ایرنگیم سارالیب
خزان دیمیش گولوستانا دؤنوبدو

هر طرفدن ساغول ساغول سسي گؤيه قووزاندي،آنا خانيم ساكيتجه دايانيب.آلدي علسگر ایکینجی بندی:

دیندیریرم دانیشمیرسان گولمورسن
خبر آلیب احوالیمی بیلمیرسن
ائنديريبن مجليسيمه گلمیرسن
یوخسا تختین سلیمانا دؤنوبدو!؟

دال گردنده سیاه زولفون هؤروبسن
انكار ائتمه آخي ايلقار وئريبسن
يازيق علسگردن اوز دؤندريبسن
يا بخت ياتيب يا زمانا دؤنوبدو.

آنا خانیم بوردا اوره کدن آغلادی.علسگرین اوز دؤندردين سؤزو آنا خانيما يامان تاثير ائتدي.اوشاقلاري علسگردن خبر آلیب ائوه ساري يولا دوشدو
💖خسته قاسیم دیاریندان💖

@Xastagasim