حلم السيده رقية

خل يطول الحلم لدكعدوني
خلي تشبع شوف منه عيوني
منحني شفته والـي مد أيده
وركضت بس الــمسافة بعيده
......*
گلي بنتي شلون حالچ ماحجيت
گلي احجي وردت احجي بس بجيت
كتله بـويه بحالي جنك مادريت
كبل سبي الشمر بــــــدموعي نسبيت

كتله بــويه هنا تعال كبالي
هواي الك عندي كلام ابالي
والعتب جارح كلت مازيده
وركضت بس الــمسافة بعيده

...*

واكف اگبالي احس وبچفه مـــاي
يــــارقية يگلي عطشانه تــــعاي
كتله عيني لشوفتك عطشانه هاي
شلي بالماي من اشوفك انت جاي

ارد اضمك حتى ليشوفونك
ما اريد تطيح ويذبوحنك
النهض من نومه الحلم شيفيده
وركضت بس الــمسافة بعيده

.....*

طول بروحي الحلم بس كلبي حاس
لا ابـــــوي اكبالي لابجفوفه كاس
شفته باوهامي المهر بضلوعه داس
ردت ابوسه ومالكيت بجسمه راس

چنه كلي ممن اتــــــاذيتي
كتله بويه ذاك اخذ ترجيتي
كلي بنتي فري صوب البيده
وركضت بس الــمسافة بعيده

.......*

هذا مو من ســـــوط دمي البثياب
هذا دم من اذني ركز عـــــالحجاب
جني تله وضــــايعه بين التراب
الخيل ساعة يدوسني وساعة الغياب

گصر ثوبي بطرفة نار خيامي
واحني روحي وما ابين اجدامي
المموت لـــتمنا جنت ماريده
وركضت بس الــمسافة بعيده

.......***

تالي فزيت وخفت فزة حمام
بالسبي انا بعدني وجرحي شام
صحت وين حسين ياعالم حرام
نطوني راسه ارد اشبكه وارد انام

رايده اشكيله السبي اذاني
هذا طكني وذاك هم سباني
وهذا رجفني بـــكثر تهديده
وركضت بس الــمسافة بعيده