السنة 365 يوم
أيام الحزن بمحرم و صفر 40 يوم
يبقى من أيام السنة 325 يوم "إتصرفوا بيهن مثل ميعجبكم ، كلش براحتكم"
أما بالنسبة للـ 40 يوم تعالوا نسولف عليهن شوية
هالأيام جداً خاصة عند محبين الحسين بمختلف الطوائف ، فرصة ثمينة للتقرب لـ لله عن طريق سيد الشهداء ( عليه السلام )
من تشوف شخص قبل محرم يكفر و ميصلي و بمحرم يتصرف بفطرته و يخدم بالمواكب و يمشي و ممكن يطبر ماكو داعي تحاربونه و تخلونه حتى بهاي الأيام يبتعد عن الله !
بـ إختصار ..
اليمشي مراح تتعب بـ مكانه !
و إذا يلطم هو مراح يتأذه صدرك إنت !
من هو يطبر مراح يطيح دمك إنت !
سوالف إنه الإمام الحسين ميريد هيج بطلوهن !
و سوالف إن الناس تتعامل بـ رياء خلال هالـ 40 يوم هم بطلوهن !
إنهُ تسوي نفسك "مثغف يديد" و داعية للإنسانية بالعلن كلش مو حلوة بحقك
بدل متگول للمقابل "لا تطبر، إتبرع بالدم " روح إنت إتبرع و خليه هو يطبر "معليك دمه و براحته"
كل شخص يحب حبيبه بـ طريقة مختلفة ،
مو حلو شكلك و إنت تحاول تتدخل بين حبيبين !
الحلاج يگول :
مـالي و لِلنـاسِ كَـمْ يَـلْحونَنِي سَـفَهاً ؟
ديـني لِـنَفْسـي و دِيـنُ النَّـاسِ لِلنَـاسِ !
و بالنهاية يا عزيزي لا إنت رب ، و لا إنت إمام حتى تحدد إذا هالتصرفات و الشعائر مقبولة أو لا ..
و هااا سالفة سيد فاقد و الشور لا تفتحوها عليكم الحسين ..
و أغاني نور الزين ندري غيروا الكلمات و سووهن لطميات حسينية هم ماكو داعي تحجون بيهن ..
شهر مصاب و أيام صعبة ع آل محمد ،
لا تخربوها ، و عظم الله إجوركم ..
