شد صوتي يا أوَّل أيّامي.. وعلِّقني فداوي
‏لين أعسّ الفارِق المنتوق وأشرب مِن ورِيْده

‏ساعةٍ فيها القصِيْد؛ يحزّ فالصَّدر السناوي
‏وش عليه إن سيَّر أحلامه لـ غيْمتك البعِيْدة

‏اِيتهادى ليْن ما يسرِي خلاف الجِفْن غاوي
‏وِيتودَّد كلّ ما شحّت مسارِيْك العنِيْدة

‏خاطرك يوم اِستلذّ الفِقد، قلّي: ويش ناوي؟
‏تَعْرِف إني ما قدرْت أستعذب إحساسه، وقيْده

‏يا قديمي والله إنه «قام يَطْوَى الحال طاوي»
‏كم لي أدوِّر على تبرِيْرك... وساعي برِيْده؟

‏اِذكرْ... إني ما تركتك يوم عاد الحزن ضاوي
‏ولا نسيتك في جديدات الشُّعور، ولا عَتِيْده

‏زلّ طيْرِك يوم عوَّد غصني من الشحّ ذاوِي
‏كيف تأخذ رِقَّة ظْلاله... وتترك لي شَدِيْده؟

‏عِلّ، واِسْتدركْ دوَاي إن غرَّب الروح المَداوي
‏واِترك شْعورِي يداعب وجْنَة الأرض الرغِيْدة

‏قبلك يزِلّ القصِيْد، وبعْدك تضيع الحكاوِي
‏وأنت لو بيتك ركيك؟ أسيَّل إحساسي وأزِيْده

‏أتمنّى [بيْرِ ضحكاتك] وأعرف إنه رهاوِي
‏لو يذكِّرني وعَدْه؟ شلون أبى أسْلَا عن وعِيْده

‏جوِّد يديني أنا ما طحت فيك إلا متساوِي
‏واِنسني بيْن الكلام، وبين سلسالك، وجِيْده

‏لين أمدّ الأرض وأسرِي لك مع الأمر السماوي
‏وأتشدَّد فيك لابة.. وأهتدي عينك عقيْدة!

‏الظمأ خلْفك ركابه، والهوى منك أنت راوي
‏ردّ لي صوتك وأبى أنسج لك من الغيمة قصيدة

‏جعلني لا اشتدّ عزمي في هواك وجيْت غاوي
‏ما تذكّر يا حبيبي غير الأيام السعيدة