Esse#
Soʻnggi paytlarda davlat byudjetidagi mablagʻlar borasida turli xil bahslar yuzaga kelmoqda. Ayniqsa, bu munozaralar "Parij-2024" yozgi olimpiadasidan soʻng yanada avj olib ketdi. Shunga koʻra, bir guruh shaxslar mablagʻlarni sportga ajratish tarafdori boʻlsa, boshqalar esa taʼlimga ham moddiy eʼtibor va eʼtiroflar berilishini yoqlashmoqda. Aslida, bu qarashlardan qaysi biriga hukumat ko'proq yon bossa, yurtimiz kelajagi uchun manfaatliroq bo'ladi?
"Hech bir soha mamlakatni sportchalik dunyoga mashhur qilolmaydi", — degan edi birinchi Prezidentimiz Islom Karimov. Darhaqiqat, bu yilgi Parij olimpiadasi sportchilarmiz uchun shunday omadli boʻldiki, Oʻzbekiston quyi oʻrinlardan 13-oʻringa koʻtarilishga muvaffaq boʻldi. Albatta, bularning barchasi prezidentimizning sportga ajratgan mablagʻlari sababli desak, yanglishmaymiz. Birinchidan, ayol sportchilar orasida oʻzbeklardan ilk bora oltin medal sohibiga aylangan Diyora Keldiyorovaning yutuqlarini aytib oʻtish maqsadga muvofiqdir. Shuningdek, oʻzbek sportida kamondan oʻq otish, suvga sakrash va ayollar kurashi boʻyicha debyut boʻldi. Ikkinchidan,charm qoʻlqop ustalari boʻlmish bokschi va taekvondo ustalarining yutuqlari tahsinga sazovor. Xususan, sport menejeri Qahhorov shunday deydi: " Mana, Bahodir Jalolov, Ulug‘bek Rashidovlar Tokioda oltin oldi, mukofotni ham olib, asosiy e’tibori yana sportda bo‘ldi va g'alaba qozondi”. Bundan tashqari, sportga qoʻshimcha mablagʻlar ajratish aholi salomatligini taʼminlash, ish oʻrinlarining sonini oshishiga sabab boʻlmoqda. Yaʼni sport inshootlarining barpo etilishi qurilish, infratuzilma sohalaridagi ishchilarning bandligini ham taʼminlamoqda va bu koʻrsatkichlar soni yiliga 14% qurilishda, 9% boshqa sohalarda boʻlayotgani qayd etilgan.
Ammo "Parij-24" olimpiadasida sportchilarning mashina, uy-joy, pul mukofotlari bilan ragʻbantlantirilishi aholi orasida qarama-qarshi fikrlarning vujudga kelishiga sabab boʻldi. Chunki bularning barchasi davlat byudjetidagi mablagʻlardan berilgani va boshqalarning siyla-yu nasibasi ekanligi taʼkidlandi hamda taʼlimdagi ragʻbantlantirishlar bilan taqqoslandi. Jumladan, Germaniyada boʻlib oʻtgan xalqaro olimpiadada Andijonlik Rayyona Ibrohimovaning 1-oʻrinni egallaganligi sportchilarimiz kabi ragʻbantlantirilmadi va aholi orasida noroziliklarga sabab boʻldi. Shuni ham aytib oʻtish lozimki, biz taʼlim orqali misli koʻrilmas yutuqlarga erishishishimiz mumkin. Avvalo, raqamlashayotgan dunyodan ortda qolayotgan, eksportdan importi kuchli boʻlgan Oʻzbekistonning rivojlanishiga ilm-fan yutuqlari suv va havodek zarurdir.Qolaversa, " Ilm olish — nina bilan quduq qazish",— deganalaridek, bu yoʻlda muvaffaqiyatga erishish qiyin, lekin uning beradigan mevasi totlidir. Xususan, rivojlangan davlatlar : AQSh, Yaponiya, Xitoy kabilarga nazar tashlaydigan boʻlsak, ilm-fan yutuqlarining mevasi sababli dunyoning eng kuchli davlatlaridan biri boʻlib kelayotganligining guvohi boʻlamiz. Ammo "Prezidentimiz taʼlimga mutlaqo mablagʻ ajratmayapti",— deyish ham xatodir. Chunki har yili yoshlar orasida" Yosh kitobxon" teletanlovining amalga oshirilayotgani va maktablarning zamonaviy tus olib borayotgani taʼlimga boʻlgan eʼtibordandir, biroq bular sportga qaraganda dengizdan tomchi xolos.
Fikri ojizimcha, sport va taʼlimga berilayotgan eʼtibor bir xil, lekin ularga qaratilayotgan ragʻbatlar bir xil emas. Ilm-fan yoʻlidagi yoshlarimizga ham shunday eʼtibor va eʼtiroflar boʻlsa, Oʻzbekiston bu sohada ham tamal toshlarini qoʻyishi shubhasizdir. Shu oʻrinda Otabek Mahkamovning bir gapini aytmoqchiman: "Nafaqat sportchilar, balki yosh olimlar ham och qolmasligi kerak"
Soʻzimga yakun yasar ekanman, davlatimiz taʼlim yoki sportga pul ajratishdan qatʼi nazar vatanimiz ravnaqi va yoshlarimiz kelajagi uchun manfaatli boʻlsin. Zero nima boʻlganda ham, " Xarajatsiz harakat — nolga teng".
💪👩🏻💼Durdonaxon yozdi
@essenamuna@milliysertifikatimizonatili
