Inci küpeli kız

Odamlarga boshqacha baho berarkanman: falonchi unaqa qilishi mumkin emas;
undan yomonlik kutish kerak emas;
yo'g'e, u boshqacha;
u hammadek maydagap emas;
unaqa gap gapirgan bo'lishi mumkin emas!

O'ylab qarasam, aynan kutilmagan odamlar tomonidan kutilmagan harakatlarni ko'tarish ikki barobar og'ir bo'larkan. "Bo'lishi mumkin emas" so'zi, aslida, bo'lishini xohlamagan ishlarimiz uchun aytilarkan. O'z-o'zimizni aldash uchun... ishonchni yo'qotmaslikni istaganimiz uchun...

Avvallari, kimlargadir yaxshilik qilganlarni yaxshi odam, deyilardi. Hozir, yomonlik qilmaslikning o'zi yaxshilik bo'lib qoldi.

Jamiyatda bo'layotgan ishlarni hammasini ham ma'lum shaxslarga, hukumatga, mansabdorlarga bog'lash to'g'ri emas. "Bir-biringni yomonla, g'iybat qil, tuhmat qil" - degan qonun yo'q. "Hasad qilmasang qamalasan", degan talab ham yo'q. Adolatsizliklarning hammasi mayda odamlarning, mayda ishlaridan boshlanadi...

@incikupeli

Ko'p odamlar bilan muloqot asosan majburlikdan bo'ladi. Xoh u rahbar bo'lsin, xoh ishchi, sotuvchi, shafyor... umuman jamiyatda uchraydigan har qanday shaxs bilan asosan o'z manfaatimiz uchun muomala qilamiz. Shuning uchun, saviya darajasiyu xarakteri qanaqa bo'lishidan qat'i nazar, ular biz uchun maqsadga erishishdagi oddiy "ko'prik" xolos.

Shularni bilsam ham, ba'zida, vaziyat taqozosi bilan gaplashgan odamlarga nisbatan (uni qayta uchratmasligim mumkinligi holda) o'z-o'zidan tezroq uzoqlashsam, ko'zim ko'rmasa deydigan darajada nimadir paydo bo'ladi. Eng yomoni, odob yuzasidan - buni, na ochiq bildirasiz, na jim turolasiz. Zaharni ichga yutish naqadar alamli...

Shunaqa paytlarda oilam, ko'ngilga yaqin insonlarim yanada qadrli ko'rinadi. Kimdir siz bilan majburan emas, qalban xohlab suhbatlashishi ham eng katta ne'matlardan, aslida.

@incikupeli

#shaxsiy_fikr
Yillar o'tyaptiki dinga nisbatan jamiyatlardagi fikr ijobiy tomonga o'zgarishi, quyoshning Antarktikaga ta'siridek sezilyapti xolos. Nega degan savolga sabablar talaygina, asos esa yana dindorlarga borib taqaladi. Dinni chuqur o'rganish deganda tafakkur bilan ilm osmoniga chiqishni emas, mutaassiblik chuqurini tushunadiganlar, bir qadam oldinga yuraman deb, ikki qadam ortga ketayotganlarini bilisharmikin?

"Din yengillikdir. Kim dinda qattiq turishga intilsa, din uni yengib qo'yadi..." - degan Payg'ambarimizning bir ummati, bugun hijobli ayollarni krossovka kiyishini qoralab chiqibdi. Aytishi bo'yicha johiliyat davrida oyoqlariga taqinchoq taqib, erkaklarni jalb qilishgan bo'lsa, hozirgilarning krossovkalari shu vazifani bajaryapti ekan. Bunga ko'zi tushgan begona erkak, boshqa a'zolarga ham qaragisi kepqolarkan... (naqadar teran tushuncha)

Abdulla Qahhorning "Mayiz yemagan xotin" nomli hikoyasi bor. Birinchi o'qiganimda dinni qoralash uchun sovet davrining ta'sirida juda ham oshirib yuborgan degan xulosa bilan muallifdan xafa bo'lgandim. Hayotda hikoyadagindan battar voqelarga jonli/jonsiz guvoh bo'lgandan keyin bildimki, Islom fitratimizga singmagan bo'lsa, 88 ta chegarayu 45 qavat paranjini bir tiyinlik qiymati yo'q.

Amallar niyatlarga bog'liq deb o'rgatishgan. Krossovkami, botinkami, otasini tuflisinimi yo topganinimi kiysayu bunga qarab kimnidir nafsi junbushga kelsa asl hayosiz kim bo'ladi?
Shunchalik tasatturga "qattiq" bo'lsangiz muslimalarning ro'moliga osillib, shuni sabab qilib ilmiy-siyosiy davralardan chetlatayotganlarga hech yo'q jag'ingizning kuchini ko'rsating. Bitta harf o'rgatgani uchun umri qamoqda o'tayotgan opalar haqida o'ylang, qayg'uring, iztirob cheking. Zotan shular haqida so'ralasiz!
Avval shularni hal qilib olaylik, keyin qizlar krossovka bilan qanaqa rangdagi paypoq kiyishi joiz-nojoizligi haqida gaplasharmiz...

@incikupeli

Statistik ma'lumotlarga qaraganda dunyo bo'yicha qayd etilayotgan o'limlarning 30 foizi 50 yoshdan katta odamlarga to'g'ri kelar ekan (pandemiyaga aloqasi yo'q).

Bu degani, har 10 ta odamdan 7 tasi, 100 tadan - 70 tasi, 1000 tadan - 700 tasi ellik yil ham yashamasdan vafot etmoqda.

Otadan avval soqol qo'yilmaydi, onadan avval hijob kiyilmaydi deydiganlar, ulardan avval o'lib ham bo'lmaydi deb o'ylasa kerak...

@incikupeli

Ba'zi odamlar xohlaganiga erishmasa, istaklari ijobat bo'lmasa, mahzun bo'lib, aytadigan gaplari bir xil: taqdir... ko'nikamiz... shunaqa bo'lishi kerak ekan-da... .

Aslida, boshqacha bo'lishi mumkin emasmidi?

Bog'dagi daraxtning oldiga bir odam kelib, havaslandi va olmaga qo'l uzatdi. Yetmadi. Nasib bo'lmadi deb, ortiga qaytishi - bu, qismat emas.

Olmaga qo'ling yetmadimi? Daraxtga chiq, shoxini eg, juda bo'lmasa qoqib tushir. Shuniyam eplolmasang o'zi uzilib tushishini kut!
Ana o'shandan keyin olma nasibasi qadarda bor, yo'qligi bilinadi.

Odam o'ziga bog'liq sabablarni to'liq bajarmasdan, qulay vaziyatni yaratmasdan turib, oqibatni Allohning taqdiri deb bilishi - ahmoqlik.

Sabablarini qilgan ko'p ishlarim ham amalga oshmagan deydiganlarga:
Birozdan keyin yana ochiqishingizni bilsangiz ham ovqatlanasiz. Yana chanqashingiz mumkin holda suv ichasiz... Kecha yegandim, kecha ichgandim-ku deb, bugun harakat qilmagan odam halok bo'ladi...

Mo'min (mo'mina) hech qachon ezilgan, lallaygan, shalpaygan o'limtikka o'xshamaydi. O'z qo'rqoqligini, jur'atsizligini "Taqdir" nomi bilan yashirmaydi.
Dunyo bir bo'lsin - siz bir bo'ling, muhim emas. Yetarki, Allohga tavakkul.

@incikupeli

#shaxsiy_fikr

Hayotda akulani okean yoki dengizda o'z ko'zi bilan ko'rganlar sanoqli bo'lsa kerak. Lekin, negadir, uning nomini eshitishi bilanoq har qanday odamda qo'rquv paydo bo'ladi. Buning eng asosiy sababi - kinolar. Ya'ni, bu, ba'zi fobiya, qo'rquv, vahimalarning paydo bo'lishi uchun, uni o'z hayotimizda yashab ko'rishimiz shart emasligining yaqqol isboti.

Tarmoqlarda tarqayotgan videolar ham xuddi (istasak, istamasak) "akula qo'rquvi" kabi ta'sir qilyapti. Ayniqsa, shaxsiy fikriga ega bo'lmagan, hali oila qurmagan yoshlar uchun.

Hamma ham ayolini/bolasini urmaydi, hamma ham chet elga borib buzg'unchilik qilmaydi, hamma ro'mollilarning ichida ham shayton bo'lmaydi, hamma ham 8 ta xotin olib, 80 joyda sarson qilmaydi... va hech kim so'roq-savoldan qochib qutulolmaydi.

Iltimos, videolarni tarqatishdan oldin yaxshilab o'ylab ko'ring. Miyyada stress yaratgan har qanday holat, jangda boshidan kaltak yegan odamnikidan ikki hissa ortiq bo'ladi. Shuncha odamni jarohatlash shartmi?

@incikupeli