نماز امام حسین(ع)در قتلگاه

کربلایی وفا منافی اردبیلی

ملائک دیده تر اللهُ اکبر
بوتون عالم اَسر اللهُ اکبر
حسین جان اوسته دیل آچمیش نمازه
چکیلمیش پرده لر اللهُ اکبر

وضوسی قان یوزی قان اللری قان
ائدوب سجادسین قانیله الوان
قویوب باش سجدیه شاه شهیدان
اولوب مهر نمازی خاک سوزان
وئروب حیدر اذان باشلاندی قران
دئیوب ربی آلوب جانانیدن جان
دئیوب تکبیر اولوب اکبر نمایان
قیامتدور مگر اللهُ اکبر

وجودِ کردگاری گوردی موجود
شهادت ایلدی بر بود مشهود
ائدوب نیتده قصد روی مقصود
دئیوب اولده حمد ذات محمود
صورا یکسر اولوب توحید معبود
حسین ساجد حق دادار مسجود
مکبّر اوُل نمازه اولدی داود
ودود ائتدی نظر اللهُ اکبر

نماز عشق ائدوب صحراده بر پا
چکوب صف انبیا یکسر دالیندا
اویاندا انس و جن بیر یاندا حورا
اوَل رکعت اولوب عشقیله ایفا
قنوتین تیرلر دوتدی خدایا
چاغیردی ربنا اِنّا کرمنا
عزاداریم منیم یاندیرما اوددا
حسینون ایستیر اللهُ اکبر

گَلنده خیمه دن قیزلارین آهی
پوزاردی عرصه ده احوال شاهی
دوروب نیم خیز اولاردی گاه گاهی
سالاردی خیمه گاهه بیر نگاهی
دوتاردی خالق دهری گواهی
دیَردی تک بودور دردیم الهی
کی یوخدور زینبین پشت وپناهی
ئوزون اوُل دادگر اللهُ اکبر

حسین گودالیده غرق مناجات
مَلک مبهوت اولوبدی اولیا مات
عبادت ایلیور عبده مباهات
اولا تا رکعت آخر ده اثبات
یتیشدی قتلگاهه شمر بد ذات
نه دین وار نه شرف هیهات هیهات
ائدوب چکمیله طیّ طور میقات
الینده بیر کَسر اللهُ اکبر

دالیجاق قویدی یوز میدانه زینب
باخوب نامرد بی وجدانه زینب
جدالی باشلادی مردانه زینب
ال آتدی خنجر عریانه زینب
اودا پر ووردی چون پروانه زینب
حسینی گَتدی تا افغانه زینب
دئدی جان جان بویاندون قانه زینب
الون ائتدون سپر اللهُ اکبر

اولوب طوفان اَسوب صحراده صرصر
فضانی دوتدی های گورسندی محشر
باجی قانینه بیر آغشته خنجر
قفادن قارداش حلقین ائتدی پر پر
ایکی قول چیرمانیقلی یوزده قان تر
یارالی باش الینده شمر کافر
چاغیردی وای بالا زهرا مکرر
مَلَکلر آچدی سر اللهُ اکبر

https://t.me/majmaol_ashaar