MIKRE AIMRO | ምክረ-አዕምሮ™

በሚያድንህ ታመም!
፨፨፨፨/////////፨፨፨፨
እለት እለት በስራህ ላይ በሰዓቱ የመትገኘው በወሩ መጨረሻ የሚከፈልህን ደሞዝ ታሳቢ አድርገህ ነው። ለአመታት ሳታቋርጥ ጠንክረህ ትምህርትህን የምትከታተለው ህይወትህን በፈለከው መንገድ እንደሚመራልህ ታሳቢ በማደረግ ነው። ህልሜ ለምትለው ነገር ወዳጆችህን የምትለው፣ ገንዘብህን ወጪ የምታደርገው፣ ጊዜህን የምትሰዋው፣ የምትገፋው፣ የምትሰቃየውና የምትታመመው አንድም ለውጣዊ እርካታህ ሁለትም እግዚአብሔር በፈቀደው መንገድ ወገኖችህን ለማገልገል ነው። ነገር ግን በዚህ ሁሉ ጉዞህ ውስጥ ምንም ነገር በነፃ የምታደርገው ነገር የለም፤ ምንም ነገር በቀላሉ የሚያልፍ ነገር የለም፤ ምንም ነገር ዋጋ ሳትከፍልበት አይመጣም። እያዳንዱ ትልቅ ግኝት የእራሱ ውድ ክፍያ አለው፤ የትኛውም የተሻለ ውጤት አደጋ (Risk) አለው። ማግኘት ከፈለክ የማጣትንም ሪስክ መውሰድ ይኖርብሃል።

አዎ! ጀግናዬ..! በሚያድንህ ታመም! ሔዶ ሔዶ ዋጋህን በሚመልሰው፣ ጥረትህን በሚያስተካክለው፣ የህይወት ደረጃህን በሚጨምረው ታመም። ደስታ ያለው ህመም ምን አይነት ነው? በእርግጥም ስሙ ብቻ ህመም የሆነ ነገር ግን ህመም የሌለው፣ በተቃራኒው እረፍታና ሰላምን የሚያድለው ህመም ምንድነው? ጂም ስትገባ ህመም እንዳለው፣ ስቃይ እንዳለው፣ ፈታኝ እንደሆነ፣ ላብህን እንደሚያንጠፈጥፈው ታውቀዋለህ ነገር ግን ስቃዩንም ጭምር ከልብህ ወደሀዋል፤ ከማንነትህ ጋር እንዲዋሃድ አድርገሀዋል፤ በሂደትም ለውጡን በሰውነትህ ላይ መመልከት ጀምረሃል። ቁጭ ብሎ፣ ጊዜ ወስዶ፣ እራስን ገዝቶ፣ ከሌሎች ማራኪና አጓጉዊ ነገሮች ተቆጥቦ አንድን መፅሐፍ አንብቦ መጨረስ ትግል አለው፤ ህመም ይኖረዋል፤ ዋጋም ያስከፍላል፤ ነገር ግን ከፈተናውና ከህመሙ በላይ የሚሰጥህ የተለየ ስሜት፣ የሚጨምርልህ እውቀትና እሴት ከልብህ እንድትወደውና እንድትዋሃደው አድርጎሃል።

አዎ! ሂደቱን እስከ ጥግ መውደድህ ህመሙን ያስረሳሃል፤ ሃላፊነትን መውሰድህ ውጤቱን ያማረ ያደርገዋል፤ ዋጋ ባለው ነገር መልፋትህ በእርግጥም ህመምህን ያቀለዋል። በምትወደው አለምና በማትወደው አለም ውስጥ ያለሀው አንተ እንድ አይነት ልትሆኑ አትችሉም። ህይወትህን ስትወዳት ምርጫዎችህን ታከብራለህ፤ በድግግሞሽህ ታድጋለህ፤ በተግባሮችህ ደስ ትሰኛለህ፤ እራስህ ላይ እሴትን ትጨምራለህ፤ ለምስጋና የፈጠንክ፣ ሌሎችንም ለማገዝ የተዘጋጀህ ትሆናለህ። ከወትሮው የተለዩት ውሳኔዎችህ ያስፈራሉ፤ ያስጨንቃሉ፤ ህመም ይኖራቸዋል። ነገር ግን መወሰናቸው የግድ ነው፤ መደረጋቸው፣ ወደ ምድር መውረዳቸው የግድ ነው። ህመም በተባለው እልህ አስጨራሽ ጉዞ መደሰት ስትጀምር በህመምህ መፈወስ ትጀምራለህ፤ በስቃይህ እየዳንክ፣ ህይወትህን እያሻሻልክና እያደክ ትመጣለህ። በሚያድንህ ታመም፤ በእርሱም ነፃ ውጣ።
ውብ ምሽት ይሁንልን! 🌘🌒💫✨
(Epha A.)
ምክረ-አዕምሮ ለተሻለ ነገ! 🦋

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @mikre_aimro 😊 💪

ለውጥን አትፈልጉት!
፨፨፨፨/////////፨፨፨፨
ለውጥን አትፈልጉት ይልቅ ለውጥን ምረጡ። ስለምን ለመለወጥ ብላችሁ ረጅም ርቀት ትጓዛላችሁ? ስለምን ለውጣችሁን ከማይፈልጉ ሰዎች ጋር ትሆናላችሁ? ስለምን መለወጥ ስለምትፈልጉት ነገር አብዝታችሁ ትጨነቃላችሁ? ለውጥን ፈልጋችሁ ወይም ያለልክ አስባችሁ አታገኙትም፣ ምክንያቱም አጠገባችሁ ነውና፣ ምክንያቱም በየቀኑ እያለፋችሁበትና እየኖራችሁት ነውና። ብዙ ሰዎች ለመለወጥ ብዙ ሲያወጡ ብዙ ሲያወርዱ ይስተዋላል ነገር ግን ከማውጣትና ከማውረድ በላይ እራሳቸው የት እንዳሉና ምን እያደረጉ እንዳሉ መገንዘብ ይኖርበታል። ለውጥ ተራራ ላይ የተቀመጠ ወይም ከርሰምድር ውስጥ የተቀበር ማዕድን ወይም እንቁ አይደለም። ለውጥ ግልፅ ነው። ትናንት ነበረ፣ ዛሬም አለ እንዲሁ ነገም ይኖራል። እርሱን ለማምጣት ከመታገል በላይ ራስን ማየትና የግልን የህይወት አቅጣጫ መረዳት እጅጉን ወሳኝ ነው። እናንተ የምትሰሩትን ስራ ከልብ ከሰራችሁ፣ ሁሌም ትኩረታችሁ ራችሁ ከሆነ፣ ከጊዜ ጊዜ ከቀን ወደ ቀን ከመሻሻል ወደ ለውጥ ከለውጥም ወደ እድገት የማትገቡበት ምንም ምክንያት አይኖርም።

አዎ! ለውጥን አትፈልጉት፣ እርሱን ለማግኘት ብዙ አትልፉ፣ በስሜታችሁ እንዲጫወት፣ ከሰዎች ጋርም እንዲያነካካችሁ አትፍቀዱ። ለውጥ በየቀኑ በሁላችንም ህይወት ውስጥ ሊከሰት የሚችል ነገር ነው። የእኛ ድርሻ የለውጡን አይነት መምረጥ ነው። በሚያሳድጋችሁ ወይም በሚጥላችሁ የለውጥ መንገድ የመጓዝ መብቱ አላችሁ፣ በአዎንታዊው ወይም በአሉታዊው አቅጣጫ የመሔድ ምርጫ አላችሁ። ማንም ሰው እንደ አቅሙ የሚጠቅመውንና የሚጎዳውን ጠንቅቆ ያውቃል። "ውሃ ውሃ ነው ያሰምጥሃል፣ እሳትም እሳት ነው ያቃጥልሃል" መባል ያለበት ሰው የለም። ማንም ሰው የራሱ የእውቀትና የመረዳት ደረጃ አለው። ህይወት በብዙ አቅጣጫ ትሰራናለች፣ ህይወት በብዙ ዘርፍ ታንፀናለች። አንዴ በደስታ አንዴ በሃዘን፣ አንዴ በፍቅር አንዴ በጥላቻ፣ አንዴ በማቅረብ አንዴ በማራቅ ትገለፅልናለች። ለምን ብላችሁ መድከም እንዳለባችሁ አስቀድማችሁ እወቁ፤ መውጣት መውረዳችሁ፣ መሰደብ መተቸታችሁ፣ መገፋት መጠላታችሁ ለምን እንደሆነ አስቀድማችሁ ተረዱት። ይሔ የምትከፍሉት ዋጋ በእርግጥም ለሚመጣው ውጤት የሚገባው ነው? ጥያቄውን በጥንቃቄ መልሱ።

አዎ! ጀግናዬ..! በየቀኑ ህይወትህ እየተቀየረ ነው። ነገር ግን ወዴት እየተቀየረ እንደሆነ መረዳቱ ከሌለህ እየጠፋህ እንዳሆነ አስተውል። አንድ ቀን ስትነቃ አስበህ እንኳን የማታውቀው የማትፈልገው ቦታ ራስህን እንዳታገኘው ዛሬውኑ እያንዳንዱን እርምጃህን በጥልቀት መርምር። ማንንም ለመግዛት ከማኮብኮብህ በፊት ስለራስህ መነሻና መዳረሻ እውቀቱ ይኑርህ። ህይወትህን በምታሻሽልበት በእያንዳንዱ ቅፅበት የምታስተውለውን ነገር አስቀድመህ የምታጣጥመው አንተ ነህ። በሰዎች ላይ የምትመለከተውን ለውጥ መመኘት አቁም፣ በምትኩ ባንተ ህይወት እየተከናወነ ስላለው ለውጥ ግንዛቤው ይኑርህ። አንተ በንቃት የምትረዳውም የማትረዳውም ብዙ ነገር በህይወትህ ውስጥ እየተከናወነ ነው። አይንህን ክፈት፤ አሁን በዋናነት በህይወትህ ውስጥ እየተከናወነ ያለውን ክስተት ትወደዋለህ? ትፈልገዋለህ? ያንን የምትመኘውን ለውጥ ለማምጣት የሚጠቅምህ ይመስልሃል? ጊዜ አታጥፋ፣ የምትፈልገውን ለውጥ አሁኑ ምረጥ፣ በእርሱ ላይም ለመስራት በልበሙሉነት ተነስ።
ግሩም ድንቅ ቀን ይሁንልን! 🏞🌞🌅
(Epha A.)
ምክረ-አዕምሮ ለተሻለ ነገ! 🦋

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @mikre_aimro 😊 💪

ከሰነፎች ራቁ!
፨፨፨////፨፨፨
በምትሔዱበት የትኛውም ስፍራ ሊጠቅማችሁ የሚችለውን ይሔን እውነታ እወቁት። አዎንታዊም ሆነ አሉታዊ፣ ጠቃሚም ሆነ ጎጂ፣ አሻጋሪም ሆነ አሰናካይ በዙሪያችሁ ያለው የትኛውም ነገር ሙሉ በሙሉ እናንተን የመግዛት አቅም አለው። በታታሪዎች ስትከበቡ የመታተር አቅማችሁ እጅጉን ይጨምራል፣ ከብርቱ ሰራተኞች ጋር ስትውሉ ጎበዝ ሰራተኛ የመሆን እንድላችሁ ይሰፋል። በአንፃሩም ከሰነፎች ጋር ስትውሉ፣ የሰነፎችን ምክር ስትሰሙ መጨረሻችሁ ስንፍና ይሆናል። የቸልተኞችን ጎራ ስትቀላቀሉ፣ ከቸልተኞች ጋር ስታብሩ ሄዳችሁ ሄዳችሁ ለምንም ግድ የሌላችሁ ቸልተኛና የዘፈቀደ ሰዎች ትሆናላችሁ። ዓለም ላይ ብዙ አደገኛ ሰዎች አሉ። ከእነርሱም ውስጥ ሰነፍ ሰዎች ግንባርቀደም አደገኛና መጥፎ ሰዎች ናቸው። ምናልባት ፈልገውና ደስ እያላቸው ሰነፍ አልሆኑ ይሆናል ነገር ግን ስንፍናን መርጠው መቀመጣቸው ሳያንስ ሳያውቁትም ሆነ አውቀውት ወደ ሌላው ሰው ማሸጋገራቸው አደገኛ መጥፎ ሰዎች ያደርጋቸዋል። አብዛኛውን ሰነፍ ሰዎች አንድ የሚያደርጋቸው ባህሪ ሁሉም በሚባል ደረጃ ብዙ ያወራሉ፣ የሚሰራን ሰው ማብጠልጠል ይወዳሉ፣ ትቺት ባለበት ሁሉ አሉ፣ በስም ማጥፋት የተካኑ ናቸው፣ የሰውን ተነሳሽነት በመስበር ማንም የሚውዳደራቸው የለም።

አዎ! ምንም ተጨማሪ ጊዜ ማሰብ አያስፈልግም። ወስናችሁ ከሰነፎች ራቁ፤ ቆርጣችሁ ስራ ጠል የሆኑ ሰዎችን ከህይወታችሁ አስወጡ። ማውደልደልና ወሬ ማመላለስ ለእናንተ አይደለም ለእነርሱም አልጠቀመም። በእርግጥ ሰው ስራፈት ላይሆን ይችላል። ምክንያቱም ለአንዳንዶች ስንፍና በራሱ ስራ ነውና። ቅዱስ መፅሐፍ የሰነፎችን አንድ ባህሪ እንዲህ ሲል ይገልፀዋል፦ "ሰነፎች ግን ጥበብን እና ተግሳፅን ይንቃሉ።" ለእነርሱ አስባችሁ ልትመክሯቸው ብትሞክሩ ካለመስማትም በላይ ይንቋችኋል፣ ይዘባበቱባችኋል፤ ያላችሁን እውቀት ልታካፍሏቸው ብትሞክሩ፣ የተገለጠላችሁንም ጥበብ ልታስተላልፉላቸው ብትጥሩ ከእናንተ ከሚወስዱት ጠቃሚ ነገር በላይ እናንተም መመዘን ይሞክሩ፣ ከትምህርቱ ይልቅ የእናንተን ደረጃና ማንነት ማጣጣልን ይመርጣሉ። ማንም የምትሰሙት ሰው ብታጡ ሰነፎችን በፍፁም አትስሙ፤ ማንም የምታማክሩት ሰው ብታጣቱ ስለስራና እድገታችሁ በፍፁም ሰነፍ ሰዎችን እንዳታማክሩ። ለእናንተ አዝነው ስሜታችሁን የሚጎዳ ነገር ባይናገሩም ከእነርሱ የሚወጣው የስንፍና መንፈስ አሳስሮ እንደሚያስቀምጣችሁ እወቁ።

አዎ! ጀግናዬ..! ጨለማው መሃል አንዲት ሻማ ብትበራ አይኖችሁ ሁሉ ከጨለማው ይልቅ ሻማዋንና ብረሃኗን መመልከትን ይመርጣል። አንተም እንዲሁ በብዙ ሰነፎችና ቸልተኞች ተከበህ ብቻህን ብርቱና ታታሪ ሰራተኛ ሆነህ ብትገኝ ትኩረት የማትስብበትና ጎልተህ የማትታይበት ምክንያት አይኖርም። ሰርቶ የሚያሰራህ በሞላበት ዓለም ከሰነፎች ጋር ጊዜህን አታባክን። ለብቻ መስራት ከሰነፍ ጋር ከመስራት እጅጉን የላቀ ውጤትን ያስገኛል። ከቻልክ አግዛቸው፣ ከስንፍና በሽታ እንዲላቀቁ ከጎናቸው ሁኑ፣ እንደ አቅምህ ልትረዳቸው ሞክር ከአቅምህ በላይ ከሆኑ ግን አንድም ደቂቃ እነርሱን ለመቀየር አትታገል። ብዙ ጊዜ የሰው ልጅ የሚገባው ስትነግረው ወይም ስትመክረው ሳይሆን አድርገህ ስታሳየው ነውና ከእነርሱ ስንፍና በተቃራኒው ቆመህ ጠንክረህ ሰርተህ ውጤቱን አሳናቸቸው። በአሰናካዮችና በማይደግፉህ ሰዎች ራስህን አጥረህ በውድቀትና በብስጭት የተሞላ ትግል የበዛበት ህይወት አትኑር። የራስህን ነፃና ለሰዎች የሚተርፍ ዓለም ትፈጥር ዘንድ ዙሪያህን ከግዴለሽና ሰነፍ ሰዎች አንፃው። በምትኩም ቁምነገረኛና ታታሪ ሰዎችን ወደ ህይወትህ አስገባ።
ውብ ምሽት ይሁንልን! 🌘🌒💫✨
(Epha A.)
ምክረ-አዕምሮ ለተሻለ ነገ! 🦋

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @mikre_aimro 😊 💪

ጎራችሁን ለዩ!
፨፨፨////፨፨፨
ኬትኞቹ ትሆኑ? ችሎታው ካላቻው፣ ስጦታው ከተሰጣቸው ነገር ግን የማሳደጉና የማሻሻሉ ረሃብ ከሌላቸው ወይስ ችሎታቸውን ለማወቅ፣ ስጦታቸውን ለመረዳት ደከመኝ ሰለቸኝ ሳይሉ እለት እለት ከሚፈልጉት፣ እለት እለት ራሳቸውን ለማሻሻል ከሚጥሩት፣ ስኬትና እድገትን ከተራቡት? ከቴኞቹ ናቸሁ? የትኞቹ ይወክሏችኋል? ተሰጥዖ ያለ ስራ ምንም እንደሆነ አስታውሱ። ተሰጥዖ ሲኖራችሁ ነገሮች ሊቀሏችሁ ይችላሉ፣ ከሌላው የተሻለ አፈፃፀም ሊኖራችሁ ይችላል በየጊዜው የማሻሻሉና የማሳደጉ ድፍረትና ተነሳሽነት ከሌላችሁ ግን በአጭር ጊዜ ውስጥ ተሰጥዖውን ሳያውቅ አንዱን የሚያስደስተውን ዘርፍ መርጦ ከሰራበት ሰው ያነሰ ህይወት ስትኖሩ ትገኛላችሁ። ምንም ውደዱ፣ ምንም ያስደስታችሁ፣ ምንም አይነት ስጦታ ይኑራችሁ ምንም ሳትሰሩ ከተኛችሁበት ግን ህይወታችሁ ወዴትም ሊቀየር አይችልም። አትዘናጉ፤ ባለተሰጥዖ መሆን የስኬት ዋስትና አይደለም፣ እውቀት የስኬት ዋስትና አይደለም። ዓለም ያልተማረ ሰው ችግር የለባትም፣ ምድር ተሰጥዖ የሌላቸው ሰዎች እጥረት የለባትም። ትልቁ እጥረት በተሰጥዖአቸው ላይ ጠንክረው የሚሰሩ፣ የተማሩትን የሚተገብሩ፣ ከልባቸው ለውጥና እድገትን የሚመኙ ሰዎች እጥረት ነው።

አዎ! ጎራችሁን ለዩ፤ ተሰጥዖ ኖሯችሁ ዛሬም ተኝታችሁ ከሆነ ተሰጥዖውን ከማያውቀው በምን ተሻላችሁ? ህይወት ለእናንተ ያዳላች ቢሆንም እናንተ ግን መደበኛውን ኑሮ ተላምዳችሁታል። ማሰብ፣ ማለም፣ ማቀድ ብቻ በቂ እንዳልሆነ ማናችንም እናውቀዋለን። ሰርቶ ማሳየት፣ ተግብሮ በውጤት መገለጥ ውዴታ ሳይሆን ግዴታ ነው። "እኔ ተሰጥዖ የለኝም፣ መክሊቴን አላውቀው" ማለት አሸናፊም ሆነ የተሻለ ምክንያት አቅራቢ አያደርግም። ሁሉም ሰው ወደ ህይወት ሜዳ ሲመጣ የሚለካው ባለው ተሰጥዖ ወይም በሚደረድረው ምክንያት ሳይሆን ሰርቶ በሚያሳየው ውጤት ብቻ ነው። እውነታው መረር ቢልም ሁሌም ጠንክሮ መስራት ተሰጥዖን በሚገባ ያሸንፈዋል። በተሰጥዖአችሁ የምትመኩ፣ መክሊቴ ይበቃኛል ብላችሁ ለተቀመጣችሁ መደበኛው የመካከለኝነት (mediocrity) ህይወት ተስማምቶኛል ካላላችሁ በቀር ከሳጥኑ ወጥታችሁ እንደማንኛውም ሰው የመታገል ግዴታው አለባችሁ። ምናልባትም የእናንተ ትግልና ድካም እንደ አብዛኛው ሰው ላይሆን ይችል ይሆናል እንጂ መታገላችሁ ግን የግድ ነው፣ መስራታችሁ የግድ ነው፣ ሌት ከቀን መጣራችሁ ግዴታ ነው።

አዎ! ጀግናዬ..! ዓለም የጠንካራ ሰራተኞች ነች። የትም ቦታ ለሰነፍና ለሰበበኛ ቦታ የለም። አንገትህን ደፍተህ አቀርቅረህ ትሰራለህ ቀና ብለህ ደረትህን ነፍተህ በልበሙሉነት ትራመዳለህ። በምድር ላይ እንደ ስራ የሚያስከብር ምንም ነገር የለም። የናጠጥክ ሃብታም ብትሆን እንኳን ሃብትህን በውርስ ወይም በስጦታ ያገኘሀው እንደሆነ ሰረተህ እንዳመጣህ ሊያኮራህና ቦታ ሊያሰጥህ አይችልም። ምንም መመፃደት አያስፈልግም፤ እንዲሁ በባዶ ሜዳ ራስን ያለ ልክ አግዝፎ መመልከትም አያስፈልግም። መስራት ካለብህ ዝቅ ብለህ ስራ፣ የእውነት ህይወትህ እንዲቀየር ከፈለክ ትምክህትህን አርቀህ ጣለው። በዛሬው ውጤት አልባ ጥረትህ አትበሳጭ፣ ዛሬ በማትመለከተው ለውጥ አትናደድ። ዝም ብለህ ስራህን ስራ፣ ትኩረትህን ስራህ ላይ አድርግ፣ የመጨረሻውን አቅምህን ተጠቀም፣ እውቀትህን ሁሉ አንጠፍጥፈህ አውጣው፣ ስራህም በተሻለ አፈፃፀም ፈጣን ውጤት እንዲያመጣ አድርገው።
ግሩም ድንቅ ቀን ይሁንልን! 🏞🌞🌅
(Epha A.)
ምክረ-አዕምሮ ለተሻለ ነገ! 🦋

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @mikre_aimro 😊 💪

ለምን አሉታዊነትን?
፨፨፨፨///////፨፨፨፨
ሰውነት ሚዛን እያለው፣ መልካም ማሰብና ማድረግ እየቻለ፣ ለሰዎች ጥሩ መፈፀም እየቻለ ግና በአሉታዊነት ገመድ ታስሮ እራሱን ጥሎ ሌሎችን ለማሰናክልና ለመጣል ይደክማል። አሉታዊነት ቢጎዳ ቀዳሚው ተጎጂ አንተ ነህ፣ አዎንታዊነት ቢጠቅም ቀዳማዊው ተጠቃሚ አንተ ነህ። ለማንም ለምንም ብለህ ሳይሆን አሉታዊና እንቅፋት ከመሆን ይልቅ ዝም የማለት ምርጫም አለህ። ያንተ ውድቀት ሳያንስ ሌላውንም ወደ ውድቅት ለመሳብ አትድከም። መደጋገፍን፣ መረዳዳትን፣ መበረታታትን የመሰለ መልካም ምግባር እያለ ስድብን፣ ነቀፋን፣ ክፋትን መምረጥ የምትወድቅበትን ጉድጓድ ቢያርቀው እንጂ በህይወትህ አንዳች የሚጨምርልህ ነገር አይኖርም። አንድ ሰው በገዛ ፍቃዱ ፈልጎና መርጦ ያደረገውን ነገር ግዴታ የመውደድና የማድነቅ ግዴታ የለብህም፤ እንዲሁ ባንተ የእሳቤ ደረጃና አቅጣጫ እንዲፈፀም መጠበቅ አይኖርብህም። አንተ ባትችል የሚችሉት ችለው፣ አድርገው ቢገኙ የምታጣው ነገር ምን ይሆን?

አዎ! ጀግናዬ..! ለምን አሉታዊነትን? ለምን ክፋትን? ለምን ስድብን? ለምን ነቀፋን? ለምን ሰዎችን በሚያደናቅፍ መንገድ መታወቅን ፈለክ? መጥፎ፣ ጎጂና አጥፊ ስሜት ሆኖ ሳለ ስለምን ከዝምታና ከአዎንታዊነት፣ ደግ ከማሰብ እርሱን መረጥክ? የሚገነባህ አዎንታዊነት ሆኖ ሳለ ስለምን በሚያፈርስህ አሉታዊነት ትመላለሳለህ? የሚጠቅምህ መልካም ማሰብ ሆኖ ሳለ ስለምን ክፋትን መረጥክ? ሰላም ያለው፣ ፍቅር የሚነግሰው፣ መትረፍረፍ የሚመጣው በጥላቻ ውስጥ አይደለም፤ በሰው ውድቀት ውስጥ አይደለም፤ በአሉታዊነትና የሌሎችን ስሜት በመንካት አይደለም። የሰላም ምንጭ አዎንታዊነት ነው፤ ደስታ መገኛው መልካምነት ነው፤ የሃሴት ማደሪያ ቅንነት ነው፤ የመትረፍረፍ መሰረቱ ደግነት ነው።

አዎ! የሚጥረውን ስላበረታታህ፣ ለደከመው ብርታት ስለሆንክ፣ ተስፋ ላጣ ተስፋን ስለሰጠህ፣ በህይወት መንገዱ ድጋፍ ለሚፈልግ ድጋፍ ስለሆንክ የምታገኘው እንጂ መቼም የምታጣው ነገር አይኖርም። በህይወትህ የሚገለጠው በሰዎች ላይ የምታንፀበርቀውና የምታደርገው ነገር ነው። የሌሎችን ድካም መረዳት ከቻልክ ሁሌም ከጎንህ የሚቆም ሰው አታጣም፤ የድጋፍ እጅህን የማትሰስት ከሆነ ሁሌም የምትደገፈውን ከጎንህ ታገኛለህ። የማይወክልህን አሉታዊነት፣ የማይገልፅህን ክፍታ እንድታንፀበርቅ የሚያደርግህን ኢጎ (ego) ከእራስህ ላይ አስወግድ፤ ማንንም ከማይጠቅም ጭፍን ጥላቻና ምቀኝነት ውጣ። መልካም አስብ፣ መልካም አድርግ፣ በመልካም መንገድ ተመላለስ፣ የሚሰራን ደግፍ፣ የሚለፋን ከልብህ አበረታታ።
ውብ ምሽት ይሁንልን! 🌘🌒💫✨
(Epha A.)
ምክረ-አዕምሮ ለተሻለ ነገ! 🦋

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @MentalCounsel 😊 💪

ቅን አሳቢ ሁኑ !

✨"የአዕምሮ ሰላማችሁን ማንም ሊያናውጠው እንዳይችል የሚያደርግ ጥንካሬ ይኑራችሁ።

ለምታገኙት ሰው ሁሉ ጤንነትን፣ብልፅግናን፣ደስታን የሚፈጥር ነገር ብቻ አውሩ።
ጓደኞቻችሁ መልካም ገፅታቸውንና ጥንካሬያቸውን የምታደንቁ መሆናችሁን ይወቁላችሁ።የሁሉም ነገር በጎ ገፅታው ይታያችሁ።

✨ የምታስቡትም ሆነ የምትሰሩት ለምርጥ ነገር ይሁን።
በገዛ ራሳችሁ ስኬት እንደምትደሰቱ ሁሉ የሌሎቹም ስኬት ያስደስታችሁ።
ያለፉ ጥቃቅን ስህተቶችን በመርሳት አትኩሮታችሁን በቀጣይ ታላላቅ ድሎች አሳርፉ።

✨ለሁሉም ሰው ፈገግታን ለግሱ።ያላችሁን ጊዜ በጠቅላላ ራሳችሁን በማሻሻሉ ላይ በማዋል የሌላውን ስራ ለመንቀፍ ጊዜው እንዳይኖራችሁ አድርጉ።

ለንዴት እና ለፍርሃት እጅ አትስጡ!"

ምክረ-አዕምሮ ለተሻለ ነገ! 🦋

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @mikre_aimro 😊 💪

ራሳችሁን ውቀሱ!
፨፨፨////////፨፨፨
ምን አሰራችሁ? ምን ወደኋላ አስቀራችሁ? ምንስ አቅማችሁን እንዳታወጡ አደረጋችሁ? ሲበዛ ሌላውን ወቃሽ ናችሁ፤ በህይወታችሁ ለተፈጠረው የትኛውም ነገር ሰዎች ላይ ጣታችሁን ትቀስራላችሁ፣ ጥፋታችሁን አምኖ የመቀበል ችግር አለባችሁ። ማንም ወደ ህይወታችሁ ገብቶ የፈለገውን አድርጎ እንዲወጣ በራችሁን ከፍታችሁ ካስገባችሁ ቦሃላ፣ ክብራችሁን አሳልፋችሁ ከሰጣችሁት ቦሃላ፣ ለራሳችሁ ምንም ሳትጠነቀቁ ሁሉ ነገራችሁን ካጋራችሁት ቦሃላ ጥሏችሁ ሲሔድ እርሱን ለመውቀስና ለመኮነን ትፈልጋላችሁ። ነገር ግን በቅድሚያ መወቅስና መኮነን ያለባችሁ እናንተ ናችሁ። ቦሃላ ምን ሊመጣ እንደሚችል ሳታውቁ ያለምንም ጥንቃቄና ዝግጅት ሰውን ወደ ህይወታችሁ አስገባችሁ፣ ከዛም መሰጠት የሌለበትን ነገር አሳልፋችሁ ሰጣችሁት፣ በእናንተ ላይ እንዲያዝና እንደ ፈለገው እንዲነዳችሁ ፈቀዳችሁለት። "ወደ ህይወታችሁ ካልገባው ሞቼ እገኛለሁ" አላላችሁም፤ "ከእናንተ ጋር ካልሰራው እከስራለሁ" አላላችሁም፤ "ያለ እናንተ መኖር አልችልም" አላላችሁም፤ "ክብራችሁን ካልነካው የእኔ ክብር አይጨምርም" አላላችሁም። እያንዳንዱ ያደረጋችሁት ነገር በፍቃዳችሁ ነው።

አዎ! ራሳችሁን ውቀሱ! ለደረሰባችሁ በደል፣ ላጣችሁት ነገር፣ ለኪሳራችሁ፣ ለስህተታችሁ፣ ለውድቀታችሁ ሰዎችን መውቀስ አቁሙ። ድክመትና ስንፍናችሁን ሰዎችን በመውቀስ ለመሸፈን አትሞክሩ። ምንም ነገር በህይወታችሁ ይከሰት ዘንድ ትልቁን ድርሻ የሚወስደው የእናንተ ፍቃድ ወይም ይሁንታ እንደሆነ አስተውሉ። በራችሁን ከዘጋችሁ ማንም በሩን ሰብሮ አይገባም። ወቀሳችሁ ምን እንዳሳጣችሁ አስታውሱ። በገዛ ፍቃዳችሁ ተከናውኖ ለሚመጣው ውጤት ሁሌም ሌላውን አካል እየወቀሳችሁ ከሆነ መቼም ከተመሳሳይ አዙሪት ልትወጡ አትችሉም። ብዙዎች ሌላውን መውቀስ እነርሱን ነፃ የሚያወጣ ይመስላቸዋል፣ ብዙዎች ለገዛ ህይወታቸው መበላሸት ሌሎችን ተጠያቂ ማድረግ የእነርሱን ጥፋት የሚሸፍን ይመስላቸዋል። ነገር ግን እውነታው ሰዎችን ወቀሱም አልወቀሱም፣ ሃላፊነቱን ሰዎች ላይ ጣሉም አልጣሉም ለሆነባቸው የትኛውም ነገር ግንባር ቀደም ተጠያቂዎቹ ራሳቸው መሆናቸው ነው።

አዎ! ጀግናዬ..! ላንተ ጥፋት ማን ሃላፊነት ሊወስድ የሚመጣ ይመስልሃል? ማን ላንተ ስህተት ሽንጡን ገትሮ የሚከራከር ይመስልሃል? ማን ላንተ ኪሳራ ተጠያቂ የሚሆን ይመስልሃል? ከራስህ በቀር ማንም ፊትለፊት ቆሞ የሚጋፈጥልህ ሰው የለም። ያገኘሀውን ሁሉ አብረሀው ስታጠፋ የነበረው ጓደኛህ፣ ከፍታኛ ድርሻን የሚጋራህ የስራ ባልደረባህ፣ ከዛም በላይ ከልብ የምትወዳቸው የሚወዱህ ቤተሰቦችህ፣ ፍቅረኛህ ወይም የትዳር አጋርህ በሙሉ ያንተን የግል ሸክም ሊሸከሙልህ አይችሉም። ህይወት የማንንም ሃላፊነት አሸጋሽጋ ለሌላው አትሰጥም። ከራስህ ጀምሮ ያንተ የሆነው ነገር በሙሉ ያንተ ሃላፊነት ነው። ሁሌም ሰዎችን ወይም ሌላውን አካል መውቀስ የደካሞች እንጂ የጠንካሮች መገለጫ አይደለም። ሰውን መውቀስህን በቀጠልክ ቁጥር የራስህን አቅምና ተነሳሽነት እየገደልከው ትመጣለህ። ሰበብ መደርደር፣ በሆነው ባልሆነው ራስን ከተጠያቂነት ለማንፃት መሞከር፣ ጥፋት በተከሰተ ቁጥር ሰዎች ላይ ጣትን መቀሰር እንዴትም ሊጠቅምህ አይችልም። ለራስህ ህይወት ሃላፊነት ውሰድ፣ ሰውን ከመውቀስ በላይ ራስህን ውቀስ፣ ከተጠያቂነትም ራስህን አድን።
ውብ ደማቅ ቀን ይሁንልን! 🏞🌞🌅
(Epha A.)
ምክረ-አዕምሮ ለተሻለ ነገ! 🦋

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @mikre_aimro 😊 💪

ጥላቻን ተጠየፉ!
፨፨፨/////////፨፨፨
ሰው በሰውነቱ የሚጠላ ፍጡር አይደለም። ሰውነት በአምላክ መልክ በአምላክ መንፈስ ተፈጥሯልና ከቡር ነው። እንዲሁ የተዳፈነ ጥላቻ መጫወቻ እንዳያደርጋችሁ ተጠንቀቁ። ሰውነት አይጠላም፣ ሰውነት አይንቋሸሽም፣ ሰውነትን አይጠየፉትም። ለሁሉም ሰው ቀን የሚወጣለት ጊዜ አለ። ያለውን እየወደዳችሁ የሌለውን ለመጥላት አትንደርደሩ። ጥላቻ ወጥመድ እንደሆነ አስተውሉ። አንዴ ልባችሁ በጥላቻ ከታወረ፣ አንዴ ውስጣችሁ ሰውን መጠየፍ ከጀመረ ያ ሰው ምንም በጎ ምግባር ቢፈፅም፣ ያ ሰው ምንም የሚጠቅማችሁ ሆኖ ቢገኝ እንኳን ጥቅሙንና መልካም ስራውን መመልከት አትችሉም። ጥላቻ የእርኩስ መንፈስ ዋንኛ መሳሪያ ነው። ጥላቻን አንግባችሁ በሰላም መኖር አይደለም ጤነኛ ንግግር እንኳን መናገር አትችሉም። ሁሌም ቢሆን ሰው ጥፋት አለበት፣ ይስታል፣ ይወድቃል፣ ከእርሱ የማይጠበቅን ተግባር ይፈፅማል። ቢሆንም ግን ጥላቻ ከክፉ ተግባሩ ሊመልሰው ወይም ሊያስተምረው አይችልም።

አዎ! ጥላቻን ተጠየፉ! በወጥመዱ አትውደቁ፤ ሀሳባችሁን ሁሉ መና አታስቀሩት። ጥላቻ ባለበት ሁሉ በቀልን የመሰለ ክፉ ተግባር መኖሩ አይቀርም። በገዛ ፍቃዳችሁ ነፍሳችሁን አታስጨንቋት፣ በቂም በበቀል፣ በጥላቻ በንቀት አታርክሷት። ነፍስ ነፃ ካልወጣች ህይወትም እንዲሁ ነፃ ልትሆን አትችልም። አቅም አላችሁ ነገር ግን አቅማችሁን ጥላቻ ለተባለ ክፉ መንፈስ መሳሪያ አታድርጉት። ሰው ይበድላችሁ፣ ሰው ይጉዳችሁ፣ ሰው ያሰቃያቸሁ እናንተ ግን በፍፁም ሰውየውን ለመጉት እያሰባችሁ በጥላቻችሁ ዳግም ራሳችሁን አታስጨንቁ፣ ለጉዳዩ ቦታ እየሰጣችሁ ይበልጥ መጠቀሚያው አትሁኑ። ጊዜ ፈራጅ ነው። እግዚአብሔር ሁሉን ያያል ሁሉንም ያውቃል። የደረሰባችሁን በደል፣ ጉዳታችሁን፣ ህመማችሁን፣ ስቃያችሁን ሁሉ ያያል ያውቃልም፣ በጊዜውም ምላሽ ይሰጠል። ሁሉን ለርሱ ትታችሁ ውስጣችሁን ማጥራት ተለማመዱ፣ የሆነባችሁን መቁጠር አቁሙና ልባችሁን በፍቅር ሙሉት። ለመገፋት መገፋትን አትመልሱ፣ ለመጠላት ጥላቻን አትመልሱ። ለራሳችሁ ደህንነት ብላችሁ ከፍ ብላችሁ ተገኙ፣ ለገዛ ጥቅማችሁ ሁሉን በፍቅር ለመያዝ ካልሆነም እርግፍ አድርጋችሁ ለመተው ሞክሩ።

አዎ! ጀግናዬ..! የሆነው ሆኖ አንተ ግን ዛሬም የሆነውን እያብሰለሰልክ ልብህን የምታስጨንቅ፣ ጥላቻንም የምታንፀባርቅ ከሆነ ከሆነብህ በላይ የጎዳህ አንተ ራስህ እንደሆንክ አስተውል። ጥላቻ ጥላቻን አሸንፎ አያውቅም፣ ቂምና በቀልም ጥፋትን ሽሮ አያውቅም። የመጣብህን መከራ፣ የደረሰብህን በደል በዝምታ ቻለው፣ ተቀበለው። ፈጣሪ የሚሰጥልህን ምላሽ በትዕግስት ጠብቅ። በራስህ ሸንጎ ለመፍረድ አትሞክር። አንዳች ያለምክንያት የሚሆን ነገር ያለ እንዳይመስልህ፣ አንዳች በከንቱ የሚከወን ተግባር ያለ እንዳይመስልህ። ሁሉ በምክንያት ይሆናልናል በሆነ ባልሆነው ለመበቀል አትሯሯጥ። ስሜትህን ግዛ፣ ጥላቻ እንዲነግስብህ፣ ምቀኝነትም እንዲጫወትብህ አትፍቀድ። ዛሬ ባይሆንም እያንዳንዱ በሰው ላይ የምታደርገው ነገር ተመልሶ እንደሚከፍልህ አስታውስ።
ውብ ምሽት ይሁንልን! 🌘🌒💫✨
(Epha A.)
ምክረ-አዕምሮ ለተሻለ ነገ! 🦋

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @mikre_aimro 😊 💪

ድፍረትና ቆራጥነት!
፨፨፨፨///////፨፨፨፨
ምኞትን ወደ እውነት፣ ህልምንም ወደ ስኬት መቀየር የሚችሉ ወሳኝ መሳሪያዎች ድፍረትና ቆራጥነት ይባላሉ። ብዙ አስቡ፣ በትልቁ አስቡ፣ አውጡ አውርዱ፣ ፍተሉ ጎንጉኑ፣ አውሩ አብራሩ የማድረጉ ድፍረትና የማስቀጠሉ ቆራጥነት ከሌላችሁ ግን ጥረታችሁ ሁሉ መና ነው። ዝምተኛ ሁኑ ተጫዋች፣ ጠንካራ ሁኑ ልፍስፍስ፣ አዋቂ ሁኑ አላዋቂ ድፍረትና ቆራጥነት ከሌላችሁ ግን አሁንም ያላችሁ ነገር በሙሉ ዋጋ ቢስ ነው። አዋቂው እውቀቱን ሰው ፊት ቆሞ ያካፍል ዘንድ ድፍረትና ቆራጥነት ያስፈልገዋል። ህልመኛው ህልሙን ይኖር ዘንድ ብሎም ያሳካው ዘንድ ፍረሃቱን አርቆ ጥሎ ድፍረትን መላበስ፣ ከጅማሬውም ቦሃላ ከዳር ለማድረስ ወደኋላ የማይመልሰው ፅኑ ቆራጥነት ያስፈልገዋል። ደፋሮችና ቆራጦች ሽንፈትን አያውቁም። ድፍረታው ለውድቀት ቢያጋልጣቸው ዳግም የመነሳት ብርታቱ አላቸው፣ በቆራጥነታቸው ሌላ የሚያጡት ነገር ቢኖር ለእርሱ ሃላፊነት ይወስዳሉ። አደጋን አይፈሩም ይባሱን ተጋፍጠውት ያልፋሉ፣ ወሬ አያሰናክላቸውም ይልቅ እልህ ውስጥ ያስገባቸዋል።

አዎ! ድፍረትና ቆራጥነትን ተላበሱ። በራሳችቹ ተማመኑ፣ ከልባችሁ ወስኑ፣ መለወጥ ያለበትን የህይወታችሁን ክፍል ቆርጣችሁ ለውጡት። የፈለጋችሁትን የትኛውንም በጎ ነገር ከማድረግ ማንም የማያስቆማችሁ ቆራጥ ሰው ሁኑ። ከፊቱ አደጋ ቢጋረጥበት፣ ሰዎች ቢተናኮሉት፣ ያለውን ነገር ሁሉ ቢያጣ፣ በህይወቱ ያልጠበቀው ነገር ቢከሰት፣ ብዙ ተቃውሞ ቢደርስበት፣ ፍረሃትና የበታችነት ደጋግመው ቢፈትኑት እንኳን ካመነመት ፍንክች የማይል፣ ጀግኖ የሚያስጀግን፣ ደፋር ሆኖ የሚያደፋፍር፣ ቆሮጦ የሚያስቆርጥ ሰው ሁኑ። ብዙ ሰው የፍረሃቱ ባሪያ ሆኗል፣ መሬት ላይ ሆኖ ከመሬት ላለመውደቅ እየተጠነቀቀ ዘመኑን ይፈጃል፣ የሚፈልጋትን ዓለም መቼም ፈጥሮ ሊኖርባት እንደማይችል እያሰበ በተገደበች ዓለም ውስጥ በጭንቀት ይመላለሳል። ትናንትም ዛሬም ነገም ውጤት አምጪው በድፍረት የተጀመረውና በቆራጥነት ውጤት የሚያመጣው ስራና ስራ ብቻ ነው። ማንም አያስቆመኝም ብላችሁ መስራት የጀመራችሁ ቀን የሚያስቆማችሁን ሳይሆን የሚቆምላችሁን ወዳጅ ታገኛላችሁ።

አዎ! ጀግናዬ..! የመጣው ይምጣ፣ ያጣሀውን እጣ ህይወትህ እስካለ ድረስ ዘመንህን በሙሉ ጥግ ላይ በጭንቀት እየኖርክ አታሳልፈው። ከኮርነሩ ውጣ፣ ከማይመችህ አጣብቂኝ ተላቀቅ፣ ራስህን ወደፊት ግፋው፣ ከአካላዊውና ከአዕምሮው እስራት መንጭቀህ አስወጣው። የዛሬው ህይወትህ እንደማይመጥንህ ካመንክ እምነትህን በተግባር ለመግለጥ አትፍራ። አቅም እያለህ እንደ አቅመቢስ፣ ተስፋ እያለህ እንደ ተስፋቢስ አትኑር። ወደኋላ ማፈግፈግን ተማር ነገር ግን በፍፁም በዛው እንዳትቀር። ከራስህ በላይ ለሰውም የሚተርፍ ወኔና ብርታቱ እንዳለህ አስታውስ። በፍረሃትህ ውስጥ ህይወት የለም፣ በጭንቀትህ ውስጥ ህይወት የለም። እየፈሩ መኖር ምንም ስለማይጠይቅ ብዙ ሰው እየኖረበት ነው። በድፍረትና በቆራጥነት የሚፈልጉትን እያደረጉ መኖር ግን ከክፍያው በፊት የሚያስከፍለው ዋጋ አለና ብዙዎች አይመርጡትም። ዛሬ መክፈል ያለብህን ዋጋ ክፈል ቦሃላም ልክ ቆንጆዋ ወፍ ነፃነትህን በልበሙሉነት አጣጥም።
ውብ ምሽት ይሁንልን! 🌘🌒💫✨
(Epha A.)
ምክረ-አዕምሮ ለተሻለ ነገ! 🦋

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @mikre_aimro 😊 💪

ተገማች አትሁኑ!
፨፨፨///////፨፨፨
ሀሳባችሁ መሪነት እንጂ ተመሪነት ካልሆነ ተገማች አትሁኑ፤ ፍላጎታችሁ ስኬት እንጂ ውድቀት ካልሆነ ተገማች አትሁኑ፤ እቅዳችሁ ትልቅ እንጂ ትንሽ ካልሆነ ወርዳችሁ አትገኙ። ሰዎች ተገማች ሰውን በቀላሉ ያውቁታል፣ በሚያውቁት ልክም ከእርሱ ይጠነቀቃሉ ወይም በቀላሉ ጠብቀው ያጠቁታል ብሎም ይጠቀሙበታል። ብዙ ሰው ስለእናንተ ብዙ ነገር የሚያውቅ ከሆነ፣ መግቢያ መውጫችሁ ለሰው ሁሉ ግልፅ ከሆነ፣ ሁሌም እዩኝ እዩኝ የምትሉ ከሆነ፣ እያንዳንዱን እንቅስቃሴያችሁን ለሰው የምታሳውቁ ከሆነ ያለምንም ጥርጥር ይሔ ባህሪያችሁ ብቻ አንድ ቀን ከከፍታችሁ አምዘግዝጎ ይጥላችኋል። ተደብቆ መኖርን የመሰለ ነፃነት የለም። ድብቅነታችሁ ግን እንደ እድገታችሁ መጠን ይወሰናል። ጠንክራችሁ ከሰራችሁ፣ አቅማችሁን ካጎለበታችሁ፣ ስማችሁን በጥሩ ነገር ካስጠራችሁ፣ አካባቢያችሁን የእኔ በምትሏቸው ሰዎች ካጠራችሁ በእርግጥም በጥቂቱ ብትገመቱም ለጥቃት ግን ተጋላጭ አትሆኑም። እናንተ ራሳችሁን ካልጠበቃችሁ ማንም ሰራዊት አቁሞ፣ ዞሪያችሁን ከቦ አይጠብቃችሁም። ማን ማንን ሲንቅ አይታችኋል? በእርግጥም ከልክ በላይ መተዋወቅ ያናንቃል፣ ድንበር አልባ መቀራረብ ያስጠቃል።

አዎ! ተገማች አትሁኑ! ማንም ሰው ተነስቶ ስለእናንተ ማውራት የሚል፣ ለማንም ሰው ክፍት የሆነ የህይወት ዘይቤ ያላችሁ አይነት ቀሊል ሰው አትሁኑ። ድል አድራጊነት ዋናው መሰረቱ ያልታየ ስራ ነው። ልታይ ልታይ ሲሉ የነበሩ ስንቶች ከእይታ ጠፍተዋል? "ያለእኔ አዋቂ የለም፣ እኔ ነኝ ጎበዝ፣ እኔ ነኝ ጠንካራው" ሲሉ ከነበሩት ስንቶች እኔነታቸው ማንነታቸውን አሳጥቷቸዋል? ስብዕናቸውን አናግቶታል? ሰዎች ስለእናንተ ያውቁ ዘንድ የግድ እናንተ መናገር ያለባችሁ ደረጃ ላይ ካላችሁ ገና ናችሁና ከማውራታችሁ በላይ ስራችሁ ላይ ብቻ አተኩሩ። ገና ፈታኙን የለውጥ ጉዞ ከመጀመራችሁ ተደነቃቅፋችሁ እንዳትወድቁ እያንዳንዱን እርምጃችሁን እየመጠናችሁ ተራመዱ። ታላቅነት ዋጋ አለው። ትልቁ ዋጋውም ዝምታ ነው፣ ፀጥታ ነው፣ ተደብቆ፣ ከብዙዎች ተሸሽጎ፣ ውስጥ ውስጡን ራስን ማብቃት ነው። የሆነ ጊዜ ቀን እንደሚወጣላችሁ፣ አንድ ቀን የተመኛችሁትን ስኬት በእጃችሁ እንደምትጨብጡ ካመናችሁ ለአላፊ አግዳሚው ገመናችሁን ማጋለጥ አቁሙ፣ እዚም እዛም የማይረባ ስፍራ መገኘት አቁሙ፣ ከነዚህ ከነዛም ጋር መዘባነን አቁሙ። ህይወታችሁን አሁኑኑ መስመር አስይዙ። በወዳጅ ሰበብ በጠላት ተከባችሁ ስላለመሆኑ እርግጠኛ ሁኑ።

አዎ! ጀግናዬ..! ዙሪያህን በአደገኛ አጥር በማጠርህ ሰው ስለሚሰጥህ ስም ሳይሆን አንተ ስለምታገኘው ነፃነት አስብ፤ ሰው ስለሚያደርስብህ ጫና ሳይሆን አንተ ስለምታገኘው ብርታትና ጥንካሬ አስብ። ያንን ጊዜ አስታውስ። ማንም ከጎንህ ሳይኖር በፈጣሪህ እገዛና ባንተ ብርታት ብቻ የሰዎችን የምቀኝነት መረብ የምትበጥስበትን ጊዜ፣ የታሰበልህን ክፉ ሀሳብ ተሻግረህ የምትሔድበትን ጊዜ። በጣም የተባረከና ልቡ በጥሩ መንፈስ የተሞላ ወዳጅ ካልሆነ በቀር በዚህ ዘመን ጥሩ የሚያስብልህ ሰው አታገኝም። ሁሉም ተጠላልፎ ለመውደቅ የማያደርገው ጥረት የለም። አንዱ ሌላኛው እንዲያልፍለት አይፈልግም፤ የአንዱ ውድቀት ለሌላው ስኬት ይመስል ሁሉም እርስበእርስ መሰናክል ለመሆን ይጠባበቃል። "ጠላቴን እኔ ጠብቀዋለሁ፣ ከወዳጄ አንተ ጠብቀኝ" የተባለው በምክንያት ነው። ከወዳጅ መሳይ ጠላት ትድን ዘንድ በዋናነት ፀልይ በመቀጠል ግን በቀላሉ የምትገመት፣ የምትታወቅ ሰው አትሁን። ማንም ሰው የሚዳፈረው የሚያውቀውን ሰው እንደሆነ አስታውስ።
ውብ ደማቅ ቀን ይሁንልን! 🏞🌞🌅
(Epha A.)
ምክረ-አዕምሮ ለተሻለ ነገ! 🦋

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @mikre_aimro 😊 💪

ከኋላቀር ስህተት ተቆጠብ!
፨፨፨፨፨////////////፨፨፨፨፨
የማይሳካልህ ስለፈራህ እንጂ እውነትም ስለማትችል አይደለም፤ ወደፊት የማትጓዘው በእራስህ ስለማትተማመን እንጂ አቅሙ አንሶህ አይደለም፤ ስምህን በጥሩ የማታስነሳው በእርግጥም መጥፎ ስራ ስለሰራህ ሳይሆን በማይመጥንህ ስፍራ ስለተገኘህ ነው። ደረጃህ በእጅህ ሆኖ ሳለ በሌሎች ደረጃ (standard) ውስጥ ለመካተት አትጣደፍ። እድገትህ ተግባራዊ የሚሆነው በዙሪያህና ባንተ ላይ ነው። በዘመናዊነት እሳቤ ሰዎችን እየሰሙ ከአላማ መሰናከል፣ ወደኋላ መመለስ፣ ማንም ከምንም ተነስቶ በሚያራምደው የወረደ አቋም ተደናቅፎ መቅረት ፈፅሞ አይቻልም። ዘመናዊነት በሃሳብም በተግባርም ነው። አንዳንዴ ጆሮ የማያስፈልጋቸው፣ ምንም ቁብነገርና ጠቃሚ ነገር የማይወጣቸው፣ ወሬያቸው በሙሉ አለመቻል፣ ደካማነትና አሉታዊነት የሆኑ ሰዎች አሉ። ለመስማት የሚቀልህን ሳይሆን ብትሰማው የሚጠቅምህንና የሚደግፍህን ንግግር ብቻ ስማ።

አዎ! ጀግናዬ..! ከኋላቀር ስህተት ተቆጠብ! ሰዎች ስላንተ የሚነገግሩህን ሁሉ ማመን ኋላቀር ስህተት ነው፤ ማንም የሚሰጥህን መጥፎ ስም መቀበል ያለፈበት ስህተት ነው፤ በማትፈልገውና በማይገልፅህ የስራ ዘርፍ ስኬትን መጠበቅ ድካም ነው። ኋላቀር የተባለው ስህተት ከስህተትነትም አልፎ የሚደጋገምና ማንነትህን የሚቆጣጠር ከሆነ እራስህን መጠየቅ ያለብህ አንተ ነህ። ስህተት በስህተት ሲደገም ከውድቀት ውጪ ትርፍ የለውም። በሚሰራህ ስህተት እራስህን መገንባትና ማሻሻል እንደምትችል እወቅ። አለም አለኝ ከምትላቸው ተፀዕኖ ፈጣሪዎች ውስጥ አንዱ የሆነው አለማቀፍ ባለሃብቱ ዋረን ቡፌት (Warren Buffet) አብሮት የሚሰራውን ሰው የሚመርጠው በስህተቱና በውድቀቱ ልክ ነው። ቢያንስ አንዴ ካልተሳሳተ ሰው ጋር ስራ መስራት አይፈልግም። የስህተትን አስፈላጊነት በዚህ ተረዳ።

አዎ! ያልሞከረ ሰው ሊሳሳት አይችልም፤ ሊወድቅ አይችልም፤ ሊተችና የማይሆን ስም ሊሰጠው አይችልም። መደበኝነት ሲያስረሳህ ተለይተህ መታየትህ ደግሞ ታዋቂ ያደርግሃል። በተለመደው የህይወት መልልስ መጠመድህ ትኩረት ሲያሳጣህ ሁሌም በሙከራና እራስን በማብቃት ውስጥ ማለፍህ ትክረት እንድትስብ፣ አይኖችም አንተ ላይ እንዲሆኑ ያደርጋል። መፍራት ያለብህ ሞክረህ መሳሳትን ሳይሆን በኋላቀር ስህተት ታስረህ መቅረትን ነው፤ መፍራት ያለብህ በሰው እይታ ዋጋቢስና የማትረባ መባልን ሳይሆን ከአብዛኛው ሰው ጋር ተመሳስለህ እምቅ አቅምህን አሳንሰህ መቅረትህን ነው። ስህተትን ስራ ነገር ግን እንዳትደግመው፤ ከኋላቀር ስህተት ተቆጠብ፤ በመሳሳት ውስጥ ተማር፣ በውድቀትህ ላይ ተሻግረህ ከከፍታህ ድረስ።
ውብ ምሽት ይሁንልን! 🌘🌒💫✨
(Epha A.)
ምክረ-አዕምሮ ለተሻለ ነገ! 🦋

በYouTube አማራጭ ይቀላቀሉን!
🔺🔻 SUBSCRIBE NOW
https://www.youtube.com/channel/UCIZv4h3iDx2C7CGbv9WIkVg?sub_confirmation=1
ምክረ-አዕምሮ/ @mikre_aimro 😊 💪