"Тошкент шаҳар Сергели-5 мавзеси Ҳабибий маҳалласида “Simple Town” МЧЖ томонидан бир нечта кўп қаватли уй қурилди. Уйлар қурилиши 4-5 йил олдин бошланган эди. Уйларнинг топширилиши икки йилга яқин кечиктирилди. Фирма қурувчилари ана-мана деб ортга чўзиб келишди. Шу йил кузда “коропка” тарзидаги хонадонларга кўчиб кира бошладик. Аммо табиий газ берилмади. Фирма мутасаддилари “Кўчиб кираверинглар, тезда ҳал қиламиз”, деб ваъда беришганига ишонган эдик. Лекин бугунга қадар ваъдасини бажаришмади.
Шу кунлардаги -10 – -15 даражали совуқларда ҳам уйда газсиз, иситиш тизимисиз ўтирибмиз. Аксарият оилаларда ёш болалар бор. Улар касал бўлиб қоляпти.
Илтимос, мурожаатимизни ҳукуматимиз катталарига етказишда ёрдам беринг".