***

Bahorning boģlari kuzladi,
Qamarning kòzlari òyilgan.
Eng sòngi yaproqning yuzlari,
Mashrabning yoshiga chayilgan.

Chiltonlar jòr bòlar kuylasam,
Qamishlar tebranib tinglarmush.
Sen qaysi sirlardan ogohsan,
Qalandar boshiga qòngan qush?

Adoģi kòrinmas umrimga,
Kuz yetar, haloskor kòz yetar.
Osmonda tentirar Majnunning
Maktubin yòqotgan kabutar.

Shamollar òchirsa izimni
Alqadim, bu jumboq bir qadim.
Olisdan kuzatib òzimni,
Havaskor odamga òxshatdim.

Xojimurod Qòziboyev