إن چان انته والدي .. بس رد عليه
معقول بويه ماتشم .. ريحة رقيه
إلغاليه يابويه آنا الغالــــــــيه
مو هذي ايدي ابلايه چفك خاليه
ريحة رقيه . ريحة رقيه

من شفت راسك يبويه استغربيته
حيل متغير يبويه من رأيته
ألعمتي گلتلها اشو حمره لحيته
او ليش بيه ما يرحب من اجيته

چا وين يا مية هلا .. ابنتي الحبيبه
چا هيچ يتلگى المحب .. جية حبيبه
كل ثانيّه اشتاگ الك كل ثانيّه
اشگد بقيت الجيتك آنا امتانيه
ريحة رقيه . ريحة رقيه
____
استغربت لمن نظرتك محضنتني
وليش ماكضيت اديه او مابستني
أشبگك چنت إمن اشوفك عودتني
ليش هسه إمن التقينه ما شلتني

معقول ناسي ابنيتك .. يالغالي وسفه
چا وين ذيچه احچايتك .. إلبيها ادفه
الدافيه يابويه اريد الدافيه
شبگة وحده بويه منك كافيه
ريحة رقيه . ريحة رقيه
_
وين كل ذيچ الترافه او كل دلالك
وينه رمشك وينه يالغالي جمالك
إمنين اجيب آنا أبو بويه ابدالك
بعدي عنك بويه كل خوفي حلالك

إن چان غيرني السبي .. او معرفته شكلي
اعرفني بس من ريحتي .. واعرفهم اهلي
ماناسيه عطرك ابد ما ناسيه
هالدنيا لكن بويه بعدك قاسيه
ريحة رقيه . ريحة رقيه
_
وينه حضنك بويه واچفوفك الترفه
ابحضنك ارد اگعد يغالي ساعه واغفه
من چنت ابرد يبويه ابصدرك ادفه
ليش راسك لسه شو ما وگف نزفه

مشتاگ گلبي للحظن .. واغفه اعله زندك
مشتاگ فمي ايقبله .. يالغالي خدك
ماغافيه لمن رحت ما غافيه
والدنيا ضلمه بويه بعدك طافيه
ريحة رقيه . ريحة رقيه
_
يابسه شو شاهدت يابويه شفتك
إمن الگفى محزوزه يالغالي رگبتك
وين ذيچ اعيونك الحلوه او ضحكتك
ليش ماتضحك يبو اليمه الطفلتك

چا وين ضحكاتك اللي .. او ذيچ المحاچي
معقول بذني ماشفت .. بويه التراچي
ياعافيه الضلت بعد ياعافيه
وناتي بعدك بويه لتظن خافيه
ريحة رقيه . ريحة رقيه
_
بويه معقوله ولا شاهدت اديه
إمن السياط امورمه او ماتن سويه
او ماشفتها اشفافي بس متيبسه هيه
الماي بعدك ما روت منه رقيه

معقول ماشفت الصبع .. محروگ صبعي
معقول ماشفت الصدر .. مكسور ضلعي
مو حافيه ليك اركضت مو حافيه
بابويه من الطف اجيتك لافيه
ريحة رقيه . ريحة رقيه

حيدر الحلفي

https://t.me/pagy007