Мени севиб қолишинг мумкин -
Бир лаҳзада, қилмасман гумон.
Мен деб куйиб, ёнишинг мумкин,
Кул бўлмассан, қоларсан омон.

Яна ялқов, эгиз кунларнинг
Гуноҳидан ўтасан якка.
Лек хотиржам ололмайсан тин,
Кечалардан эшитиб дакки.

Бир шарпаман, турмасман порлаб,
Ҳам кўксингда эмасдир жойим.
Мени куйлаб бўлмас баралла,
Мен - тилингда хазин хиргойи.
Гарчи сендан ёғилар виқор,
Кўринсанг ҳам қатъий, хушсухан,
Севишингни қилмайсан инкор
Ва ҳеч қачон ололмайсан тан.

Шоҳинур Усмонова