قان آدلی دویغولار

داغیلیر باشیما هر آی، هر فصیل
بیر باشقا باهارا داریخان قوشام
بو اوچوش، بو قونوش منه خوش دئییل
ایستی‌ده، سویوقدا سینیخان قوشام

نئیله‌ییم مزه‌سیز دوزو، چؤره‌یی؟
اووچونون ألینده أسن اوره‌یی؟
اونودوب بیر یوللوق خوردوـخؤره‌یی
شیرین آزادلیغا آجیخان قوشام

کیمسه نه ایسته‌دی گؤزومو وئردیم
أله گلمه‌یه نه، ألیمی هؤردوم
اصیل گؤزللییی یوخودا گؤردوم
گئجه‌یه، گوندوزه کاریخان قوشام

یارالی دیل گؤروب اؤزوم قانادیم
قینادیم عؤمرومو، گولو سینادیم
ایتیب‌سه قفسده قولوم، قانادیم
قانادسیز سس‌لره یانیخان قوشام

"نیکزاد" بویوما اوخشاما یازیب
قایغی‌سیز سئوگی‌لر آدیمدان بئزیب
چووغونلو حیات دا کهلیییم آزیب
قیبله‌سیز آرزویا قانیخان قوشام


#یعقوب_نیکزاد


@qanadli_duyqular

« قولتوق آغاجینا یازیغیم گلیر »

توتوب بیر بینانی چیینلرینده
او زوربا بیر دیرک اولا بیلردی
مغرور بیر چوبانین چیینلرینده
قورد ازن ده‌یه‌نک اولا بیلردی

بیر کؤرپو تاغیدا اولا بیلردی
تفنگ قونداغی‌دا اولا بیلردی
واقتسیزمی قیریلدی تئزمی قیریلدی...
ووقاری قیریلدی عزمی قیریلدی

قولتوق آغاجیندان آجیغیم گلیر
او بوتون یوللارا قولتوقدان باخیر
گیردییی قوللارا قولتوقدان باخیر

نغمه‌ده اوخویور او جیرها جیرلا
قولتوقدان اویانا گئتمه‌ییر سسی
ندیر اوخودوغو؟ « قولتوق نغمه‌سی»
اؤزو بو وردیشی عؤمرونه یازیب
اونو بیر قولتوقدان تونلاسان اگر
یانیندان یان اؤتوب بیر آیاقسیزین
کیمه‌سه اوچونجو آیاغا دؤنر

داش کاها یاخشی‌دیر بیر اوچوق دامدان
دویار ایهامیمی بیر قولتوق آجی
دئییرم قولتوغا گیرن آدامدان
یاخشی‌دیر بیر سینیق قولتوق آغاجی
محمد آراز- 1967

@qanadli_duyqular

بو سرین یئل هالارادان أسیلیر؟
کی قراریم کسیلیر!
قاپ - باجام باغلیدی کی،
پنجرم‌ داغلیدی کی،
او سینیق بیر شوشه‌سیندن‌می اسیر؟
او ایشیقلیق گؤشه‌سیندن‌می اسیر؟
جانیما جان کؤچورور
روحوما شان تؤکولور
یئنه عصیان یارادیر داغلی اورک‌ده
یئنه گوج‌ ترپنه‌جکدیر‌می بیلک‌ده؟
آخی من اؤلموشودوم!
دونیادان دؤنموشودوم!
بلکه تانریم نفسین‌دن دی بو یئل
بلکه عشقین هوسین‌دن‌دی بو یئل
بلکه عیسی دایانیب پنجره‌یه
بلکه مریم هوو دئییب هنجریه‌یه
دوروم آنجاق نه ائدیم من باشلی داشلی
گؤزو یاشلی!
دیلی قانداللی دولاشلی...
کیمه آرخام دایاییم دئ؟
هارا هایلاریمی یاییم دئ؟
هانی اولدوزلو پاییم دئ؟
چیخاجاقدیرمی آی‌ییم دئ؟
منی آلداتماغا أسمیش‌می بو یئل؟
دنیمی دارتماغا اسمیش‌می بو یئل؟
یوخسا آغلاتماغا اسمیش‌می بو یئل؟
بو سرین یئل...
یوخسا قورقود دده‌نین سازدان آسیلمیش سسی‌دیر
آهی‌دیر - ناله‌سی‌دیر
یا کولک‌لرده باتان آغ بیر آتین شئیحه‌سی‌دیر
یادا قافقاز داغینین اؤفکه‌سیدیر...؟!
بو سرین یئل هارالاردان أسیلیر؟
کی قراریم کسیلیر!
آخی من اؤلموشودوم،
سارالیب - سؤنموشودوم.

#مهدی_سربازی_علمداری_آیهان


@qanadli_duyqular

ائشیدتدیم پئشمانسان بو گئتمه‌ییندن
دوشموشم عشقیندن قاییتما باری
ایندی کی گئدیبسن گئرییه دؤنمه
یئنی دن باشلاما کؤهنه قوماری

بئله‌نچی سئوگیدن ایرگنیرم دای
بو ایلک عشقیمده داها بسیم‌سن
آیاغین آلتینا صابین چکدیلر
چوخ دوشدون گومانا دئدین به کیمسن

گول اولوب باغچاندا سارالیب سولسام
ساناما حسرتین منی ایچه‌جک
اؤلسمده ايزيم وار سئوگی یولوندا
خاطیره لر اوره گینی سؤكه‌جک

بیلیردیم کی بیرگون قاییداجاقسان
گؤزلرین ایزیمه سو سپه‌جکدیر
آغلایا_آغلایا منی گؤزله‌ییب
من گله‌ن یوللارا گول اکه‌جکدیر

اونوتما پارکیدا سئوگینی داددیق
سانیردیم یوخلاسام آییداجاق‌سان
شهنازین باشیندا کمربندی ده
دئدیم گئتمه بیر گون قاییداجاقسان


#سهند_اوغلو


@qanadli_duyqular

آیریلیق ماهنی لاری سن گئدلی قالدی تارا
ایندی سنسیز چالینان ماهنی لاریم غملی سارا

ایندی سنسیز کوچه لر هر بیری قارقیش یوکودور
ایندی سنسیز آچیلان هر سحرین رنگی قارا

سن گئدیب سن، دئیه سن لال دی شهر لال دی کوچه
گومانیم تکجه قالیب دیر ساری یارپاقچالارا

گئتمه ییر سن، سنی یوللار آپاریر بلکه گولوم
بلکه یوللارا قالاییر باغریما اونلارجا یارا

من یوباندیم قیناما آه بو یوللار یوللار
منی هر بیر آغاجین دان دؤنه لر چکدی دارا

گئری باخ گؤر گلیرم یوللاری آردینجا سنین
گئری باخ گؤر گئدیشین چکدی منی هاردان هارا

قارا قیزلار دولانیر منله بو یوولار اوزونو
گله نیم یوخ، گئدنیم واردی دئه یین فالچی لارا

چاخماغیم، من، سیغارام، بیز اوچوموز ائولندیک
سئویشیردیک بو اومودلا گئجه لر صوبحه وارا

بو پاییز دان سنه یول یولداشی قالدی، منه ده
پاییز آخشام لاری نین اوسکوره یی قالدی دی سارا



#آتیلا_حاجیزاده



@qanadli_duyqular

قوچلو مئشه ، مارال‌لی داغ
باخار آرازدان اویانا
گور شلاله شاققیلدایار
آخار آرازدان اویانا

أ‌سر بیزلره سرینی
سیلر لاله‌لر ترینی
یاسلی بولود گؤزلرینی
سیخار آرازدان اویانا

دره‌لرین آغزی جیریق
گؤیه قالخیر های - قیشقیریق
کیملرین دریسی فیریق
چیخار آرازدان اویانا؟!

اودا چکیب یوردو یاغی
یانماز بیر ائوین چیراغی
کیم، نه زامان آل بایراغی
تاخار آرازدان اویانا؟

#عقیل_مورادی

@qanadli_duyqular

"ایستینطاق (بازجویی)"

آدین ندیر؟
-آنام، اوزونو قیزارتدی،
اوفوقدان آشا-آشدا
آدین ندیر؟
-آتامی گؤرمه‌میشم
آدین ندیر؟
-منی، اون-اوچ یاشیمدا أره وئردیلر
آدین ندیر؟
-اون-دؤرد یاشیمدا بوشاندیم
آدین ندیر؟
-بیر تنها کیشی وار، ألیندن توتارام هردن
آدین ندیر؟
-اییرمی-دؤرد یاشیم وار
آدین ندیر؟
-یالانچی دئییلم من
آدین ندیر؟
-فاحیشه‌یم...



#چالقین



@qanadli_duyqular

سس دوشدی بیزیم شهره قاچین داغ داشا میللت
سئل قوشدی یاغیش آزقالیر عمانه یئتیشسین

چوخ گوجلودور هیچ زاد دورا بیلمیر قاباغیندا
سرعتله گلیر مرکزی میدانه یئتیشسین

مشغول مناجات اولوب ازبس کی مهندس
وقت ائیله مه‌ییب کوچه خیابانه یئتیشسین

محراب عبادتده دوشوب سجده یه گویا
چوخ آرزولاییر جنته رضوانه یئتیشسین

عرض ایلیری یارب کرم ائت عبد ذلیله
جنتده گئدیب حوریه قیلمانه یئتیشسین

ناکامیدی یوخسولدو چکیب چوخلو فلاکت
لطف ائله اؤزون رتبه شایانه یئتیشسین

یارب وئر اونا عمر غنی قوت بازو
سوریه،فلسطینیله،لبنانه یئتیشسین

گؤندر زورونو .لینچانی یا اینکی جومونگو
گلسین پل دخترله گلستانه یئتیشسین

گؤندر نچه افغانلی مهندس بئل الینده
شیرازدا او دروازه‌ی قرآنه یئتیشسین

وورغون سنی وورسون گؤروم ای ساخسی مسلمان
فریاد و فغانین سنین آلمانه یئتیشسین

میللت سئل ایچنده بوغولور هاردا یاتیبسان
عؤمرون گؤروم الثانیه پایانه یئتیشسین

هر انسانا اوخشار شئیه انسان دئمک اولماز
بیر آزجا شرافت گرک انسانه یئتیشسین

بیرعده تومانسیز دیره‌شیر پالچیق ایچینده
بیر عده گئدیر شاه خراسانه یئتیشسین

رحم ائله‌یه داردا قالان انسانه گرکدیر
هر کیمسه سئویر رحمت یزدانه یئتیشسین

سئلدن قوتولان دوشدو سوغان دردینه افسوس
یوخدور بیری بو وضع پریشانه یئتیشسین

دوش سئلده بوغول قورتولوش آختارما برادر
نوحین گمیسی چوخ قالیر ایرانه یئتیشسین


#اسلام_رزاقی


@qanadli_duyqular

ای منیم دوننکی اینامیم، آندیم
بو گون قوچاق_قوچاق، سنی‌ده داندیم

بوگون باشقا سؤزدور دای ایناندیغیم
باشقا سؤزدن دولور سینه صاندیغیم

دوننکی او باغری قارا قان اولموش
بو گونده تزه-‌دن آنادان اولموش

دونن قارایدیمسا، بوگون آغام من
دونن دره‌یدیمسه، بوگون داغام من

لاغا قویمالی-میش،‌ او دوننکی من
بو گوندن دالی-میش، او دوننکی من

زینه بیر بولاقدیم، دونن جان آتدیم
اؤزومو بو گونون چایینا قاتدیم

چکیلین دره‌لر! چکیلین دوزلر!
صاباحین دنیزی یولومو گؤزلر...



#نادیر_ایلاهی


@qanadli_duyqular

بو شهردن کؤچورم بوخچاما غم باغلامیشام
سو گرک‌میر پئشیمه گؤزلره نم باغلامیشام

آرزولار دوستاغینا الویدالار ، سون هله‌لیک
سئوگی‌‌نین - چارداغینا قاره علم باغلامیشام

ساغ قالین سئوگیلی‌لر ساغ یاشایین سئودالیلار
من کؤنول کعبه‌سینه باشقا صنم باغلامیشام

سانمایین گئتدیگیمه اوزوگونم آرتیق یوخ - یوخ
سورمایین هؤنکورومه بس نییه بَم باغلامیشام

اؤزلمین خسته‌سی‌یم پنجره شاهید سؤزومه
حسرتین نرده‌سینه مین - نئچه شام باغلامیشام

بئزمیشم سئوگی یولوندان داشین آتدیم سینه‌دن
دؤنوشون یوللارینا چیزگی - قلم باغلامیشام

دوتا بیلسم یوکومو عشقیدن آخ - آخ نه‌اولار!
اورییم تاب ائله‌سه هیجره قدم باغلامیشام

پارالانسان دا کؤنول عهده خیانت ائله‌مه
سؤزومون کؤکسونه توتدوقجا منم باغلامیشام

#مهدی_سربازی_علمداری_آیهان


@qanadli_duyqular

روزگار کؤینک کیمی توخویوب منی
ایپلییم قمدندی ناخیشیم حسرت
گؤزلریم بولود تک یاغ‌ها یاغدادیر
قهرلی بولودام چاخیشیم حسرت

توتقون بیرآی اولوب چیخیب باتارام
دردین چرچی سییم کدر ساتارام
دمیر یول اوستونده آخان قاطارام
هله‌ده آخیرام آخیشیم حسرت

منی ائله اییب بو ایری زامان
بد گلیب اقبالیم چکیرم تاوان
قوروموش دنیزم ساحیلی جاوان
دوزلو کفنیمه باخیشیم حسرت

بیر دور مرجانام واریم یاتیبدیر
هر یئتن کؤکومه بیر داش آتیبدیر
زامان اؤزو منی اوجوز ساتیبدیر
عمر سارایینا یاخیشیم حسرت


#سهند_اوغلو


@qanadli_duyqular

بیته‌جکدیر بیر گون ،بو مسافه‌لر
باخیشلار آخیشا دؤنه‌جک اوندا
کؤنولدن کؤنوله سئوگی آخیشی
نیفرتین اوجاغی سؤنه‌جک اوندا

توخوملار تارلادا سونبول اولاجاق
آلاقدان،هرزه‌دن آفت گؤرمه‌میش
آلقیشلار آلاجاق بوتون یوللاری
غمین ساچلارینی سئوینج هؤرمه‌میش

چیخاجاق یوللارا انسان بالاسی
قارداش اولاجاق کسسک داش ایلا
اوندادیر ،چاخاجاق گؤزلرده شیمشک
کیپریکلر دولاجاق اومود یاش ایلا

گله‌جکسن سنده او کؤرپو اوسته
ألینده آل چیچک، کؤکسونده سئوگی
گؤزونده قورولموش سئوگی چکدیگی
اؤلومسوز حیاتدان بیر جانلی سرگی

اینسانلیق اولاجاق دونیایا حاکیم
مردلیک نامردلیگی لاپ أیه‌جکدیر
برابر گزه‌جک یوخسوللا،وارلی
کؤلگه‌لر آغیرلیق ائتمه‌یه‌جکدیر

آجی یادا شیرین بیزله روزیگار
سس‌سیز گئجه‌لرله اؤتوشمکده‌دیر
تلس کی پاییزا بیر شئی قالماییب
آز قالیر... آلمالار یئتیشمکده‌دیر

قارا بولودلارین چیخ آرخاسیندان
اوفوق یوللاریندا انتظارام... گل!
صبیرسیز طالئع‌له جان آتماقدایام
نه تهر ایسته‌سن منده وارام گل


#علی_رشتبر_قاییب

@qanadli_duyqular

گؤزلریمدن بولاق - بولاق
آخان یاش‌لار سیرداشیمدیر
گؤزوم اوسته نَشتَرینی
تاخان قاش‌لار سیرداشیمدیر

کؤهنه دامین سوواقلاری
دؤنکلرین - دوراقلاری
پاییز سئوداسینین قاری
شاختا قیش‌لار سیرداشیمدیر

سنسیز ، قیریق - قریق سؤزلر
قلم - دفتر - قانلی گؤزلر
گئجه - گوندوز دردی اؤزلر،
گؤیلو خوشلار سیرداشیمدیر

حسرت داغین قالخیب ، آشان
اؤزلم‌لردن دولوب - داشان
"ارک"ه بنزر ، دؤشو شان-شان
قاران قوشلار سیرداشیمدیر

#مهدی_سربازی_علمداری_آیهان

@qanadli_duyqular

هر چند قوتولماق هله یوخ دارلیغمیزدان
اما بیر آزادلیق دوغولوب وارلیغمیزدان

وارلیق نه بیزیم تکجه آزادلیق قوشوموز دیر
بیر مژده ده وئرمیش بیزه همکار لیغمیزدان

به-به نه شیرین دیللی،بو جنت قوشو،طوطی
قندین آلیب الهام ایله دیندار لیغمیزدان

دیل آچامادا کارلیق دا گئدر ، کورلوغوموزدا
چون لال‌لیغمیز دوغموش ایدی کار لیغمیزدان

دشمن بیزی ال بیر گؤره،تسلیم اولی ناچار
تسلیم اولوروق دشمنه ناچار لیغمیزدان

هر انقلابین وور- ییخی صون بننالیق ایسته‌ر
دستور گرگ آلماق داها معمار لیغمیزدان

هشیار اولاسوز،دشمنی مغلوب ائده جکسیز
دشمنلریمیز قورخورو هشیار لیغمیزدان

بیرلیک یارادون،سؤز بیر اولار بیز کیشی لرده
یوخلوقلاریمیز بیتدیره جک وار لیغمیزدان



۱۳۵۸ #استاد_شهریار

 

@qanadli_duyqular

کؤرپه قوش کیمی بیر گون گل قاناد آچاق بوردان
یئر سالاق یاماجلاردا، گل اوزاقلاشاق بوردان

هر یانیم قارانلیقدیر ، هر یانیمدا داغلار وار
گل گونش اولوب بیر گون داغلاری آشاق بوردان

بارماغیملا یونموشکن بیر یئنی قفس ، ایندی ...
قوللاریم دیله گلمیش، سسله‌ییر "اوچاق بوردان"

سارقیلی آیاقلاریم آه،قانلی بیر مؤهور اولموش
آتدیمیمدا تصدیق ائدیر،ایستیریک قاچاق بوردان

بلکه ده اؤلوم سنسن، گلمه‌یی چوخ ایستیرسن
بلکه ده آزادلیقسان، دوشموسن قاچاق بوردان

گئتمه‌یی دوشونمک می ، قالماغی باجارماق می؟
یوخسا بیر آخینتییلا بیزده آیریلاق بوردان؟

آه،نه ائتمه‌یی بیلسم،قاچماغی دوشونمم اینان
گئج اولوبدو!! بئي ائتمیش گئتمه‌یی یاساق بوردان

واز كئچرکن اللریم آه ساچلارین‌دا ایتمک‌دن
اون‌اوچون قاچاق دوشموش آینا و داراق بوردان

ای آزادلیغین گونشی، چیخماغا تله‌س بیر گون
گل چؤکن قارانلیغی بیز ایندی قالدیراق بوردان



#میر_شاهین_هاشمی



@qanadli_duyqular