ابا يكتب لي قصيدة وقال لي احردي 😈


سمية...

م حردانة
دايرة قصيدة
ابلغ من كتابة زول
لى زولة بريدة
شايلة محنة
ريحة جنة
وانسام من محطة بعيدة
واقف فيها زول مستنى
والدة تعود
يقبل ايدا
دايرة قصيدة


معااذ...

أظنك .. فالتة منّ الآخرة
جيتي تهوّنيلنا الدنيا
يا لحن السحابة الماطرة
لما يهوّي نيلنا الغنية

انتِ العالَم الداسنّو؟
فيهو قصيدة رايحة أظنّو

انت الحال اذا طاب لينا
حين نسأل نقول كيفنّو

في حضرة "قصيدة .. و انتي"
يتبهروا الحروف و يصنّو

هاكِ قصيدة

سمية..

دايرة قصيدة

طماع قلبي حين يبقالو
من جيهتك حروف جايات
يستنطو الحواس بي روووقة
شان يتبينو الابيات
قول ما شئت
قلبي متاكا
ليك اتنكسو الرايات
ناولني القصيد اشجيني
يا اعذب من النايات


معااذ...


ضليت في سماحتك دربي
متشايل خطاي الحافية
في الليل الخفيف من ضلي
في الريد "بالمعاني الوافية"
معذور حين يموتلك قلبي
رغم نصيبو منّ العافية
انتِ قصيدة قبل تطلّي
ما بنقدر نجيب القافية

تااااني قصيدة


سمية....

تاااني قصيدة ؟؟
لو تقدر يكون ديوان
فاتح في مشارف الروح
ومتمدد علي الحيشان
فيو من كل لحن بديع
لم يخطر علي انسان
فيو حلتنا شارع البيت
ولمة قهوة بين حبان
فيو دربك مجاور دربي
رنة عود معاه كمان

عليك الله
قصيدة كمان 😁



معاذ...

في سالِفْ عصور الفرحة
كان قلبك .. حضارة عريقة
ما ذبلت .. مشاعر وردة
انتي ال كنتي مالكة رحيقها
قامت في البلاد السمحة
ألوانك .. حديقة حديقة
حين طالت عليها القعدة
قلتَ: "أريتها تبقى حقيقة"

(قالت من دواخلك قمحة:
انتي العارفة -فيكي- طريقها
نحن أخفّ منّ الرَّدّة ..
و انتي الأدرى بـــ تحليقها)


انتي الوردة
هاكِ فراش