كاظم اسماعيل الكاطع


مثل الحرير الشعر
وعيونك ملوّنه

والوجه دورة گمر
وشموع راس السنه

ما شبّهك بـ الورد

يذبل بلمسة برد

وانته الي تنطي ثمر
بأربع فصول السنه

النرجس احله ورد
وانته احله من عنده

شامات الك بـ الوجه
وحده احله من وحده

لعيون بيها سحر

تشبه قصيدة شعر

صوتك موسيقى ونغم
منّك عرفت الغنه

صوتك بلابل صبح
وعيونك تغني

والناس ما صدّگت
بـ الحب تبادلني

لمّن يطل الوجه
الكل علي تنتبه
ولو يوم ما نلتقي
يومك يمرّ بسنه

..