NLD ပါတီ၏ မူဝါဒအတိုင်း ပြည်တွင်းတွင် ရပ်တည်နေသူများ ရှိသေးသည်ကို ဒေါ်အောင်ဆန်းစုကြည်က ကျေနပ်ကြောင်း အမူအရာပြခဲ့သည်ဟု ဒေါ်စန္ဒာမင်း ထုတ်ဖော်ဖွင့်ဟ

သုတကျော် (NP News) - ‌အောက်တိုဘာ ၂၁

NLD ပါတီ၏ မူဝါဒအတိုင်း ပြည်တွင်း၌ ရပ်တည်နေသူများ ရှိသေးသည်ဟု သတင်းစကားပေးရာတွင် ဒေါ်အောင်ဆန်းစုကြည်က ကျေနပ်ကြောင်း အမူအရာပြခဲ့သည်ဟု ငြိမ်းချမ်းရေးနှင့် ဖက်ဒရယ်ဒီမိုကရေစီ ဖော်ဆောင်ရေးအစီအစဉ်၊ မြန်မာ့နိုင်ငံရေး အကျပ်အတည်းနှင့် တိတ်ဆိတ်နေသောရပ်ဝန်း စကားဝိုင်း ဆွေးနွေးပွဲ၌ ဒေါ်စန္ဒာမင်းက ပြန်လည်ထုတ်ဖော် ပြောကြားခဲ့ သည်။
ပြီးခဲ့သည့် (၂၀၂၂)ခုနှစ် နိုဝင်ဘာလအတွင်းက ဒေါ်စန္ဒာမင်းနှင့် ဦးတိုးလွင်တို့က ဒေါ် အောင်ဆန်းစုကြည်နှင့် တွေ့ခွင့်ရခဲ့ကာ ထိုသို့တွေ့ဆုံခဲ့ရစဉ်က အခြေအနေတစ်ခုကို ဒေါ်စန္ဒာမင်းက ယခုအခါ ပြန်ပြောင်းပြောကြားခဲ့ခြင်း ဖြစ်သည်။
ပါတီအနေဖြင့် တွေ့ဆုံဆွေးနွေးရေး၊ အမျိုးသားပြန်လည်ရင်ကြားစေ့ရေး၊ ငြိမ်းချမ်းစွာဖြင့် အသွင်ကူးပြောင်းရေး နှင့် အထွေထွေသဟဇာတဖြစ်ရေးဆိုသောမူဝါဒများကို အခြေခံကာ NLD ပါတီကို ဖွဲ့စည်းတည်ထောင်ခဲ့ခြင်း ကြောင်း သိရသည်။
“(၂၀၂၀) ရွေးကောက်ပွဲမှာဆိုရင် ဒေါ်အောင်ဆန်းစုကြည်က ရွေးကောက်ပွဲရဲ့ကြေညာစာတမ်းမှာတောင် သေသေ ချာချာရေးထားတာရှိတယ်။ (၂၀၂၀) ရွေးကောက်ပွဲကိုဝင်မယ့် လွှတ်တော်ကိုယ်စားလှယ်အကုန်လုံးသည် ပါတီရဲ့ရွေးကောက်ပွဲ ကြေညာစာတမ်းကို ကြေညာထားရတယ်။ ပြည်သူကိုလည်း ချပြရမယ်။ ဒါဟာ ဘာလဲဆိုရင် ဒေါ်အောင်ဆန်းစုကြည် ရေးထားတဲ့အချက်တစ်ခုရှိပါတယ်။ မည်သို့သောအခက်အခဲအကျပ်အတည်းကို ကြုံတွေ့ စေကာမူ ငြိမ်းချမ်းသောနည်းနဲ့ပဲ ဖြေရှင်းရမယ်ဆိုတဲ့အချက်က ပါထားပြီးသား။ ဒီအချက်ကိုပဲ ကျွန်မတို့က စွဲကိုင် တယ်။ ဒီအချက်ကိုယုံကြည်တယ်” ဟု ဒေါ်စန္ဒာမင်းက ဆိုသည်။
အခြေအနေတစ်ခုရောက်လျှင် မူဝါဒပြောင်းလဲရမည်ဆိုသူများအတွင်း NLD ပါတီမှ လူကြီးများလည်း ပါဝင်ပြီး ပါတီ၏ မူဝါဒနှင့် ကွဲလွဲကာ လက်နက်ကိုင်လမ်းစဉ်ကို လိုက်သွားသူများလည်း ရှိနေရာ လက်နက်ကိုင်လမ်းစဉ်ကို လိုက်သည့်အတွက်မှားသည်ဟု မပြောလိုဘဲ ကိုယ်တိုင်ယုံကြည်ရာ၊ ယုံကြည်ချက်ဖြင့် သွားကြခြင်းဖြစ်ကြောင်း၊ ပြည်တွင်းတွင် ရပ်တည်နေရသူများမှာမူ ယုံကြည်ချက်အတိုင်း ရပ်တည်၍မရဘဲ ယုံကြည်ချက်အတိုင်းပြောဆို ပါက ခြိမ်းခြောက်မှုများ ရောက်လာကြောင်း ၎င်းက ဆိုသည်။
“ပြည်တွင်းမှာလည်း ပါတီရဲ့မူဝါဒအတိုင်းရပ်တည်နေတဲ့ သူတွေရှိပါတယ်ဆိုတာကို နစကသိအောင် ကျွန်မတို့တွေ ဆွေးနွေးတာရှိပါတယ်။ ဒီလိုဆွေးနွေးတဲ့အတွက် နစကဘက်ကလည်း NLD မှာ ပြည်တွင်းမှာလည်း ပါတီရဲ့ မူဝါဒအတိုင်း ရပ်တည်နေတဲ့သူတွေ ရှိတယ်ဆိုတာကို အသိအမှတ်ပြုတာဖြစ်တဲ့အတွက် ပါတီဝင် သန်းပေါင်း မြောက်မြားစွာ ရှိပါတယ်။ ဒီသန်းပေါင်း မြောက်မြားစွာရဲ့အခြေအနေတွေကို ကျွန်မတို့ကယ်တင်နိုင်တဲ့ အခြေအနေရှိတယ်။ ဘာလို့လဲဆိုတော့ ဒီပါတီဝင်ပေါင်း မြောက်မြားစွာက တစ်ဖက်ကို ထွက်ပြေးဖို့ အခြေအနေမ ရှိဘူး။ တစ်ဖက်ကို ထွက်ပြေးတယ်ဆိုတာက လူအများစု မဟုတ်ဘူး။ ပါတီအဖွဲ့ဝင်ရဲ့ သုံးပုံတစ်ပုံ မရှိဘူး။ ဒါပေမဲ့ ပြည်တွင်းမှာ ကျန်ခဲ့တဲ့ ပါတီအဖွဲ့ဝင်တွေက ပိုများတယ်” ဟု ဒေါ်စန္ဒာမင်းက ဆွေးနွေးပွဲ တွင် ပြောသည်။
ပါတီခေါင်းဆောင်ဖြစ်သူ ဒေါ်အောင်ဆန်းစုကြည်ကို တစ်ကမ္ဘာလုံးက တွေ့လိုနေကြသော်လည်း အမှန်တကယ် တွေ့ခွင့်ရှိသူများမှာ ပါတီ၏တာဝန်ရှိသူများဖြစ်ကြောင်းကို နိုင်ငံတော်စီမံ အုပ်ချုပ်ရေးကောင်စီကသိပြီး ကိုယ်တိုင်က သဘော ပေါက်ကြောင်း ၎င်းကဆိုသည်။
“ဒီကိစ္စကို တော်တော်နဲ့ သဘောမပေါက်တာက ပါတီမှာရှိတဲ့ တချို့သော ခေါင်းဆောင်တွေက သဘောမပေါက် ဘူး။ အဲဒီလိုပဲ တစ်ဖက်ကို ထွက်ပြေး သွားတဲ့သူတွေက သဘောမပေါက်ဘူး။ အဲဒီအချိန်မှာ ကျွန်မတို့က ဒီအချိန်မှာ ပါတီမှတ်ပုံတင်တွေ မပျက်သေးဘူး။ ကျွန်မတို့ပါတီရဲ့ခေါင်းဆောင်အခြေအနေကို သိဖို့လိုတယ်။ ကျွန်မတို့ ပါတီရဲ့အခြေအနေကို သိဖို့လိုတယ်ဆိုတာဖြစ်တဲ့အတွက် ကျွန်မတို့ ပါတီဝင်တွေဟာ ဒေါ်အောင်ဆန်းစုကြည် ထိန်းသိမ်းခံနေရစဉ်မှာ တွေ့ခွင့်ရမယ့် အခွင့်အရေးရှိရမယ်ဆိုပြီး နစကကို တင်ပြတောင်းဆိုတယ်။ အဲဒီ အတွက် လည်း ကျွန်မတို့တွေ့ဆုံခွင့်ရခဲ့တယ်။ တွေ့ဆုံဖို့ အခွင့်အရေး ရခဲ့တယ်။ ဒါကြောင့် ကျွန်မတို့ ဒေါ်အောင်ဆန်းစု ကြည်ကို သွားတွေ့ခဲ့တယ်။ သွားတွေ့ တဲ့ အချိန်မှာလည်း ကျွန်မက ဒေါ်အောင်ဆန်းစုကြည်ကို သေသေချာချာ ပါတီရဲ့အခြေအနေကို ရှင်းပြနိုင်ခဲ့တယ်။ အဓိကကတော့ ဘာကို ရှင်းပြနိုင်ခဲ့တာလည်းဆိုတော့ အဓိကက ကျွန်မတို့တွေက ပါတီထဲမှာ ပြည်ပကို ထွက်ပြေးသွားတဲ့သူတွေ ရှိသလို ပြည်တွင်း မှာလည်း အန်တီထောက်ခံတဲ့ ပါတီမူဝါဒ အတိုင်း ကျွန်မတို့ ရပ်တည်နေတဲ့ အုပ်စုတွေ ရှိပါတယ်လို့ ပြောလိုက်တဲ့အချိန် ဒေါ်အောင်ဆန်းစုကြည် မျက်နှာက အရမ်းကျေ နပ်သွားတယ်။ ကျွန်မကို ခေါင်းလေး ညိတ်ပြတယ်။ ဒါကို ကျွန်မပီတိအဖြစ်ဆုံးပဲ” ဟု ဒေါ်စန္ဒာမင်းက ပြန်ပြောင်းပြောပြသည်။

https://t.me/sitthmue1500/60