Sen daryosan
Go‘zal Begimga
Sen daryosan, tashna bu olam,
Tashrifingni intizor kutgan.
Oqib o‘tsang, qadam- baqadam ,
Izlaringda rizvonlar bitgan.

Sen daryosan,og‘am Kultegin,
Ot sug‘organ ketarkan jangga.
Bir hikmating bilaman lekin,
Qaytmagansan hecham orqangga.

Sen daryosan, shoh Jaloliddin
Ot solganda quchib yupatgan.
Vatan otlig‘ oriyat uchun,
Gullar tutgan, chechaklar otgan.

Sen daryosan, mavjlaring- asov
Ushshoq qilgan alpomishlarni.
Asraganing sandiqda olov,
Behush etgan kuntug‘mishlarni.

Sen daryosan, avaylab- asrab,
Mohimlarga Tohirni eltgan.
Isyon qilsang ,mavj urib,Yo Rab,
Ko‘ngullarga to‘fonlar ketgan.

Sen daryosan , uzoq azaldan,
Hur abadga o‘zin chog‘lagan.
Vatan tutib " bir juft g‘azalda",
Daryolarga ilinj bog‘lagan.

Sen daryosan, gul ochgay o‘tsang,
Cho‘llab yotgan,qaqroq manzillar.
Sen Ertaga chamanlar tutsang,
Jonim qo‘shib men tutgim kelar.

Sen daryosan, bu saodatni,
Dalli daryo bo‘lgan biladi.
Shivirlasang nur -qiroatni,
Men- da daryo bo‘lgim keladi.

Sen daryosan ,daryoman men ham,
Hayrat bilan boqadi dunyo.
Kel, bo‘laylik bir- birovda jam...
Bog‘lab tursin ...ko‘rinmas daryo..

Sen daryosan- Go‘zaldaryosan,
Sen daryosan-
Begimdaryosan...



Durposhsho