څه په خوښیو خوشحالیوکې روان وخت ؤ
څه د سکون او رنګینیو اطمنان وخت ؤ

اوس هغه تېر وختونه تېرې خاطرې ږغوم
څه په خندا ؤ کې پوښلی قدردان وخت ؤ

اوس مې د زړه له سره درومې سرې لمبې د هجر
څه د وصال شیبوکې نغښتی مو هرآن وخت ؤ

په رحمتونو به لامده شوو سره دواړه دواړه
نری شمال به لګېدو هم د باران وخت ؤ

خیال به مې ښکلی ؤ مزاج به مې هم ؤ برابر
نه تهمتونه ؤ نه فرېب د ښه ګمان وخت ؤ

بس مهاجره ژوند د مینې ؤ په مینه تېر شو
شاعرانه ژوند ؤ د مینې د قربان وخت ؤ