🍋LIMON KASALLIKLARI🍋
Sitrus o‘simliklari ko‘pincha soxta qalqondor, o‘simlik bitlari, kanalar bilan zararlanadi. Qalqondorlarga qarshi 0,3% li Fazolon eritmasi 5-6 kun oralatib 2 marta purkaladi. Karate preparatini 0,3% li qilib sepsa ham bo‘ladi. Bunda o‘simlikning hamma qismini, ayniqsa, barglarini pastki tarafidan ho‘llash zarur.
O‘simlik g‘unchalagan va gullagan davrida purkash mumkin emas. Ishlov ertalab va kechqurun yoki bulutli kunlarda o‘tkaziladi.
Qora kuyasimon zamburug‘lar barglar yuvilganda ketmaydi. Barglar 1% li Bordo suyuqligi eritmasi yoki 0,5% mis, xlor oksidi eritmasi bilan qo‘shimcha purkalgandagina xolos etadi.
O‘rgimchakkanaga qarshi 0,2% li Keltan yoki 1% li Danitol eritmasini purkash yaxshi samara beradi. Vaqti-vaqti bilan yuvib turish ham foydali.
O‘simlik tanasi gommoz yelim oqish bilan kasallanganda, kasallikning ilk bosqichida shikastlangan po‘stloq qismi va yog‘ochi sog‘lom qatlamgacha kesib tashlanadi. Bundan so‘ng tozalangan joy 3% li mis kuporosi bilan dizenfeksiya qilinadi va bog‘ qatroni bilan shuvaladi. Qatron tayyorlash uchun kanifol va asal ari mumiga (2:1) oz miqdorda mol yog‘i qo‘shib eritiladi.
Gommoz bilan zararlangan va qurigan daraxt tanasi atrofi ildizi bilan qazib olinib yondiriladi, tuprog‘i esa 1% li Formalin eritmasi bilan dizenfeksiya qilinadi.
Gommoz daraxtlardan va o‘tsimon o‘simliklardan yelim oqish kasalligidir. U asosan danakmevali daraxtlarda, sitrus mevalarda hamda g‘o‘za va kunjut o‘simliklarida ko‘p uchraydi. Tajribada ko‘rilishicha limon daraxtidan yelim oqish kasalligi ko‘proq yerga chiritilmagan mahalliy o‘g‘itni meyyordan ortiq solish oqibatida kelib chiqadi. Vaqtida e’tibor berilmasa daraxt sekin-asta quriydi.
Limon mevalari to‘kilib ketishining sababini aniqlash ancha mushkul. Havo haroratining keskin ko‘tarilishi, kerakli moddalarning yetishmasligi, vaqtida sug‘ormaslik kabi sabablar bo‘lishi mumkin. Limon mevalarini saqlab qolish uchun, yerni ammofost, kaliyli va fosforli o‘g‘itlar hamda chirindilar bilan ishlash, vaqtida sug‘orish kerak.
@Bogdorchilik_kochatlar
