Аввалроқ Президент Шавкат Мирзиеёв ҳам ўз нутқида Чирчиқлик бемор ўзида касаллик аломатларини сезган бўлса ҳам анча кун давомида шифокорларга мурожаат қилмасдан касалликни яширгани, бунинг натижасида оғир аҳволга тушиб қолгани, ҳозирда унинг аҳволи ўта оғир даражада эканлигини айтган эди.
Марҳум юртдошимизни Аллоҳ ўз раҳматига олган бўлсин, яхши амалларини бирга қилсин. Яқинларига сабр-тоқат тилаймиз.
Илтимос, ҳурматли юртдошлар, ўзингизда коронавируснинг илк аломатларини (йўтал, иситма, нафас қисиши, шамоллаш ёки гриппга ўхшаш симптомлар) сезсангиз, унда дарҳол уйингизга тез тиббий ёрдам чақиринг.
Ўтиб кетади, тузалиб кетаман, ўзим уйда даволанаман, қўй ёғидан суртиб, исириқ тутатаман, деган хаёлларга берилманг, илтимос, Худо хайрингизни берсин.
Касаллик аломатларини сезсангиз, қўрқманг.
Карантинга олинаман, ваҳима бўлади, анализ олса оғрийди, даволанишга ётсам қийналаман, деган фикрларни миянгиздан чиқариб ташланг. Бу каби ноқулайликлар ёки Сизнинг наздингиздаги қийинчиликларнинг барчаси тирик қолишингиз учун арзийди. Ўртага ҳаётингиз тикилганини унутманг.
❗️
Яна бир бор таъкидлаймиз, касаллик аломатларини сездингизми, дарҳол тез тиббий ёрдам чақиринг, жонингизни гаровга тикиб, таваккал қилманг.@EldorTuroxonov
