AQShda oliy ta'lim olishning 6 ta o'ziga xos xususiyatlari
Ko'chirish yomon, xato qilsa bo'ladi
AQSh universitetlarni deyarlik barcha reytinglarda eng yuqori o'rinlarni egallashgan. Dunyodagi eng bilimli va iste'dodli o'quvchilar aynan Amerika o'qishlarida o'qishni xohlashadi. Buning siri nimada va AQSh universitetlari qolgan joylardan nimasi bilan ajralib turadi?
Baholash tizimi
Amerika OTMlarida baholash tizimi aniq mezonlarga asoslanadi. Misol uchun, darslarga kelishingiz uchun 10%, darslarda faol qatnashishingiz uchun ham xuddi shuncha ball beriladi. Umumiy ballingiz 15% testlarda olgan natijalaringiz va 30% imtihondagi baholaringizdan tashkil topadi. Qolgan 35% ballingiz kurs ishiga olgan ballingizdan kelib chiqadi. Kurs uchun olgan ballingizni hisoblashda mana shu barcha tarkibiy qismlar inobatga olinadi.
Ko'chirish (plagiat)ga munosabat
Amerika OTMlarida ko'chirish o'ta xavfli va qiyin. Qo'shni partaga ko'z tashlab qo’ysangiz ham ko'chirgan deb hisoblanadi. Biror joydan to'rtta so'zni olib, manbani ko'rsatmasangiz yoki noto'g'ri ko'rsatsangiz, bu ham plagiat deb baholanadi. Maxsus dasturlar yozma ishingizni o‘zingiz yozganmisiz yoki boshqa manbadan olganmisiz tekshirib beradi. Ko’chirganingiz aniqlansa, har bir ta’lim muassasasida maxsus komissiya kuzatuvi asosida, o’sha kurs uchun sizga “ikki” qo’yiladi. Yana shu ishni qaytarsangiz, o’qishdan chetlatilasiz.
O'qituvchilar va talabalar o'rtasidagi tenglik
O'qituvchilar dars vaqtida talabalar bilan muhokamalar o’tkazishni va ularga nisbatan o'zlarini teng darajadagi tutishni yaxshi ko'radilar. Hech qaysi o’qituvchi talabadan, masalan, u bilan tik turgan holda salomlashish kerakligini talab qilmaydi. Bu hattoki hech kimning xayoliga ham kelmaydigan holat. Ba'zida o’qituvchilar bilan o‘tirishlar yoki uchrashuvlar tashkil qilib turiladi.
Xatolarni tushunish
O'zbekistonda xato yoki noto'g'ri aytilgan gapingiz qolganlar orasida sizga nisbatan tanqidiy munosabatni keltirib chiqaradi. Bizda gapirayotgan odam biror xato qilib qo’ysa – xuddiki katta gunoh ish qilganday o’zini his qiladi. AQShda esa aksincha, noto'g'ri gapirib qo’ysangiz, bu o’qiyapti, o’rganyapti, izlanyapti deb baholashadi. Bizda tinglovchilar xuddiki xato qilishingizni kutayotgandek tuyulsa, AQShda sizni hamma qo’llab-quvvatlayotganini his qilasiz. Odamlar sizning muvaffaqiyatga erishishingizga, hammasi yaxshi bo’lishiga chin dildan ishonishadi.
Moliyalashtirish
AQShdagi ko’plab universitetlar o’z mablag'larini xayr-ehson fondlari orqali topishadi. Bu ko’pincha xususiy xayriya mablag'lari bo’ladi. Amerika universitetlarini tamomlagan va muvaffaqiyatga erishgan bitiruvchilar ixtiyoriy ravishda o’z mablag'larni qo'llab-quvvatlash fondiga o'tkazadilar. Ushbu mablag'lar universitetlar tomonidan zamonaviy laboratoriyalar bilan jihozlash va iqtidorli talabalar uchun stipendiyalar ajratishga sarflanadi.
Qadriyatlar
Qo'shma Shtatlardagi o'qishlar talabalarga o’z fuqarolik pozitsiyalarini shakllantirishda yordam beriladi. G'arb universitetlari o’z fuqarolik huquqlarini himoya qila oladigan o’quvchilarni yetishtirib chiqaradi: tanqidiy fikrlashga va dunyoga boshqacha nazar bilan qarashga, tarixni qayta ko'rib chiqishga o'rgatishadi. U yerda turli mamlakatlar talabalari bilan uchrashasiz. Ular bilan tanishish ularning madaniyati, siyosati va ijtimoiy jarayonlari haqidagi tushunchalaringizni kengaytiradi.
|
Instagram |
Telegram