#قصيدة_الخدمه
حيرتني عليك شكتب شحجي لمصابك قصيده
سيدي الخادم يكيف يقرا كدامك جديده
السلام عليك يا حبيبي يا حسين
*********جددت نيتي وسلمت للباري ربي المعبود
بالمجلس ارزقني الدمع والمهدي حتما موجود
مو شاعر واكتب الك سويني عبد الرادود
شنهو انه وعليه انطلق بالمجلس اسم الشادود
سيدي املكني عبد ... عن مجلسك ما ابتعد
احسبني عبدك يابوسكنه عليك مو كلش بعيده
سيدي الخادم يكيف يقرا كدامك جديده
السلام عليك يا حبيبي يا حسين
******بالنيه مصباح وجرح والخيمه تنزف نجمات
يالتارس عيوني ضوه باخل عليك بدمعات
ياحسين يارب العشك شنوصفك بيا جلمات
وانت الحمام بخيمتك يكشخ بروحه من ايبات
مفضل هواي هواي.... عالماي يالتسوه ماي
ياهو مثلك عنده مبدأ ضحه للعالم وريده
سيدي الخادم يكيف يقرا كدامك جديده
السلام عليك يا حبيبي يا حسين
******يالنشفت ريجك غفل ياهو الذي بهالحاله
مثلك فلا شايف بشر يبجي الذنب جتاله
يتعثر بجفي القلم لو هاي اجت بخياله
صعبه اكولن عالورق راحت سبايه عياله
جرحك اتلجمه خيام... وبدمه عزب لشام
يعينك اللله شلون تحمل والحرم راح بعيده
سيدي الخادم يكيف يقرا كدامك جديده
السلام عليك يا حبيبي يا حسين
************انت الكريم اعله الكرم حاتم شنو وانجله
ياهو الذي بي نفتخر اليذبح فرس لو طفله
الينطي عبدالله الورد هاي البشر شتكله
ياحسين بس دربك عذب واهل العشك تندله
يالخضرت بيك اجروح... بالمجلس الغيره تفوح
ما شفت واحد يقدم للسهم طفله اعله ايده
سيدي الخادم يكيف يقرا كدامك جديده
السلام عليك يا حبيبي يا حسين
************تسليمة اجروحي بعشك باخر فرض باحساسك
يالما طحت طايح الك فوك النهر عباسك
الف وتسعمية بخت من جدمك لحد راسك
فاتحهن وتنظح هلا بالمجلس لكل ناسك
يالتكرم نعرفك ترى... منطي سبع عالكنطره
خيرك علينا يتطشر وانت بالمجلس تعيده
سيدي الخادم يكيف يقرا كدامك جديده
السلام عليك يا حبيبي يا حسين
***********سيد احمد الميالي
تم بفضل الله تعالى والحسين
https://t.me/ahmed_sa6
