قناة الشاعر علي حسين الكناني

لسان حال الامام الحسين ع يخاطب الانصار

أناديكــم و لا اســــمع
جواب يسَّكت المدمع
بچيتلكم دمع غالــــــــي لفگـــــد غالي
و نَحَّب ميموني من هضمي و بچه لحالي
يالانصار يالانصار
ـــــــــــــــــــــــــــــــــــــــــــــــــــ
رحتوا و راحـــــت انفاسي
كسرتوا ظهري و احساسي
طيحتكـم مثـــــل طيحت
راعــــــــي الكلفة عباسي

يعــــــز و حيل يجرحني انادي و مــــــا تردون
يمـــــن چنتولي واحـدكــم شايلــــني بالعيون
يفرسان الصَفه اتـــنـــخه و لا چنكم تسمعون
و تسمعون اطلب الناصر عجيبة و ما تفزعون

باساميكــم أون و الهَج
و جثثكم عالارض ترتَج
حِنيت و ضلـــــــــعي مَحني الكــم اگبالي
و نَحَّب ميموني من هضمي و بچه لحالي
يالانصار يالانصار
ـــــــــــــــــــــــــــــــــــــــــــــــــــ
دمعـــــــتي صارت ابطـولي
دريتــــــوا بيـَّه گلـــــــــولي
نحبت اعليكـم لحــــــــدما
سيفي و درعـي ناحـــــولي

حتى العِمَّة البراسي لكســــرتي صَبَّت ادموع
و لا حاسبكم اصحابي چنت حاسبكم اضلوع
لو واحد وگع منكـــــم اركــض لجــله مفزوع
اشوفه يلوع و استشعــر گلــبي بداخلي يلوع

جمر دهـــري ايا ويلي
حِرَّگ بيكم خيم حيلي
قبل لا نارهم تسعـــــــــر عله اعيـــــــــالي
و نَحَّب ميموني من هضمي و بچه لحالي
يالانصار يالانصار
ـــــــــــــــــــــــــــــــــــــــــــــــــــ
مثلكم عنده مِنْ مثلي
ماشيتوني چــــن ظِلي
لبستوا گلوبكم بالطف
فوگ دروعكـــم لجـلي

دوه جروحي و نظر عيني و نعم مــــن عدكم انصار
ابــــوذر بيكـــــم أتفاخر و سلمــــــــــان أويه عمار
بسالة مالـــك الاشتـــر تجــــــــــــري بدمكم الحار
غِيـــرة سيوفكم تلمـــع مثــــــــــــل لمـــعة الفقار

كسرتوني أشـــــد كسرة
و فجعتوا فاطمة الزهرة
بوجهي الحسرة بانْت حــــــــــــتى بخيالي
و نَحَّب ميموني من هضمي و بچه لحالي
يالانصار يالانصار
ـــــــــــــــــــــــــــــــــــــــــــــــــــ
مـــن رحتـــــــــوا ياسبعيني
وِذَر لَمّـــــــيتها ابنيـــــــــني
الاكبر ياهـــــــــو مـن جاسم
بعـد مـــا فَـــــــــرزِنت عيني

ثگيل إبني علي و شفته من كثر السحگ خاف
اشيلن بيدي خاصـــرته يـــــوگع مني الاچتاف
ابساعة زفته القاســـم آجاله المــــــوت زَفَّاف
بعده بأول اسنينه و لَسَه كلــــــشي مــا شـاف

بدمــــع رمــلة تحنيله
و عله الاكبر عمت ليلة
عليهن دمعي مــــــــــاي و دم صفه يلالي
و نحب ميموني من هضمي و بچه لحالي
يالانصار. يالانصار
ـــــــــــــــــــــــــــــــــــــــــــــــــــ
عضيدي الهـــــــــزلي راياته
مــــا رد اعــله خيمـــــــــاته
تِاخَر و الهـــــــــوى العـــالي.
رد اعلـــيَّه ريـــــــــشـــــاتـه

رحت صـوب الشريعة انزف فاگد روح الاحساس
شفتها اعمامـــــــــتي انسلبت لمــن طاح عباس
نعمة شلون تتگطـع كـــون اچفــــــــــوفه تنباس
واحدهن مثل صـــدري عليه بالحـــــــافر انداس

صرت يَمَّه ادگ و انحب
شگللها بعــــــــد زينــب
عَمود الخيمة من عامــــــــوده إجه ابالي
و نَحَّب ميموني من هضمي و بچه لحالي
ـــــــــــــــــــــــــــــــــــــــــــــــــــ
و الاكلـــف عليَّ و اصعب
على اعيالي الخيم تنشب
و انه اعـــــله الرمح راسي
ابنيتي ارقـــــــية تتسلب

الحوافر نامت ابضلعي مــــــن نمتوا يالاصحاب
سلبـوا محـــــبسي منايدي و سلبوا مني الاثياب
لحيتي ابدمي خضـــبوها و رمل ترسوها و تراب
و زينب ركبــت الهَزلة و حِدَّه ناگتها ســــــــلاب

بناتي فزعـــــن بهيمة
عليهن ما بقت خيمة
سنابك خيلـــهم سحگـــــــت عله اطفالي
و نَحَّب ميموني من هضمي و بچه لحالي
ـــــــــــــــــــــــــــــــــــــــــــــــــــ
الحمدلله
علي حسين الكناني

ام البنين تخاطب الحسين ع 5

امنياتي.
عالهزل اركـــــــــب اســــيرة
حالي مــــــن حال الأمــــيرة
انــــدفن تالي ابحصــــــــيرة
امنياتي
ــــــــــــــــــــــــــــــــــــــــــــــــ
چانت امنيــتي قبل لا عني تمشون
حافية وَياكم امشي بذيـچ الضعون
شايَّلة سكنة و رقية بنـــص العـيون
و اباديه گايدتها نـــــــاگة ام عــون

لكربلائك.
لو وصــــــلنا اخـــدِّم بنــاتك
و اكنَّس الخيـــــمة لــخواتك
يُمة و اغسَّــــــــــــلك عباتك
امنياتي. امنياتي
ــــــــــــــــــــــــــــــــــــــــــــــــ
امنيات ابالي چانــــت كلش اهوواي
وحدة منهن يُمة أوزع الكــــم الماي
و ثاني وحدة من تصلي اوگف افياي
و امد سجادة لصلاتك شـــيلتي هاي

و گلبي يوگف
سمعاً لحُبك و طاعة
درع فاتحـلك ذراعه
من تصلي بالجماعة
امنياتي.
ــــــــــــــــــــــــــــــــــــــــــــــــ
ابالي أتحــول هوه من تطــــلب انفاس
و انه اصيرلك ظــــهر لو طـــــاح عباس
گبالك اوگف لابسه درع ابني و الطاس
و ما اخلي شعــــرة منـك و الله تنجاس

و لا اخلي
حجر يوصل يم جبينك
و لا رمــل يأكلها عينك
خنصرك يبقه بيمينك
امنياتي.
ــــــــــــــــــــــــــــــــــــــــــــــــ
امن العطش عبدالله ما تسمع صياحه
الجربة اترسها بدمـــــوعي المُستباحة
علي الاكبر بيدي اضــــــمّدلك جراحه
و زفة القاســــم تصــــــــير ابلا مناحة

لجل رملة
جاســـم انحــنيله ايـده
حنَّة مو دم مــن وريـده
و للـفرح نقره القصيدة
امنياتي
ــــــــــــــــــــــــــــــــــــــــــــــــ
الشام ما يحرگ گلــب زينب عذابه
و ما تنام ارقية بنتـك عــــــــالترابة
للستر ادعي و دعوتي مُستـــــجابة
تمَّطر الدنية عِبَّي فــــــوگ الخرابة

ارفع ايدي.
و ادعي ربي يدزلي غيمة
تنصب فـــــــوگانه خيمة
ابلا غطه متظـــــل يتيمة
امنياتي.
ــــــــــــــــــــــــــــــــــــــــــــــــ
الك أُمنيتي الاخيرة اختصــــــــرها
كون زينب سـوط ميورم ظهــــــرها
لا هزيلة و لا سبي تشـــوف بعمرها
و سالمة اترد للمدينة بظـل خدرها

لدار اهلها
ترجع بعـــــــــــزة وليها
حبل مـا ملتــــف عليها
و لا سياط مگطعة اديها
امنياتي
ــــــــــــــــــــــــــــــــــــــــــــــــ
الحمدلله
علي حسين الكناني

السيدة ام البنين ع تخاطب الامام علي ع


شكراً جزيلاً يا عــــــــــلي زوجة اطلبتني
شرفَّت ناسي و كل هَـــــلي. لمن خـــذتني
فضلك ابد ما أنـــــساه
يابا الحســـن اي و الله
لمن خذتني. لمن خذتني
●●●●●●●●●●●●●●●
آنه ابعِـــــــلم لو لا حلــــــم
يا محله هاي القسمه
زينب و الحسين و حـــسن
ينادونـــي گامـوا يُمه
بالگاع مدفــــونة چنـــــت
و هسه إوصَلت للقمه
وحده آنه من عدكم صرت
ما تنوصف هالنعمه


قنبر كبل عنــــــــــه گلَّت يا محله حضـه
وهوايه احسدها چنت عالخدمه فضه
اشكر عقيل و مَسعاه
يابا الحسن اي و الله
لمن خذتني لمن خذتني
●●●●●●●●●●●●●●●
طير السعد فوگي ارتفع
بذيچ المســـيه الحلوه
بيتك فتحته و گلتـــــــلي
دخليله ي ام النـــخوه
إتلَگوني عزوة فاطمــــــه
بذاك الكــلام الــيسوه
الدار دارچ يا هـــــــــــلا
و يا مرحبا بكل خطوه


اتفضلي گلي الحـــــسن. و دموعه بالعــــين
و عيوني وياه دم جَرَّن. من شفت الحسين
سالن عيوني ابملــگاه
يابا الحـــسن اي و الله
لمن خذتني. لمن خذتني
●●●●●●●●●●●●●●●●
وَصَّيتني و انه گــــــلت
اولادك ابنص عيني
و ان قصرت مالي عذر
و لذمة لا تبــــريني
ام البنين امـــــــــروتك
گتلك علي سمــــيني
لمن تگلي فاطـــــــــمة
ينكسر گلب احسيني

و لو سئلتك يابو الحمة. زينب الحرة
گلها جبتها خادمــــــــة. بداعة الزهره
لام الخــــــــدر وا ويلاه
يابا الحســــن اي و الله
لمن خذتني لمن خذتني
●●●●●●●●●●●●●●●●
اول دخولي لمــــــنزلك
شمَّيت بي ريحة ياس
امن الزهره ثاري بكل ركن
موجوده ظلت انفاس
حاچيتني عـــن كـــــــربله
و گِلتِلك يا عــز الناس
لحسين اخلفلك اســـد
و يلوگله اسم العباس


سبــحه اجتني ومَقنعَه منك هديه
و آنه وعــــدتك باربعة. للغاضــريه
واحدهم يشيل الواه
يابا الحسن اي و الله
لمن خذتني لمن خذتني
●●●●●●●●●●●●●●●
يَمِّي الك حيدر ولـــــــــــد
وگت الكــــلافة امجَرَّب
بصلبك اشوفه و يستعـــــد
لو منه مـــرَّت زينــــــب
عبـاسي باچــــــــــــر عالنهر
فوگ المُهر لو ضهضَّب
يابا الحـــــــسن حتى الهوه
من زينـــــــبك ما يگرَّب

أمِّن على ابنيتك بــــــعد صار الـــــها كفَّال
لا صوط يوصلها وعـــــد لا توصــــل احبال
ما طوله يشتـم اهواه
يابا الحسن اي و الله
لمن خذتني لمن خذتني
●●●●●●●●●●●●●●●
هذا الشرف لآخر نَفَس
ادعي الله كون ايديمه
وين الله و امشي لكربله
و تحترگ فوگي الخيمه
اوگف لزينبـــــكم درع
و احميلي چــــم ايتيمه
و اسحگ ابرجليني الجمر
و اركض بــذيچ الهيمه


عالمتن يا ريت انضرب. وتطيح اديه
بس المهم ما تنسلـــب. بنتك رقيه
لشفاها متلوگ الآه
يابا الحسن اي و الله
لمن خذتني لمن خذتني
●●●●●●●●●●●●●●●
الحمدلله
الشاعر علي حسين الكناني

ام البنين تخاطب الحسين ع 3

حتى لـــو مني خذت اربع شباب
اشعر مقصرة و اظل راح بعذاب
رجاك گلـــــــب ام البنين
معاك كون امشي يحسين
كون امشي يحسين
ــــــــــــــــــــــــــــــــــــ
امري بيدك
و الك يرجــــع اختياري
بچلمة منك
تگـــــدر اطفــــيها ناري
مـــا تروحي
حچاية زادت بانكساري
ويانه امشي
ما جبت شو الها طاري

چانت امالي عكــس هذا القرار
خيمة تاخذني ردت فوگ الزغار
جفاك. يكسرلي ضلــــعين
معاك كون امشي يحسين
كون امشي يحسين
ــــــــــــــــــــــــــــــــــــ
بحـــالي تدري
و گلبي تعــرف زين وضعه
لو عفـــــــــتني
عمري يخلص دمعة دمعة
ليلي عگــــــبك
مثـــــــل كاس المُر اجرعة
بروحي اكــــــل
و احترگ چــن خيط شمعة

دلّة اغيابك عليَّ لمـــــــن تفور
انه و الماكو اظل نفس الشعور
دموع. ما تنشــــف العين
معاك. كون امشي يحسين
كون امشي يحسين
ــــــــــــــــــــــــــــــــــــ
بظـــــل غيابك
روحي ما يلتم جـــــــــرحها
و الحــمامـــــة
ما تطـــــــــــير ابلا جنحها
الدنية بعدك
عالجرح تنــثر ملـــــــــــحها
و شمسي تصبح
يكسر الخــــــــــاطر صُبحها

يُمة خليلي بضعن گلبك مكان
دمعة لا تتركني بعـيون الزمان
اروح. عگبك بعــــــد وين
معاك. كون امشي يحسين
كون امشي يحسين
ــــــــــــــــــــــــــــــــــــ
انته يمـــــي
بعدك و هجــرك ذبحني
شيبقــى بيه
لو صـــدگ سافرت عني
خلافك اذبل
شجرة و يكسرون غصني
هذا ظـــــني
و عُمره مــــا خيَّبني ظني

يا جرح گلبي و دوه لباقي الجروح
ميتة كــــــونك تعتبرني من تروح
وراك. راح انتخي الــــبين
معاك. كون امشي يحسين
كون امشي يحسين
ــــــــــــــــــــــــــــــــــــ
يا فشلــــــــتي
امن الزچية و الله زحـــــــمة
بــــداري ابقى
و انت ماشي بهـــــيمة ظلمة
لـــو شفتها
الها باچــر شاحـــچي يُمـــة
وجهــي عنها
بيا گتر يحســــــــين اظــــمه

يمَّها بله شرد اســـــــولف يا كلام
لو سئل محـــــسن ابنها عالخيام
شگول عن الصـــــــــواوين
معاك كون امشي يحسين
كون امشي يحسين
ــــــــــــــــــــــــــــــــــــ
بصدري حسرة
و الگلب طـافح غَليله
لا ســـــبــــوني
و لا رگبت اعله الهزيلة
متني سـالــــم
مــو مثل متن العقيلة
شنهو عذري
يم علي حامـي دخيله

مَعصـــم ايدي ما نزف من الحبال
و لا دخلت ابمجلس اشباه الرجال
عذاب حچــــــي الدواوين
معاك كون امشي يحسين
كون امشي يحسين
ــــــــــــــــــــــــــــــــــــ
الحمدلله
علي حسين الكناني

ام البنين ع تخاطب الحسين ع 2

خيرة يُمة اخذلي ابسبحتي هاك
اروح اويــاك لو مــــــا روح وَيَّاك
ما اكدر اعـــــوفك
لا اكــدر اشــــوفك
يُمه مذبوح
ــــــــــــــــــــــــــ ــــــــــ
صلاة الفجر صلــــــيت بدمع ينبع
و اجيتك قبل لا وجه الصُبح يطلع
ليل البـــارحة گضــــــــــيته اتلوع
اخاف تروح مني و ما بعــــد ترجع

لبَسَّت المقــنعة و ابســاع الاحجاب
ركض جيت و شمرت بروحي عالباب
صدگ گَرَّب رحيلك
دخيل الله و دخيلك
عني لتروح
ــــــــــــــــــــــــــ ــــــــــ
ابعباتي اتحــــــــزمت اول الصبحية
و مثل الريــــــــح الك جابتني رجليه
شما تطلــع الخـــــــيرة انـــه متاذيه
الرحت و الما رحـــت معناها مسبيه

يمكن خير اظــــــل ابدار الاحزان
احسن ما اشوفـــــــك يُمة عريان
ولو لمـــــــن تسافر
هجرك كالحـــــوافر
يسحگ الروح
ــــــــــــــــــــــــــ ــــــــــ
اذا نفـــــــرض الخــيرة زينة لو طلعت
و رحت اهناك و اعليك العدى انجعت
بيا عين اگــدر انظــــــر جثتك اتوزعت
و بصــــــــدرك حــوافر خيلـهم طبعت

شعاين و انته صــاير كومة اسهام
و منك ينسمع بس طگ الاعظام
ضلع ما بيك سالم
گاعد مدري نايـــم
بين الجروح
ــــــــــــــــــــــــــ ــــــــــ
بين امرين روحـــــــــي بنار ملتهبه
صعبة لو رحت و ان ما رحت صعبة
خدك ارد ابوسه لشــــــــــفتي گرّبه
خاف بظُهر باچــــــــر تاكـــله التربة

و اريد اشتم لحـــــــيتك يُمة بالحال
قبل لا تنترس مــــــــــن ذيچ الارمال
و طولك خل اشبگه
شمس باچر تحرگه
و يبقى مطروح
ــــــــــــــــــــــــــ ــــــــــ
عليك شگد تعب گلب امك الزهره
تعبها تشوفه باچر حـــــافر يطشره
و چف سلاب يگطع ازغــــر العشرة
ياخذ محبسك و الخنــــصر يشمره

تظل ابلا ستر مسلوب الاثياب
جبينك دم يخر و بعينك اتراب
لزينب ترفع ايدك
مـــن ينحز وريدك
و الدمه يفوح
ــــــــــــــــــــــــــ ــــــــــ
احچي وياك و انه اتلوه باحزاني
باصرني دخيلك و اطفـي نيراني
ابابك گلبي واگف حـــــاير متاني
و الله تمرمرت يحــــسين بزماني

عگبك راح اظل لو صار الاوداع
لاني لسمة و لانــي علـه الگاع
و حگ فورت دمائك
لاخلي لكـــــــربلائك
يوصل النوح
ــــــــــــــــــــــــــ ــــــــــ
الحمدلله
علي حسين الكناني

ام البنين ع تخاطب الحسين ع

ما نسيتك بالدعاء
يالمشيت لكـربلاء
تشهد ادمـــوعي ال عالمصـــــــلاية
و چم علــــــگ شديت الك چم راية
و اقنع ابروحي تعود
ـــــــــــــــــــــــــــ ـــــــــ
مني خذّت روحي و خذَّت اربــــع ولد عندي
ما ظل عليَّ بس الـدمع هــــذا الاگـــل خدي
بكـل دمعة لالله توجهـت ادعي بجـمر چبدي
يا ربــي رد احسين الي و خــــل تنذبح ولدي

يومي يخلص بس قنوت
ادعي ترجـــــع لو أموت
راســـي كشَّفته لجـــل هالـغاية
و چم علگ شديت الك چم راية
و اقنع ابروحي تعود
ــــــــــــــــــــــــــــــــــــ
ما فارگــــــت داري ابـــــــد و املازمة الحجرة
بأمَّــــــن يُجيبُ انــــدعي و اتنخه بالـــــــزهرة
يا ربي ردلي ضنوتي صــــــبح و مــــــسه اقره
ما جايسَّه حافــــــر فرس و لا منگــــــطع نحره

و ارجع استغفر واگول
قل اعوذُ امــن الخيول
من دمـــاك اتصـــــــــير مِتحَناية
و چم علگ شــديت الك چم راية
و اقنع ابروحي تعود
ــــــــــــــــــــــــــــــــــــ
مصلايتي غرَّگت دمـــــــــــــع و امبلله اثيابي
گد مــــا قميصك بيَّ اشـــم بدلته باحجــابي
ياخذني يحسين التعب و اغفَّى اعله محرابي
و بالحلم هم اتصورك واگف تــــــــدگ بابي

شما هَوه حركلي باب
يرد عليّ نفس العذاب
امن التعب گمت احبي يُمة احباية
و چم علــــگ شديت الك چم راية
و اقنع بروحي تعود
ــــــــــــــــــــــــــــــــــــ
حيطاني ســـــود امحــــرگة بدخــــــان نيراني
ما ظل دَعه اللَم الشـــــــــمل ما ردده الساني
من صـدري گلبي كل فــــــــجر يطلعلك ايتاني
و المغربية يــــــــرد عليَّ يشعـــــــلني باحزاني

الك چم دعوة قريت
و انته يُمة مـا اجيت
باسمك المصحـف ختمته هـــواية
و چم علـــــگ شَديت الك چم راية
و اقنع ابروحي تعود
ــــــــــــــــــــــــــــــــــــ
مهضـومة مكـــــسورة گلـــب نص داري اتلــوه
ادعي و يغصصني البـــــچي و ما تكمل الدعوه
لو تدري يُمة بالهضــــــم مــن بعـــــدك شسوه
خطوة أمشي و يگلي الهجــــر ارجع الف خطوه

عيوني ما تقبل تهيد
تبچي مادامك بعيد
بهاي اصبر مدري اسكت هايه
چم علگ شديت الك چم راية
و اقنع بروحي تعود
ــــــــــــــــــــــــــــــــــــ
گلبي دَرَه ابكل ما جـــــره بجسمـــك يمذبوحي
مو جاري لا ســابع سمـة خـــــل تستمع نوحي
يا فاتحة لحفظك بعــــــــد اقراها بجـــــروحي
سيف الگطَّع نحـــرك گطَّع نحري و ذبَّح روحي

مثل راســك عالرماح
روحي شالتها الجراح
(ام حسبتُم) هـــــم قرَّت هالاية
و چم علگ شديت الك چم راية
و اقنع ابروحي تعود
ـــــــــــــــــــــــــــــــــــ
الحمدلله
علي حسين الكناني

للسيدة حميدة ع لسان حال السيدة زينب ع


گومَّن يا بنـــات حســـــين وَيَّايه
عدچن يم حميدة مجلس اقراية
و انـــتي يا رقية
شادود العــزية
ـــــــــــــــــــــــــــــــــــــــــــــــــــــ
مــن الكوفة مـــــرسال و خبر جانه
مسلم يبَس عـوده و ذبلت أغصانه
ظلـــــــــت وردة منــه تمشي وَيَّانه
حميدة هواي گال حســـين حزنانة

مــــا بطلت مناحة تريد والدها
امشَّن عالمصيبة خل نساعدها
محتاجة المسية
شادود الـــــعزية
ـــــــــــــــــــــــــــــــــــــــــــــــــــــ
مكسورة گلب بالخيمــــــــة تتلوه
مخـــــــنوگة و تـجــر انفاسها گوة
ما ظنها بعـــــــــد من الدمع تروه
باگوا مــن عُمـــرها سنينها الحلوة

روحن يمَّها افتحـن للعزه ساحة
و خلنها ابوسطچن تلطم ابراحة
ما تحمل أذية
شادود العزية
ـــــــــــــــــــــــــــــــــــــــــــــــــــــ
تجـري اعله الابو دمعتها محنية
عمت عيني وگع ما شــارب امَّيه
اريدنچن تســـــــون يمها لطمية
بلكت تستراح و تهـــــجع اشوية

وحيدة لا تحس والدها خلاها
يعمَّة اتشاركن باللـوعة وياها
مكسورة خطية
شادود العــزية
ـــــــــــــــــــــــــــــــــــــــــــــــــــــ
صوبين الدمـــــــــع بالحرگة صبَّنه
و بالطـور العــــراقي جــــذّبن الونة
مُلاية انتي صيري عمــــــة يا سكنة
و انتن يالبقيـــة اللـــــــــطم شدَّنه

دم أويه الدمع كـــون الجفن ينبع
و اريدن باللطم لحم الصدر يوگع
ذوبن بالــرزية
شادود العزية
ـــــــــــــــــــــــــــــــــــــــــــــــــــــ
چلمة بويه لاحـــــد يمها تحچيها
من تسمعها منچن ينغمي اعليها
عنهـــا لا تغفلــــــن و اعتنن بيها
و اذا عالعين لطمت كضَّن ايديها

سَمعَّنها كــــــــلام ايطَيب الخاطر
واسنها اوتواسيچن ظــــــــهر باچر
بطف الغاضرية
شادود العـــزية
ـــــــــــــــــــــــــــــــــــــــــــــــــــــ
لابو ابراهـــــيم خلـي اعيــــونچ تعمه
سفــير حسين هـــــذا الغالي ابن عمه
طاح امن القـــصر فوگ الارض جسمه
و عالحيطان نَثَّر لحــــــــــمه وي دمه

مجتوف ارتمه و امـربطه اچتافه
يابس ريجه و الدم تارس اشفافه
نيرانه ســــرية
شادود العزية
ـــــــــــــــــــــــــــــــــــــــــــــــــــــ
الحمدلله
علي حسين الكناني

لسان حال السيدة حميدة ع تخاطب الحسين ع

ما دام انته يمي. ابو ثاني يعــمي
يتيمة لا تـــگلي و راسي لتمـسحه باديــك
وجه مسلم اشوفه گبـــالي من انظر عليك
ــــــــــــــــــــــــــــــــــــــــــــــــــــ ــــــــــــ
عليَّه تفـــــــــور حنية و عطرك تارس الرية
يالمحسسني اصيرلك. مثــــل ابنيتك ارقية

البگة برأســــك عليمن بعد هاي المـــواسات
مازال انـته عنــــــدي مُسلــم يعـني ما مات
شلون اشعــــر يتيمه. و احسَّــن بالمُــعانات.
و انه بكــــــــل مسية. راسي بحــجرك يبـات

ياهي العمها مثلي. أُم او أَب صرتلي
عزيزي و تاج راسي و حگي من اتباها بيك
وجه مسلـــم اشوفه گبالي من انظر عليك
ــــــــــــــــــــــــــــــــــــــــــــــــــــ ــــــــــــ
فرق عن والدي العِينة. ابـــــد ما بينك و بينه
حاسبني يعـــــم ادري. حسبة خولة و سكينة

من اتلــــــــم بـــناتك تگعـــــدني بوسطهن
و يامــــه شگد گلتلي. خواتچ ذنـــــي كلـهن
عزيزة هواية عنـــدي بكثر مـــا هنـه اعزهن
احبچ يا حمــــــــيدة يبت مسلم مثـــلــهن

تگعـــــــدنه سويه و تسولف عالزچية
يمن فدوه اروح لصـــوتك و نبرة حچيك
وجه مسلم اشوفه گبالي من انظر عليك
ــــــــــــــــــــــــــــــــــــــــــــــــــــ ــــــــــــ
الناس المـا يعرفوني حميدة حسين سمّوني
گد مــــا معــتني بيه بنتك عمــــــي ظنّوني

مـــا يحـلالي اي نوم إلا ابنــص بناتــــك
و لو عظمي برد جاس تغطــــيني ابعباتك
وگت الليل اسمــعك. تدعــــيلي بصلاتك
و لمــن تقــــره قران. يا عمــي شحلاتك

الفجر يندهني چفك. اصلي الفرض خلفك
اگوم اتوضه و انه الأفـرش السجادة ليك
وجه مسلم اشوفه گبالي من انظر عليك
ــــــــــــــــــــــــــــــــــــــــــــــــــــ ـــــــــــــ
كثر مـــــا دَلَلِّت بيه. و لا چــن عندك ابنية
تراچي لَبَسَّت باذني. گبل مَتلَـــــبّس ارقية

بضعنك لجلي عالنوگ. هودج صـــار گلبك
و شايلني بالعـــــــيون تنـــظر بيَّه دربـــك
بس ربـــــك يالحسين. يدري شگـد احبـك
هَوَايَ انته الاشم بيك و المــــاي الاشربك

بجالك عالعشيرة. صرت شيخة و اميرة
يمنطيني الاريده گبـــــل لا اطلب اجيك
وجه مسلم اشوفه گبالي من انظر عليك
ــــــــــــــــــــــــــــــــــــــــــــــــــــ ـــــــــــــ
مشيت وياك عالفطرة. عله الحلوه و عله المرة
ادورن وين مــــا دارت عِمَّة راســــــك الخضرة

شعـور اليتــم مـــــولاي. بعدني مــا شعــرته
اعيشنه لَــــوَن شـــــال. راسك رمــــح شفته
مســـومر و احمر العين و ازرگ لـــون شفته
و عله اضعون السبيات يجري دموعه سكته

وگتها يابو اليمة كون اعيوني تعمة
و لا انظر دمعتك و استمـــــع ونة بچيك
وجه مسلم اشوفه گبالي من انظر عليك
ــــــــــــــــــــــــــــــــــــــــــــــــــــ ـــــــــــــ
باچر ما يصح مخرج. باسامينه الزلم تلهج
وين الما يخــاف الله علينه اهناكَ يتفرج

كلام العـــــيب ينگال. يسمعونه بحچيهم
نگوم انفضل انمـوت و لا نوگــــع بديـهم
يضــــربون و ايسبون. و ايضحـــكون بيهم
و التهضــم يالحسين. محــــــد رد عليهم

باچر بيد الايتام. حبال ادگ بالاعظام
و رقية بنص خـــرابة تموت لَمَّن تلتقيك
وجه مسلم اشوفه گبالي من انظر عليك
ــــــــــــــــــــــــــــــــــــــــــــــــــــ ـــــــــــــ
الحمدلله
علي حسين الكناني

للعليلة

اصدگ ناظري مــدري اچذبه
مشه وين العزيز الحيـل احبه
گمت حتى البس احجاب
عليَّ شو ســــــدوا الباب
و ماخذوني
ـــــــــــــــــــــــــــــــــــــــــــــــــ ـــــــــــ
صعــدوا عالهوادج و انه ظليت مـاي و دمــع ابَّدي
اگولن هسه اكسر خاطر حسين و يگلـولي صعــدي
مدري شلون حسبوا روحي ترتاح اذا ظليت وحدي
گالوا زين الي بس هذا الاحســاب كله إنـدار ضدي

عافـــوني وحيدة و گلبي اذوه
حتى البالمهد وياهـــم اخذوه
الِّم لـــــــــسه بالاثياب
عليَّ شو ســـدوا الباب
و ماخذوني
ـــــــــــــــــــــــــــــــــــــــــــــــــ ـــــــــــ
ركبن كل خواتي گبــالي عالنوگ بس انه الوحيدة
شما اصعدلي ناگة يبچي الحسين و ينزلني بايده
برقية توسلــت تحچيلي واياه و ابسكنة و حميدة
انام شلون اگدر و انه مــــا نام گبل الا اعله جيده

طحت عالگاع طيحة طير مذبوح
من اشار عليَّه و گـــــــــال متروح
ردت اعرفها الاسباب
عليَّ شو سدوا الباب
و ما خذوني
ـــــــــــــــــــــــــــــــــــــــــــــــــ ـــــــــــ
اليعوفوها اهلها لوحشة البيت مكسورة و عليلة
لو تنحب لحد ما تعمي العيون يمكـن هم قليلة
براس الضعن لمحت عيني عباس يماشي اخته العقيلة
رحتله و من نظرني دگ عله الراس قبل لا اشتكيله

بعد مـــــا حاچيه و منه الدمع سال
و طاحــــت عمَّته و ريشاته الطوال
بعد مــا باديه اعتاب
عليَّ شو سدوا الباب
ما خذوني
ـــــــــــــــــــــــــــــــــــــــــــــــــ ـــــــــــ
يمـــشي حسين و انه بدمـــع العيون خطواته أعدها
كل خطوة المشاها تاخذ الروح مـن جسمي و تردها
بحضن زينب گلتله علتّي أطيب وعلاجي بويه عدها
يمها چـم وگــت صَعِدني يحـسين و انه انزل بعدها

مسافة اگصيرة اگعد يمها بهدّاي
گلتله و داعِتَك ماطــــــول هواي
ابنشغته رد الجــواب
عليّ شو سدوا الباب
و ما خذوني
ـــــــــــــــــــــــــــــــــــــــــــــــــ ـــــــــــ
كلهم سمَّعتهم عتب مجــــــــروح ما مسموع مني
ما ظل بيها واحــــد ذيچ الضعون مـا وَّن اعله وني
ضحكلي و طلَّع ايده مـن الگماط عبدالله و لچمني
و علي الاكبر جِـــزَّاني يناشغ و داَّر وجهه لغاد عني

و دمع لهناكَ اسمع بس وحيفه
لعريس الضــعن و اخته شريفة
بچولي كــل الاحباب
عليَّ شو سدوا الباب
و ماخذوني
ـــــــــــــــــــــــــــــــــــــــــــــــــ ـــــــــ
لمن ايسَّت ما امشـــــــي وياه گلتله بدمع يجري
ادعيلي يابويه المغـــــــــربيات ما تخنگلي صدري
بليل اموادعك شيغمض العين و انته بحالي تدري
عليلة و الســـــــــهر ينرادله كبار و انـه وينه كُبري

ماخذني المرض و بصفنة الليل
بوية منين اجيب لصورتك حيل
چبدي بالهـضم ذاب
عليَّ شو سدوا الباب
و ما خذوني
ـــــــــــــــــــــــــــــــــــــــــــــــــ ـــــــــ
الحمدلله
علي حسين الكناني

اول الخدمة. نشكر النعمة
ممنونين. مشكورين. يا ابا عبدالله
ـــــــــــــــــــــــــــــــــــــــــــــ ــــــــــ
الخدمة نعـمة هــواي ينـــرادلها شكـران
نحمد الله و نشـكره مـــن گلـب و السان
ثوب الاسود يخــتلف عــــن باقي الالوان
يعني شرط الخدمة كــون الخـادم انسان

خادم الغالي ذو خُلق عالي
صاحب دِين مشكورين يا ابا عبدالله
ـــــــــــــــــــــــــــــــــــــــــــــ ــــــــــ
الله فضــــلنا بنعــــــــمته و بيها خصنه
مَلِك واحدنا بخــــدمته تگــــــــول چنه
جزء مـــا ينفصل مــــــــن احسين احنه
مــن بقـــايا طينته ربَّنـــــــه خــــــلـقنه

ناثــــر اعلينه. من نفس طِينه
اجمل طِين . مشكورين. يا ابا عبد الله
ـــــــــــــــــــــــــــــــــــــــــــــ ــــــــــ
نحَبَّه حُب مــا ينوجــــــــــد ثاني مثيله
و احنه غير حسين ماعــــــــــدنا وسيله
عنه نبعد هــــــــــاي جـــــداً مُستحيله
النبض ميعــــــــــيش اذا فــــارگ دليله

صحنه امنه و بالعشگ صرنه
مجنونين. مشكورين يا ابا عبدالله
ـــــــــــــــــــــــــــــــــــــــــــــ ــــــــــ
عشنه بالخـــــــــدمة عُمر جداً مثالي
كلشي يرخص عدنا بس احسين غالي
لجله بس يا عـــين خـــل دمعچ يلالي
و لمصـــــابه بســـرعة يا عَبرة تعالي

ما رضَّى الذلة. و احنه هم مثله
ما راضين مشكورين. يا ابا عبدالله
ـــــــــــــــــــــــــــــــــــــــــــــ ــــــــــ
حسين وجــــه الله و اصل دينه و كتابه
و مُحكم اياته و فصــل حُكمه و خطابه
من اجلنا دمـه صَّــــــــــب اعله الترابة
و مــاتت أبنيته رقية بنــــــــــص خرابة

لجل دين الله. انطَّى عبدالله
دم باچين مشكورين يا ابا عبدالله
ـــــــــــــــــــــــــــــــــــــــــــــ ــــــــــ
شما فعــــلـنه حسين ابدن ما نجازيه
و لو فدينه ارواحنه هــــــــم ما نوفيه
كون مثله بالمـــقابل كلـــــشي ننطيه
عيـونه نشلعـــها و نخلــــــــيها بيديه

ما نِسِّد دينه . شما اله انطينه
مديونين. مشكورين. يا ابا عبد الله
ـــــــــــــــــــــــــــــــــــــــــــــ ــــــــــ
الحمدلله
علي حسين الكناني

بعزائي اقره من ابدي
دعاء الفــرج للمهدي
و الطم بالـدُعه خدي
على حسين
ــــــــــــــــــــــــــــــــــــــــــــ
ابتده شهر المناحة و دخــــــــلت ايامه
و چن ابو صالح المـــهدي ذب العمامة
بخده الايمن من دمعته طاحت الشامة
و دمه نازف كــثر مــا دگ بيده عالهامة

ينادي و مــــدمعه يجري
يحسين اكســـرت ظهري
سمعته والطَمِّت صدري
على حسين
ــــــــــــــــــــــــــــــــــــــــــــ
الليالي العشرة الاولة مـــن عليَّ تبدي
ليلة ليلة ابتديـــــها ابنُدبة المــهـــدي
چن اشوفه بنص خرابة بالهضم يحدي
شايل باحساسه جربة و مــــاي متبدي

و اعاين عــــالارض يَمَّة
تراچي و محبس و عِمَّه
من عينه يخــــــــر دمه
على حسين
ــــــــــــــــــــــــــــــــــــــــــــ
حاله ما ينوصـف حاله يكــــسر الخاطر
ويانه كل مجلس نحسه گاعــد و حاضر
بلطمة ايده مدري مـنه چم ضلع كاسر
يريد يعــرف شنهو تعــني رفسة الحافر

كثر ما يلــــــــطم ابحرگة
تحس باضلوعه منسحگة
تجيبه و تاخـــذه الشهگة
على حسين
ــــــــــــــــــــــــــــــــــــــــــــ ــــــــ
لابس اسود و اعله جده روحه مجمورة
حيله مكسور و دمعته تسيل مكــسورة
بوجهه مــن عاشر محــرم تنرسم صورة
بيَّ نشـوف امتون زرگة و روس منحورة

ابگلبه تِنبَض الصــدعة
و لحيته امبلله ابدمعه
يطَبِّك صوته مـن ينعه
على حسين
ــــــــــــــــــــــــــــــــــــــــــــ
عشرة عشرة دموعه تنزل چـن مطر غيمة
و حسرة عــن حسرة بدليله تحترگ خيمة
يا جِفن هذا اليطـــــــبگه الغـارگ بضيمه
و عمـــــته ايام و ليالي اتبـــــــات بالهيمة

كل مــــا يغفى بأحلامه
رقيــــة اطيـــــح گدامه
يفــــز و ينـــــوح بآلامه
على حسين
ــــــــــــــــــــــــــــــــــــــــــــ
لكربله تنزف مُهجته بطفها مـــذبوحة
و فاجعة حــــرگ المُخيم تاگل بروحه
ركضــة الايتام لِچمَّت مُجمل اجروحه
و مشيتين لعمته زينــــب زيَّدن نوحه

اول مشــــــــية للتلة
و ثاني مشية عالهزلة
حطَّــــن بالگلـب عِلَّة
على حسين
ــــــــــــــــــــــــــــــــــــــــــــ
الحمدلله
علي حسين الكناني

لحن قصيدة ( فاطمة امنه)
ملا عقيل الكناني 👇👇👇👇

للخدمة

تگول انه ام الخــــــدام نقلولي عنها
يعني الزچية امي تصير و انــه ابــنها
كل خيري منها. كل خيري منها
ـــــــــــــــــــــــــــــــــــــــــــــــــــــــ
نكتـب ابدمنه . فاطــمة امنه
و احنه كل احنه ولدها تعتبرنه

تحبنه هواية و بيـنه إشمفتخرة
يوليــــداتي تســـــــمينا الزهرة
لو واحدنا بعيـــــــــــناها تنظره
تنسه العصرة و تنساها الصطره

ما يبقه اثر للبســـــــــــمار لا لطـــمة عالعين
و ذاكه الضلع كسره يطيب. من نبچي لحسين
تفـــــــــــرح لِانها كل خير منها
ـــــــــــــــــــــــــــــــــــــــــــــــــــــــــــــــ
ويانه كل مجلِس. تحضر و تجلِس
اباب الحسينية موجودة نحسها

تگعد تســـمع كل القصــــــيدة
و هيه تــقرر يا نـــــــص انعيده
يا رب تــدعي التـــوفيق إتزيده
للرادودِ او لليلـــــــــــطم بايده

و للشاعر اتشــــيل الايد و تحاچي ربها
تدعــــيله بدموع العين . من كـل گلبها
تدعي بحزنها. كل خير منها
ـــــــــــــــــــــــــــــــــــــــــــــــــــــــــــــــ
بحُبها جِمعتنه تحبها لمتنه
لان تدري كل سوالفنه أعله الحسين

لمن نگـــــــــعد تعرف غايتنه
لحسين و بس تخلص گعدتنه
لحظة بلحظة تراقب خدمتنه
و بيهـــا تبَّارك و تشَّـد همتنه

صح مخفي عن الانظار گبــــر الزچية
بـــس امجالسنا انشوف موجودة هيه
المجلس وطنها. كل خيري منها
ـــــــــــــــــــــــــــــــــــــــــــــــــــــــــــــــ
اليخـــــــــلص النية. ترزقه لطمية
و حرگة تنطيه مثل حرگة بتها زينب

و دمعه ترزقه كل ما يجريها
يصـــعد رتبة و يتكامل بيها
لو نزلـــــــت عالنار اطفيها
و الفِردوس اباسمه تسميها

بــاب الخَدَّم اول بـــــاب تُأمر يفتحـــون
و للجنة خــــــدام حسين رگضة يدخلون
ندخل باذنها كل خيري منها
ـــــــــــــــــــــــــــــــــــــــــــــــــــــــــــــــ
لـــــو تَاذينه. ما تخلــــــينه
توگفلنا و بيدها تخيط جرحنه

شمـــا دنـيانه زادتـــنــه بهمها
جـــروح البــينه هيه تلــملمها
مـــن نتألــــم حيــل انألمــــها
و مثل المحسن يمكن نلچمها

واحدنا لو جــرحه ايسيل ينزف چبدها
ما ترضى نيــــران الضيم توصل وِلِدها
عشنا بحضنها . كل خير منها
ـــــــــــــــــــــــــــــــــــــــــــــــــــــــــــــــ
اي و حق زينب. هيه لإم و الأب
النه تصبح مـــــــــــن يأذينه زمنه

وكت الشــــدة لـو مَر و دگنه
ما تتركنه و لا مـــا تخــــذلنه
نغلط لكن نــــدري تسامحنه
و عالصح نشــعر بيها تعلمنه

من عدنا ابد ما مر يوم عيناه غُفـلَّت
وَيَّانه دوم و هيهـــــات نسمعها مَلَّت
شمس الله چنها. كل خيري منها
ـــــــــــــــــــــــــــــــــــــــــــــــــــــــــــــــ
الحمدلله
علي حسين الكناني

لحن قصيدة( عمية عين الما تراك)
بصوت الكروان ملا عقيل الكناني 👇👇👇👇

لحن قصيدة ( حاللتك و واهبتك )
بصوت الكروان ملا عقيل الكناني👇👇👇👇