القصيده الكامله

نامي الدمع بالليل واحد
نامي، وخياله وياچ گاعد
نامي، العمر حفنة كواغد
شما نشتعل، نحتاج والد

آنه انكسر مثلچ على النوم
كسرة گمر، تضوي بفجر لوم
وفوگ الچراچف شوگنه نجوم
(بس يا دمع بللت الهدوم)

تنطرين والد، وانطر احباب
تمطرين شوگ، وأنطر عتاب
تمطرين طيف؟، يچذّبْ الباب
ما يرد،
حتى الطيف چذَاب

شبگيني،
خل نبچي
العمر مر
والنهد عينچ،
والحزن دَر
رضعي انتظار،
شما تِنه البَر ...
يبچي البحر بالليل مضطر

لا تصحّين الشوگ بيّه
ما لا يگه احزانچ عليه
بيدچ أبو،
وما بين اديّه
شفتين تمطر واهليَه

تانيت،
حد ظلوع
ودموع
وغنّيت،
حد ما شوگنه يموع
وگلت انطفيت
وشبّت شموع
تونه اشتعلنه
الماي ممنوع

_عامر عاصي
@alshar_alsahih

((چفــ مشحـوفــ))



حبيتچ امن اول  هله
من چانت العفواً اخي ولــ عمري ماهي امرتله

اومن چانت اگلوب البعض ماتولد ابأشواگنه
بس ادري اتخلف عشگ من نطفة احچاياتنه

هيه محطة مستحه باول تعارفنه العشك متنوخ ابيناتنه
وشچم نبي ايبعثن روسُل ليغربل ابنياتنه

من نبچي انغيض السمه وتتعير الغيمه ابمطر دمعاتنه
بس احنه لنسولف دفو اومن نبرد انطفي الهوى ابشمعاتنه
يكرهنه ليل الله ابشكل چي تتركه انجومه اوتجي تتسامر ابگعداتنه

لمن غرگت ابحيرتي شگگتي چم شط اونهر
ونطيتي چفچ مشحوف
وحين الشفت حزنچ ثگل طشرته كل شوفي اچتوف

خجلتي چم جربه اوگمر من صارت
 اسوالف وفه اودنگلچ اهوايه اچفوف
وميذلنه جرح امن البُعد وحچاية الزينه اتروف
اوذاكه الي ماشحله رغد ليليه يتغطا  ازلوف

من نهطل الدمعه نهر ولشفه تتيتم ضحك
 لوووو احنه رافگنه البچي
ولعنكبوت ايلم وطن لو نصفن ابعين البعض
بعيونه ايدغدغ حچي

چا شنهو لذاته العشگ لو ماتطگ بينه اجنون
چم ليله بمحبتــچ شفت خربتي سُمعة مجنون

ماريده يستوطن دمع بعيونچ ايحصل گاع
طولي ابضحكتچ مودمع كل دمعه لتطول اضراع
مرات اشوفنه الضحك يوگفلي وگفات اشراع

فرحيلي فرحت موعد ابأول لقاء النظره
 فرحتنه بلموعد فرح يتوارد اويه الزهره 
يا عشگي ياچف لمستچ لمست علي اعله الفقره


عليـے محسن المطورے

@alshar_alsahih

انــه همــومي جهــال وتــرضــع ادمــوع
اگضي اليــل اللــولي وما يهــيدون
اغــفي ابــهذا يگــعد ذاڪ ويلــوع
ويفــزون اعلى صــوته مايــنامــون
الڪـبر منــهم فطمتــه وياڪل اضلــوع
شــسوي اشــلون لو ڪلهم يڪــبرون
جنــح بــيه انڪــسر والثــاني مخلــوع
وطــرت گــوه على اعناد اليڪرهون
بــس اســمڪ نهــر والماي مگــطوع
وانــة اعلة الجــرف الهــث بلعيــون
اون بسڪــوت مــوش ابصوت مســموع
وانه اجــروحي علــج والوادم اسنــون
مــن عــرگه الــفرح مــن روحي مشــلوع
وشــتل حــزنه الزمــان ابــنص الـعيون
عشــت عــمري أبــيتم ومگمط ابجــوع
ورضعــت الظــيم من دون الــيرضعون
ويــمرني الــعيد وانه ابــثوب مرگــوع
وعيــديتي جــرح عڪــس اليعــيدون
تمنيــت الوڪت لو يرجــع ارجــوع
وانه امســودن وگــولن يرجــع الڪون
بعــده اخضــر عشگــنه وتوه مـــزروع
واجــو ربعــي ابمناجــلهم يحصــدون
يونـس زيــن عمي ابحــوت مبــلوع
وانــه ابحــلگ الشماتــه المايرحمــون

لـــ سمير صبيح...

@alshar_alsahih

ﻟﻬﻔﺎﻧﻴﻦ ،،ﻭﻟﺼﻔﻨﻪ ﻃﻮﻳﻠﻪ ﻭﺩﺭﺏ ﺧﻠﮕﮏ ﻟﻴﻞ!!!!!
ﻟﻬﻔﺎﻧﻴﻦ ،،ﻭﺍﺟﺪﺍﻡ ﺍﻟﺤﭽﻲ ﺍﻣﮕﺮﻣﻪ ﻭﻣﺎﻣﺶ ﺣﻴﻞ !!
ﻭﻳﻦ ﺍﻟﮕﺎﮎ ،،ﻳﻠﻤﺎﺧﺬ ﺻﻔﻨﺘﻲ ﺍﻭﻳﺎﻙ ﺑﻌﻴﻮﻧﻲ ﺳﻮﺍﻟﻒ ﻫﻴﻞ؟؟؟
ﻭﻳﻦ ﺍﻟﮕﺎﮎ،،،ﺷﯿﻴﺐ ﺭﺍﺱ ﺳﭽﺘﻨﻪ ﻭﺍﺷﻮ ﻣﺎﺑﺎﺱ ﺧﺪﻫﻪ ﺍﻟﺮﻳﻞ !!
ﺗﻌﺎﻝ ﻭﺷﻮﻑ ﺑﻌﻴﻮﻧﻲ ﺍﻟﻐﺮﻳﺒﻪ ﺍﺷﭽﻢ ﺣﻠﻢ ﻣﺬﺑﻮﺡ !!!
ﺗﻌﺎﻝ ﻭﺷﻮﻑ ﺟﺎﻳﺒﻠﮏ ﺳﻔﻴﻨﻪ ﻭﺣﻀﺮﺗﻠﮏ ﻧﻮﺡ !!
ﺧﺒﻴﺚ ﺍﻟﻠﻴﻞ،،، ﻳﺮﺳﻢ ﺻﻮﺭﺗﮏ ﺻﻮﺑﻲ ﻭﺍﻓﺰ ﻭﺗﺮﻭﻭﻭﻭﺡ !!
ﻳﻮﺍﻋﻪ ﺍﺟﺮﻭﺣﮏ ﻭﻣﺤﺪ ﻧﻄﺎﻫﻦ ﺯﺍﺩ ،،،ﻭﻳﻦ ﺍﻟﮕﻪ ﻋﻠﻲ ﻭﻳﻄﻌﻢ ﺍﺑﺮﻭﺣﻲ
ﺍﺟﺮﻭﺡ!!!
ﻭﯾﻦ ﺍﻟﮕﺎﮎ،،،ﺗﻨﺸﺪﻧﻲ ﺍﻟﺼﺮﻳﻔﻪ ﺍﻋﻠﻴﮏ ﻭﻟﺒﺴﺘﺎﻥ ﻭﻟﺨﺮﻧﻮﺏ؟ !!
ﺗﻌﺎﻝ ﺍﺷﻄﻒ ﺣﺴﺒﺘﻲ ﻭﺭﻭﺡ ﻣﻮ ﺣﻤﻠﺖ ﺭﻭﺣﻲ ﺍﺫﻧﻮﺏ!!!
ﺗﻌﺎﻝ ﻭﻫﺎﮎ ﺷﻴﻄﺎﻧﻲ ﻳﺮﻳﺪ ﺍﻳﻘﺒﻠﮏ ﻭﻳﺘﻮﺏ !!
ﺑﻌﺪﻫﻲ ﺍﺳﻮﺍﻟﻔﻚ ﺑﺄﺫﻧﻲ ﻳﻪ ﻳﻮﺳﻒ ﻣﻨﺘﻈﺮ ﻳﻌﮕﻮﺏ !!
ﻭﯾﻦ ﺍﻟﮕﺎﮎ،،،ﺑﻴﻨﻲ ﻭﺑﻴﻦ ﻋﺰﺭﺍﺋﻴﻞ ﺷﺒﺨﺖ ﻃﻮﻑ!!!!!
ﺑﻠﻞ ﻣﺸﺘﻬﺎﻱ ﺍﺑﻄﻴﻒ ﺧﻞ ﺍﻋﺒﺮ ﺍﺳﻨﻴﻦ ﺍﻟﺨﻮﻑ!!!
ﻭﻓﺮﺣﻠﮏ ﻓﺮﺡ ﻋﻤﻴﺎﻥ ﻣﻦ ﻳﻨﺠﺎﺏ ﻃﺎﺭﻱ ﺍﻟﺸﻮﻑ !!
ﺑﻌﺪﻙ ﻛﻠﺸﻲ ﻣﺎﺕ،، ﺍﻟﻬﻮﺍ، ﺍﻟﮕﺎﻉ، ﺍﻟﻤﺎﻱ !!
ﻭﺣﻨﻨﻠﮏ ﺣﻨﻴﻦ ﺍﻟﻬﻮﺭ ﻣﻦ ﻳﺴﻤﻊ ﻭﻧﻴﻦ ﺍﻟﻨﺎﻱ !!
ﻭﻳﻦ ﺍﻟﮕﺎﮎ،،، ﺩﺭﺏ ﺍﺟﻔﺎﮎ ﻇﻠﻤﺎ ﻭﺷﻮﮎ ﻭﺍﺣﻼﻣﻲ ﻳﺠﻦ ﺣﻔﺎﻱ !!
ﻣﺮﻧﯽ ﺍﺑﺴﺎﻉ ،،،ﺗﻠﮕﺎﻧﻲ ﻫﻼﻫﻞ ﻋﻴﺪ،، ﺗﺮﺍ ﺍﻟﺸﻤﺎﺕ ﺭﺍﻳﺢ ﺟﺎﻱ،،،،،
ﻟﻬﻔﺎﻧﯿﯿﯿﯿﯿﯿﻦ ﻭﻟﺼﻔﻨﻪ ﻃﻮﯾﻠﻪ ﻭﺩﺭﺏ ﺧﻠﮕﮏ ﻟﯿﻞ،،،،، ﻟﻬﻔﺎﻧﯿﻦ ﻭﺍﺟﺪﺍﻡ
ﺍﻟﺤﭽﯽ ﺍﻣﮕﺮﻣﻪ ﻭﻣﺎﻣﺶ ﺣﯿﻞ .........


#هيثم_مجيد
@alshar_alsahih

يگول مظفر..

ثلثينك اسمر للحنطة
من تجفل جن جفلت بطة
جملني بنهدك نص غطة
وانبگلك جن فحل الوز
جريت ثيابك للصرة
شفت الدك واصل للبصرة
كتلك خل نلعب كتبه وطره
فنك گتلي تعدي الحز
حزك خصرك فرارة فضه
وشامة بنص خصرك معترضه
همي فضتك شنهي فضه
غير مكابر بوس ولز
تدريني ماضگت فراشي
من يوم الگيتك ماشي
وي غيري طعمته براشي
بس اني بعشگك عالمز
ترجيتك وسديت الباب
مغيرير وماتسوه عتاب
حكك ياشجرة عناب
لاجن نكدرلك بالهز
ياما هزيناك الغبشه
وعنابك طاح عله الفرشه
ونزلنه خديدك عن رعشة
وعلمنه عرانك عالرز
كالولك انه من طين
صدگوا بس طين بساتين
طينتهم صبخة وعدلين
ودود البيه ماهو قز
تذكر ياما سكرنه بريجك
وايدينه تصلي بشك زيجك
ياضيج العين شما ضيجك
جرت عينك جود وعز
بستان احفادك ضل يرعش
يزغير ماضاگ المشمش
يسألني ياخمرة مغوش
الينجاس بگطنة يفز ؟
بطلنه نحب شنهي طلابة
لاجن نوبات ندك بابه
نگله شلونك يطوي كتابه
كلسا دمعة عينة تنز
صوجك ضيعت الايام
كلما صح الليل تنام
شميتك شمة شمام
كتلك باجر باجر سز





لــِ مظفر النواب
@alshar_alsahih

هنا عرفنه الثوره للجايع شهاده
هنا عرفنه الذله وال موذله اراده
توكلو بالله الدين مايحتاج ساده

من زمان ولا سمعنه اتهلهل ام عريف بينه

من زمان ولا خواچي تلفلفت بيها المدينه

كافي عدنه الموت عاده
بياوكت مچتولنه يخلص حداده

ثورو
نسوان السلف والهور تحبل من تهد عگدت زلمهن

من زمان ولا شلبنه تخوصر بثنيت وزرهن

من زمان بكسرت الخاطر بعدهن

كافي خل نفزع لبنهن
كافي زحمه نگول حگهن

ياملح صلي اعله جرحك وشهگ الحنضل گزازه
ياملح يربات اهلنه تنام وبحوشك جنازه
ولامطگ للعرجه سرگي شضامها ولله انتوازه

غير
يربات السمر يعگال اهلنه

تساومت
نسوانه بطرفت دراهم وحنه نمنه

تحسرت شبانه بلگمت حلگها ولا طلعنه

نشمرت الشيله اعله نحر ارگابنه وهلبت گعدنه

تعودينه الينكتل نقرا اعله روحه الفاتحه وندفن ولدنه

كافي بالعباس متنه

يا غرابت شيبنه وسكتت جرحنه
وياغزارت شوگنه وچذبت ضحكنه
وياصلافت خوفنه اليرضه بوضعنه

_مصطفى الاشتراني

@alshar_alsahih

شربتك شوف حد مابينت بيه
وبديت عله جمره حيرتك نيه
وخميت اللسن ع الحجي المامگيول
ذبلن بس ماجزت سولفتك اميه
من اسكت لاتضن يخوني التعبير
استحي اتلگه ضواك بكلمه محجيه
وخاطر لاتحس بعمرك المنثور
لميته ونسيت سنيني مجفيه
فضل جيتك لجن صاحب فضل متصير من تمشي بدرب مرسوم للجيه
سافر وين ماعد الله كاع وناس
تلكه متاع اليحبون حنيه
رابي وي المري واحجي التشوفه العين
بس طبعك عكسته بعين معميه
يمشيه ماي وادري الماي مايندار
التهه بدربه ومشه وبحن شواطيه
خنگني الضن ردت تفزعلي نسمه راي
شيسكت الغبشه اذا تنصاد فختيه
على ياساس تاخذ غيبه النسمات
بيش تعيش اذا زعلن عله الريه
دربك مو الي شوازاني وتحفيت
ما ادري الشمس تغفه عله رجليه
وانه ذاك القره بعينك حمار وداع
فطن والصدمه باگت كل معانيه
مثل التانت بثوب العرس تنشاف
وگبل يوم العرس تنوخذ فصليه
تيهتك واحس مستثكلتني الكاع
وسد اذنه الكمر من فزعت ضيه
تبدت هيبتي وفرع ضواي بليل
ولكيت السولفني يسولفن بيه
عله حسنك جان يكشخ مشتهاي بعيب
زلمه وشلت يمك مستحه بنيه
من تسگي العقل حسبات تحصد شيب
الدنيه تطول من تحسهه مكضيه
احن والما اشوفه بحلمي كاعد جان
وانسكن بدموعي من ذبلن طواريه
بريسم وبهلا من اتلكه طاري الصوف
وعلى جتاف الوكت مشيول خاچيه
خيرت الجدم لو اموت لو ما اطيح
كلهه ولا احس مشيول منيه


_محمد وجيه
@alshar_alsahih

آذكـروك . .
وجـدح حزني

وشـتعل . .
بـيدر سنابل حـدر صدري

وصـرخ . .
بعيوني الضـباب

وبـاب بـاب . .
تخـلخـلن بـيـبان عمري

وكـون تدري . .
الحچي الماعـابر شفافـي
يـگودني لــ حسنك رهينـه

وكـون تدري . .
شـوغـة متيـهين روحي
وأنـته خصرك چـان شطـيـن ومدينه

ومـاهي هينه . .
اَي وحـگ ثـنيت گـذلـتك مـاهي هينه

ليـلك . .
أيچمل المذلـه عـناد نـثيـه

وخـلگي طيف . .
لا عثرلـه بــ جفن يسـوه
ولاحـضه بــ جرفـين عينـه

أنـه حسبالي . .
شـكو واحد ترف گلبـه فـطير
أنـه ويـن أدريـبك أدور ضحكـتك

كله منـك . .
أنـته سودنت اليـالي
الجانت تعدي بضحكتك

وأنـته عودت الضلام
يعيل بيه ويـلبد بماشـة گذلتك

أنـته أنـته العلمتني
اكفر بـكلشي ضريح
واسجد الشامة رگبـتك . .

آخ
يافشلـة قسمتي . .
الـحالـها حال السفن

شحصلت من ماي البحر
طـول السفر ،،
يابس گلـبها ،،

ياوليد
الندى بسك
لا تـخيط جرحي بحبـال الـندم . .

الضـمه . .
تـناوش أيـامي
ومـالي بــ الوادم مطر

كـافي . .
أنـخاك عـله گطره
وشـامتك فزعـة نـهر

كـافي . .
گلبي يـمشي بدروبـك ذليل

بـارده آثـياب اليـالي
وچنـها حضنك
دوم ماضمت دخيـل . .

من يمرني أسمك أضيـع
أبـين چـويـات الشوارع

وشـكو ولايـة ،،
اگـبل عليـها ،،
أبـلا هلا تـتـلگـه جدمي

نـجمه ،،
نـجمه ،،
أسنيـني تطفـه

وشگگ أحلامي خريـفك . .
يـابعد عمري أعلـه كيفك . .

حلف عيوني
شكثر فحطـها طيفك . .


ناصر البدري !

@alshar_alsahih

يمة ذولة اهل القصر ما لاعبوني
يمة من شافوني اجيت اتنادسوا
واستغربوني ،،

يمة ما سموني بسمي
وكالوْ هذا ابن الفقير و شتموني
وكالُوْ هذا ابن الصريفة و عيروني ..

يمة جا هو الفقير شسوى من نسلة بعمرهم
يمة جا هي الصريفة شماخذة وخايف قصرهم

يمة كالوا :
لا تمر منا بعد بالك تشم ريحة وردنا
وكالوا بجدمك الحافي نخاف يترب عكدنا
يمة عدهم كلشي عدهم واحنا بس الماكو عدنا

يمة لعابات عدهم مدري شنهي
وانه لاعاباتي طين !.
ويمة حتى ثيابهم مستغربتني
يعاتبن ثوبي الحزين ..
يمة جا ليش احنا فقرة وليش اهلهم زناكين
يمة دين الفقرة متعب خل نبدله بغير دين

وليش ما عدنا قصر عالي مثلهم
موش ابونا اليبني هاي قصورهم كل هل سنين .
وليش ما عدنا ورد يمة مثلهم
موش ابونه اليزرع الهم بساتين ،،

_كاظم خبط

@alshar_alsahih

وره البرگع
وره البرگع مدينة خوف !!
والكحلة درب حرّاس
غنّوا عالرمش بهداي
أشتهي السكته التسولفها
العذاري الساكنة عيونك
بلم متونس إعله الماي

عذابك..ليل
ما يرضه بحزن بارد
ولايرضه بدمع مبيوع
عذابك .. والدمع من يلتفت ممنوع !!
تضم اسرارك بيا ليل ؟
ما تدري الگمر .. راس الضوه المگطوع !!
إشمالك
ياعشگ تنباگ
إشمالك يافرح تنباگ
بينه أسرار مضمومات
همزين ولبسنه إعله الگلوب ضلوع
ضمّ گلبك
ترى عيونك نبضها مبين من الخوف
شحلاتك من تذب الخوف !!
شحلاتك
من اشوفك بالعشگ مديوف
تچملني عشگ وانخاك
دخيلك رايد جناحين
احس گلبي بصليبك ياعشگ مچتوف
وين تريد؟
وأنت أول نبع بالروح بللني
شحلات أسمي
لمن ثغرك يسولفني
ألج يم رجفة اشفافك
واتهجه خمر ذايب ،
خمر من كل الضمه يلمني
إبتسم ،گلبي أمانك
من تسر الروح
إبتسم ياروحي العذيبي
الخلگ دخان
وچملني بحريرك
مشتهي اتبده عالطول ولايتك آذان
حدر فيّ شجرتك لو نمنه !!
لأحضنك حضنة الرمان
خوفك ما يلوگ النه
حدر خوفك أريد اشتل صلاة أمّي
وامسح ليلك بقرآن
شحلاتك
من تذب الخوف
شحلاتك
من تنسيني ، وتسامرني
بس دمع العشگ لايگ عالعيونك
وره البرگع مدينة شوگ !!
و وره شوگ المدينة إنت
والدنيا نهر نسيان !!


_باسم الخاقاني
@alshar_alsahih

((عشگــ مذموم ))

وين الگاكـ... 
دورتك سمـه اشمدريني ترجــع گاع
وبيـا گاع......
انا امضيعكــ فرح عرســان
وين الگـه وجه مكشــوف كلهه اوجـوه من دخان
وين الگه نهــر وفاي ماماخــض چــفوف اوعيـن
اوين الگه اليجيني ابشوگــ من ينجاب طاري اثنين
صحبه اوخلصت زينين كلمن فرهداله ابخل
اومو ذله وقار السان كلمــن بلعشگــ يــرتل
فتش باطني اترجاكــ الف يوسف تجدلكــ بيه
وألف خــدعة زوليخا اوالله ظل يهــديــه
يل ناطي عمــر صفنات ذلفقاااار ماصحله علي وظل صافن ابغمده
وشايلكــ دمـع بي زود مايهوه الجزِر كل وكتــه بل مده
طشـرت النفـس يلگاكــ
اوخنگيـته ابـدروب اجفاكــ
ویــن الگاکــ..........
لاتتبع سوالف لیل وانه امکلمك حچـي المعصوم
مــن چان الصدگــ مبیوگــ
مــن چانت خصمنه حلوگــ
ماأهوه حچی المگراض من یحچي یجافي اثنین
وتطلب عمــر نووووحين
خااااف ايطول هجركــ ولحگ الميتين
ترا الشمات تتنفـس حچــي الهجــران
ردلي وخلني اكشخ بيك وخنگ كل حچي البطران
سولفتكــ عذووووبة ماي
من چااان ابتجاعيــده النهـر هلكان
ياشابــع نوووم اطلبكــ حيـل
تراااا السهران عنده اطلاااابه ويه الليل
ابدليل الليل مامعلــوم الف نيــه
اوحلاااال اتصير للمترووك الغنيـــه
شايلك عشگ مفضــوح متطشـر ولايلتـم
اويوليفي العشگــ مكروووه لو مامش وصل ينذم


علي محسن المطوري

@alshar_alsahih

سافر بروحك لحد اخر بچي
ولم فشلتك حطها بالجنطه متاع
وامشي عنهم وين ماعد الله گاع
ناسك اتدور سفه ابين البيادر
وانت ماشافوك ياگلبي شلب
روح بلكت غاد
بالغربه زرع روحك يشب
الناس مو مالت عشگ مالت لعب
ضيع
واشطب عالهويه
عمرك الگضيته يمهم والله يستاهل شطب
الناس واقعها ضباب
والظمير الظال عدهم ظال ابعازة ملح
يله ياگلبي شجاك
لم غراضك
وابحر بواهس طعنتك مر عله الغربه صبح
غيب محد يشتهي اشموسك تشع
واترس اشليلك سوالف ناگعه بمي الدمع
ليش دليت اعله روحك
سيفهم وانت نحر
وليش من امحل وكتهم جيتهم جية نهر
ناسك اتدور مصالح وانت جيبك بي يتيم
عيش وارفع لافتت الله كريم
تولتك عصات وكتك تنفش بروحك گطن
وانت تدري الطبعه ابيض حصته بالدنيا الطعن
گوم زت شوغة فشلتك
واوگف براس الرمح



_بشير المرشدي

@alshar_alsahih

صبغت العمر من لـونك

وگلت ماخظر بلياك ،، أضل يابس

أضل يابس . .
لـحد ماتـمطر عيونك

عايشـلك . .
خشب عفه
ودرب الجفه واهس نوح

مابسك . .
دلم لـيلك

أنـه ومـرايـتي من الحزن
مثـل الغربـه نتـلاگه

يـناهبني . .
أعله حجـة غار أخـذ حزنك

كـونك . .
مو نبي ومبعـوث
المن بايت بروحي

ساجـني . .
بسماواتك
كمر مگـرود

لا معبـد يناغـيـني
ولا ذكروني يم كاهـن

تلـچمني . .
وگـول تهـون
السمار يلـوگ للـمتعوب

وانـه شچم دوب
أشد حيلي بتصاويرك

السهر . .
نوبـات مايـغفر

چم أهـلال
فـوك أهـلال
گـام يبـات بضلوعي

دخيلك ،،
ياسـراط ،،
الشوف ،،

شني ولايـات غيرك دوم
وأنتـه ولايتـك صدفه

يهلبت . .
تـفگد أهـلالك
صار أسنين ماغنـه بسماواتي

لاگـيني . .
يملح الدين
أشگگ ليل اليعبـدون وسجدلك

دلاگـيني . .
بفضل منك

مهو الشلال
من يتـلاگه ويــ الـگاع
يتبـده عراضـة ماي

وأنـه . .
اليوجعني هواي

أجيك منين
بعيوني ضوه براهيم
ودروبـك حطب تاريخ

اگـول . .
شمالـني ستاحش

أثـاريـها الصور تعـويد
من تندگ علـه الحيطان

گـتلك . .
لاتـوهدني
شمس ماصير
أفضح كل غريب ستوطن بروحك

أبشرك بـيش . .
گضـه عمره الضرف كـادود

أودي أجفوفي ،،
ويـكل طيف ،،

چف بــ جرحك
وچف بــ رساله يگـود

يــ مدري . .
وعـايش المدري

لا نسيان يرضه يكسر أصنامي
ولا ميت ورد لــ الله عـذاب أبيض


ناصر البدري

الثورة من تبدي گصيبة
وتنضفر للوطن , للچف النظيف
لديرة سمرة..
الثورة من تبدي قصيدة
وفكر شعبي
الما تلمّ الناس ماتسّمّه ثورة...
وطولك اليندل مشاوير الملح والماي
وعيون الشمس
كلما يطيح تغنّي فوگ ترابه شجرة...
انت يازفة عشگ ليلة مطر
صلّت عليها گلوب خضره..
گلبك يجيس الفلِح والگاع
وتهلهل بيادر
ترگص الحنطة وطن والديرة خير...
صوتك يعلّمني
احب گاعي وهويتي
واضحك بوجه الهوى شماغنّى طير..
چنْت الم دمعي اعلى مودك
يم جرف عاشور ابدّي
واشتعلّك شمعة شمعة...
هسه چم عاشوريندل
خلّص دموعي وكسرني
الليلة مابيّاش دمعة...
الليلة بس آنه
وضريحك والبخور
وعلگ بالشباچ من عاشگ علامة...
الليلة اشد راسي بحضرتك
ياندى يالون
ياطلعة فجر يتنفّس الدنيا ابتسامة....
للعشگ مشتولة روحك
طينتك طينة صريفة و نيّتك نيّة حمامة...
أكبر من الدمعة صوتك
وأبعد من الشعر ماضيّه وجديده....
انت بس عبد الله عندك يشتل الصحره براءة
و يسگي تاريخ العطش ماي وقصيدة...
غروبهم مابدّه شمسك
ذيچ شمسك طافحة بچبد السمه....
وذاك شوفك
يمتد لآخر مدينة
يسيّر اعليها العمه ...
وهذا صوتك يغزل السچة البعيدة
ويندل المهرة الجموح...
واحنا شبّينه اعلى مودك
عِشرة صرنا ويه الرماح
وغزّرت بينه الجروح ...
شكثر متنه
شكثر فوگ صدورنا داست حوافر
وانت تشهگنه اعلى كيفك
نسمة نسمة ...
تريدنه نضوّي الوطن
من تكبر جبال الظلام
ونشتعل بالثورة نجمة.....
الليلة من يطفه الگمر
چم نجمة تطفه ؟!..
وچم نهر بالديرة ينسد؟..
وباچربوجه العطش چم وردة توگف!
باچرالغيم ايتدلّه
وچم علگ للثورة ينشد!..
خاطر يطش الخضار ويه المطر
ويطير دخان الحرب
واللون الاسود....
خاطر يبردن عليك گلوب اهلنا
وگلب خيمة زينب المحروگ يبرد
گلب خيمة زينب المحروگ يبرد

ميثاق الهلالي
@alshar_alsahih

مدري ليش
انت انتظارك يختلف !
لا .. مدري ليش ..انت.كلك.تختلف ؟
روحي صبّيره ويمر طولك نده
چا شرد اصير ...
شيثمر العاگول من تمطر حرير ؟؟
وآنه بس الحزن طيفك ابقى اسير
وانتظارك يجري بيّه وگاعي صبخه..
ما يخضّر بيّه غير الشيب لون اسود حزين

ومدري ليش !
الليله حتى اللون الأبيض ينذكر كلش حزين
مر مثل ليلة رحيلك..هاكثر بيها سواد
چنها شعري.. الطعمه اسود
سنِّيني بلا لون مرّن
وانتظارك طيف .. لو بس طيف تعبر
والله حتى الشوك اسويه ياسمين
والله حتى غيومي هاي العاگر الماترضه تمطر
چنت امطّرها عطر

يالــتعبتني
الگاع.من.ينشف.ثديها.تدر.ملح
وانت لو نشفت عيونك من دمعها
يخضّر الصبير بشفاف الجرح
وآنه كل عمري جرح نشفت شفافه
الصبخه گاع ..يغني فوگ جروحها الفلاح آآآآه
الليل كل ماتثگل مرورة ظلامه
تذوب بشفاف الصبح
وليلي طال..وصلت مرورة ظلامه
المشتهاك..العازتك..
مابيه اغني ..

ومدري شلون !؟
امد.شوفي.على.گد.الحيل.البعيني.وماالگاك
وردّن للحلم مجبور
يالضاعن.چفوفي.من.الدواره.عليك
يالمابيك شي البهالناس حتى الگيك ..
يالوحدك بروحي تدور
يبرد.نبض.روحي.وانت.بيّ.تفور
وما الگاک
ما الگاك
وردّّن للحلم مجبور


- الكبير لطيف العامري
@alshar_alsahih

رجفتلهم جرس بالباب
محد كالي اتهده ؟

ونزل خطار گمرتهم
عرك تعبه
ونشد عن حيلي وتبده

وسكت بالليل
نثيه مگابلة العشرين
تحچيلة اعله سكتتها

واظن حبيت !

ونه تايب
اصلي لوادم مغربه
ونه تايب
احب الرمل من مطره
ونه تايب
اجيس الـ آه من صحره

واجيت انته ?
وعله الله (آنه وگليبي)


#عباس_الغالبي
@alshar_alsahih

وين الگاك
يصفصافة نهر والناس ما تقنع تشيل اعثوگ
وانه امنين مالبسك رهاوة ثوب بس طوله اعلا طولي ايلوگ
ﻣﺮ ﺑﻴﻪ ﺭﻛﺾ ﺻﺒﻴﺎﻥ
ﻓﺰﺯ ﻭﺍﻫﺴﻲ ﺍﻣﻦ ﺍﺳﻨﻴﻦ
ﻟﻮﺩﻛﺔ ﺟﺬﺏ ﻋﺎﻟﺒﺎﺏ ﺗﻜﺸﻂ ﺟﻠﺪ ﺍﻟﻤﺘﺎﻧﻴﻦ
ﻭﺍﻣﺘﺎﻧﻴﻦ
ﻭﺍﻣﺘﺎﻧﻴﻦ
امتانين فزعة ماي
صوفر جم وجه عطشان وانت براسي تفتر غيم
يل بروحك خجل عرسان
وين اتصح وكاحة ليل
يل شايل ترافة طير ماتغفه اعلا جنحك ايد
وين اتريد


كاظم الركابي
@alshar_alsahih

طشت سالفتي عله الديره
كل الناس اندلت حزني .
وكلهم عرفو ذابل غصني .
وكلهه اشتمت بيه مفارك .
وأحتاريت شما طب شارع
كالو هذا الصدكي العاشك .
هذا الشاعر
هذا الطفه الليل شموعه وضل يكابر .
هذا الشربت لونه السكته .
هذا الترست صدره ال أخ وضل تايهه
ما خذ صاحبته .
هذا الربعة أنزفو كلهه
وطك بيهم موسم نعناع
وخلص عمره يناطر زفته .
ولامتني الناس عله البيه ..
وانا اسمع والدمعه بعيني .
والنسمه التعبر تجويني ..
وكلت تهون
موش اول شاعر حب كمره وتالي
الظلمه تفرهد خيرة
وموش اول من يشتل جوري وتعبه يروح لريه غيره

لـ اشجع الخفاجي

@alshar_alsahih

سكته عله سكته تمر الأيام
لاتـنشـره ولا جذب تـنسام
تدفـع بــ عمرك دفـع جـدام
حته الحلم مل منـك ونـام
. . .
فنك تنام وجفنك أبعـيد
وحزنك كسر ضهـر المواليد
أتـريد بس ماتـدري شـتريد
صافن وره ضعون الـمواعيد
. . .

صافن وگلبك ركض مذعـور
ركضـة نفس مابين الگبـور
تشتعل بس تـنشـاف تنـور
تـكتل الطيف أرسـمله ناطور
. . .

لاتحسب ولا تشـتري الصيت
ماتضحك أشفاف التـوابيـت
دللـت يامـه ويامـه ربـيت
بس أنـته واسمك تالي ضليت
. . .

ضليت شوغه بـصدر الغروب
ودمـوعك أمنطيـح حالـوب
أحبابك نسـوك وسدو البـوب
ونامـو اگلوب امشابـگه اگلوب
. . .

ديـر الخمر فوك الصور ديـر
بـلكت تطفـيك التصاويـر
ليـلك أشكبره وحلمك أزغير
ماينصـبغ شـيب الطباشيـر
. . .

ناصر البدري

@alshar_alsahih

اضوگ اسمك
واشوف الكاس عابد يرتجي بربه

واشوف الدنيه سفرة طيش
باجر كلمن بدربه

خل اتعب بعد شيفيد عندي النار موصعبه
عندي الموت
جرعة كاس
وشلة كاس
سهله وينتهي بشربه

كلشي يهون وبسرعه
كلشي يهون بس الليل
بس الليل ماجرعه

بس بالليل يلتم كل عتب روحي وغنيلك
اغني وعيني تبجيلك
اغني وشوگي ياخذني بجدم حافي المواويلك

ووصيلك
يرب الاااخ والچمه
عله هونك من تطب روحي
بشر متعوب ومكدر عليش وترفس بحيلك

عليش اسنين المعسرات كلهن طبعن بروحي
گولو هل بشر متعوب وأخذوني ع گد نوحي

عوفوني اختلي ابروحي
عوفوني اختلي ويه الكاس
عوفوني التعب مرات مايحتاج كثرت ناس

عوفوني الحزن مريود للما طاح بجروحه
ولا انه الباگ حگ الناس
لا انه المانطه بروحه

ولا انه المستعز دمعي وغليه اعله ياهو الجان
اشو كلما عزيز يروح من عيني يطيح انسان

وماعرف البقن بيه شكثر ياعين تحسبهن
اشو ياهو اليجي انطيته
المصيبه يروح مايبقه
ولا انه الكتله رجعهن
السنين الونن عمري بعد ما ظل اثر منهن

ويروحي براحتج وني
تراهه الدنيه وكحت عين كلما يطگ عود اخضر تذكرني بكبر سني

وتغازلني
وعرف خيوط مافيدن لچنهه اتريد تغزلني

الجميل كريم حاشوش

@alshar_alsahih