Oldingi blogpostimda 2019 yilning 26-noyabr kuni Londonda o’tishi kutilayotgan “Invest in Corporate Uzbekistan” forumi haqida yozgan edim. Forumda ishtirok etadigan investorlar bilan uchrashganligimni ham aytib o’tgan edim. Uchrashgan investorlardan biri bu Sturgeon Capital bosh ijrochi directori Kiyan Zandiyeh bo’ldi.
Kiyanga o’zim tashkil qilgan proyektimni taqdim etgan edim.Kiyanning O’zbekiston haqida bergan intervyusini quyida ko’rishingiz mumkin.
Sturgeon Capital bu xususiy kapital (private equity) kiritadigan fondlar sirasiga kiradi. O’zbekistonga o’xshagan sarmoyalar uchun ochilayotgan davlatlarga birinchi bo’lib shu turdagi investitsion kompaniyalar kirib keladi va muvaffaqiyatli bizneslarga pul tikish orqali biznesga sherik bo’lishadi. Bu investitsion fondlar mahalliy korxonalarda korporativ boshqaruvni, ilg’or boshqaruvchilarni va xalqaro standartlar bo’yicha buxgalteria hisobotlarini joriy etishadi. Maqsad esa 5-10 yil ichida o’zlarining korxonalardagi ulushlarini mahalliy va dunyo fond bozorlarida yuqori daromad bilan sotish hisoblanadi. Sergey Guriev va Atabek Nazirov aytganidek London sarmoya jalb qilish uchun yuzlanadigan bozor hisoblanadi.
O’z vaqtida Qozog’iston va Mongoliya davlatlaridan chiqqan xususiy korxonalar ham London Fond Bozorida (LFB) IPOlar qilishgan. 2018 yil yakuni bo’yicha 11 ta Qozog’iston korxonolarining LFBdagi bozor kapitalizatsiyasi 11.5 milliard AQSH dollari atrofida bo’lgan. O’zbekiston ham kelajakda LFBda IPOlar qilishni rejalashtirib turibdi.