Тимур Ишметов: иқтисодий инқироз пайтида амалдорларнинг қиммат машина олишига танқид билан қараймизОлий Мажлис Қонунчилик палатасидаги мажлисда депутат Расул Кушербаев ҳокимлар ва бошқа амалдорларнинг қиммат автомашина олаётгани ҳақида савол берди.
Молия вазири Тимур Ишметов ушбу саволга жавоб берар экан, бу ҳолатларга Молия вазирлиги танқид билан қарашини, амалдорлар иқтисодий инқироз пайтида бирор харидни амалга оширишдан олдин нафақат қонун билан, балки мантиқ билан иш тутиши кераклигини таъкидлади.
Аммо ўз навбатида маҳаллий бюджетларга молиявий мустақиллик беришни давом эттиришни тўхтатиб қўймаслик керак, аксинча очиқлик ва ошкоралик сиёсатини таъминласак, жамоатчиликнинг ўзи ҳаммасини жой-жойига тушириб қўяди, олдингидек маҳаллий бюджетларга сунъий чеклов қўйиш керакмас, деди.
Тимур Ишметовнинг маълум қилишича, жамоатчиликнинг эътирозидан кейин қайси амалдор қанақа машина олиши мумкинлигини аниқ белгилаш тўғрисида Ҳукуматдан топшириқ бўлган, тез орада тасдиқланади.
👉
@xabar24official