Ferghanatourism

Fargʻona turizmi uchun mutaxassislar tayyorlashda xalqaro hamkorlik

Bugungi kunda oliy taʼlim tizimini tubdan isloh qilish, yangicha yoʻnalish va uslublarni joriy etish boʻyicha amalga oshirilayotgan ishlar va ularning samaralariga barchamiz guvoh boʻlib turibmiz. Birgina misol, avvallari Fargʻona viloyatida 6 ta oliy taʼlim muassasalari faoliyat olib borgan boʻlsa, ayni vaqtda ularning soni 10 taga yetdi. Mazkur muassasalarning ayrimlari horijning nufuzli oliygohlari filialidir. Ularda kun talabiga munosib ravishdagi yoʻnalishlar boʻyicha taʼlim berilmoqda. Xususan, Latviyaning Fargʻonadagi ISMA universiteti faoliyati ham ana shu imkoniyatlar samarasidir. 2018 yilda oʻz ish faoliyatini boshlagan mazkur muassasada 125 nafar talabalar 3 yoʻnalish boʻyicha taʼlim olyapti. Bular, axborot texnologiyalari, biznesni rivojlantirish va turizm yoʻnalishlaridir. Turizm yoʻnalishida 41 nafar talabalar tahsil olayotgan boʻlsa, ular turizmdagi xalqaro tajriba bilan boxabar etib borilmoqda. Kuni kecha Fargʻonaga tashrif buyurgan Yevropa taʼlim assotsiatsiyasi vakillari mazkur oliy taʼlim muassasasi bilan hamkorlikda ishlash taklifini ilgari surdilar. ISMA universiteti va assotsiatsiya vakillari oʻrtasidagi muloqotda Fargʻona viloyati turizmni rivojlantirish hududiy boshqarmasi mutaxassislari ham qatnashdilar. Bugun Fargʻona turizmi uchun qanday mutaxassislar zarur, ularni qanday tayyorlash kerak... Muloqotda ayni mana shu savollarga javob boʻladigan yechimlar boʻyicha takliflar ilgari surildi. Kelgusidagi hamkorlik boʻyicha aniq rejalar ishlab chiqildi.