وحدك تصب دمعاتك.
يالمهدي المحيراتك
الزهرة. وزينب. مظلومات.
باب وخيمة المحروگات.


ــــــــــــــــــــــــــــــــــــــــــــــــ١

الباب كسر. چم ظلع لم الحسن
الباب كسر. ظهرك وظهر الزمن.
الباب كسر. گلوبنه وكل حگ حزن.

المصيبت عمتك وامك تحير افكار
تسمع فاطمة حرگوا عليهه الدار
شلون النار تچوي التشفع من النار.
بگلب الزهره طاح و يحفر البسمار.

محسنهه طاح الفرقد.
بيوم الولادة استشهد

صاحت. فضه. المحسن مات.

ـــــــــــــــــــــــــــــــــــــــــــــــــ٢

حزن زينب. عاش وياك استمر.
حزن زينب. وجرح أخوهه اعلنهر.
حزن زينب. ماينسيك الدهر.

زينب بالسبي تفتر تصب دمعه
وامك بالمجالس تفتر وتنعه
على المذبوح تبچي وتهتز السبعة
تصيح حسين ابني مالگو صبعه.


منهو السلب ثيابه.
ضل مرمي علترابه

ليش أ ضلوعه مكسورات.

ـــــــــــــــــــــــــــــــــــــــــــــــــــــــــــ٣

طاح محسن. مثل عبد الله انغدر
طاح محسن. وسفه بالباب انعصر،
طاح محسن. انكسرن ظلوع وظهر.


مصيبة محسن وعبد الله جرحنك.
شوكت يخلص يبو صالح ألم حزنك.
بس ربك يغايب يستمع ونك.
المصاب حسين تمسح دمعك بردنك


وحدك تصب عيونك.
ماتلگه اليعنونك.
تبرد نارك بالدمعات.

ـــــــــــــــــــــــــــــــــــــــــــــــــــــــــــ٤

الحبل يجرح. أيد زينب باليسر.
الحبل يجرح. أطفال وبشمس الظهر.
الحبل يجرح. علي السجاد ويجر.


الحبل نفسه الچتف حيدر چتف أهله.
زينب من جلوس أتصلي من ثگله.
منحبال السقيفة ضلت العله
من رگبت رقية السكنه متصله.

ماتنتهي مأساتك
تذكر قصص عماتك
اعليمن راحن مسبيات.

ـــــــــــــــــــــــــــــــــــــــــــــــــــــ٥

ليش فاطم. لسه ماعدهه گبر.
ليش،فاطم. ماتت ازغيرت عمر
ليش فاطم. بالطف بحسره تمر.

بيوم العاشر اتعنت لبنهه الطاح
من مهره وركض يم رگبته الذباح
تصيح أسگوه الماي وگلبه خل يرتاح
الدنيه تنطفي من يعطش المصباح.



العطشان أبنهه دامي.
المذبوح أخوهه ظامي.
بالطف ظلن محتارات.

ـــــــــــــــــــــــــــــــــــــــــــــــــــــــ

حيدرموسى الرميثي.