Honkongga 5 ta urmadik, lekin yutdik — 3 ta urib. Raqibga hurmat saqlagan holda aytaman: O‘zbekiston karrasiga bu jamoadan ustun bo‘lib kelgan va hozir ham shunday. Honkongga agar xohlashganida 3 tadan ko‘proq gol ura olardi. Maksimum jarohatsiz o‘ynashga intilishgani sezildi. Hozirgi holatda bu juda muhim. Ammo baribir Eldor Shomurodov jarohat olgani biroz dilni xira qildi. Eldor bu termaning nayzasi. Usiz jamoa ancha o‘tmaslashib qolishini Osiyo chempionatida ham ko‘rdik.
Himoyachilarga deyarli ish chiqqani yo‘q. Biroq Abduqodir Husanov yakkakurashlarda raqiblarini yeb tashlayotganini ko‘rish kayf. Odil Hamrobekovning bugungi harakatlariga faqat tasanno deyish mumkin. To‘psiz ham, to‘p bilan ham yuqori daraja ko‘rsadi. Shukurov esa biroz formada emasligi bilindi.
Abbos, Hojimat, Oston milliy jamoaning buguni va ertasi. Ular buni maydonda isbotlayotgani esa ikki hissa kayf.
Ha, bugun pozitivlar ko‘proq. Lekin biroz dilni xira qiladigan holatlar ham bor. Ayrim muxlislar stadionni axlatxona bilan adashtirib qo‘yayotgani, afsuski, fakat. Yegan-ichgandan qolgan axlatini paketlari bilan o‘rindiqlarga bemalol tashlab ketish qachondan urfga kirdi — bilmadim. Yaponlardan o‘rganadigan narsamiz ko‘p, futbolda ham, uning tashqarisida ham. Yosh muxlislarning maydonga ota-onalari tomonidan chiqarilib yuborishi esa shunchaki milliy jamoa minusiga ishlashi esa alohida masala.
@futgol_uz