(( كـــلـــبـــي مـــجـــســـوم ))
نعي لسان السيدة سكينة بنت الإمام الحسين عليهما السلام
سكنه و ادموعي تنادي آيا مظلوم
لكربله و هاي المآسي گلبي مجسوم
------------------------
اظْلَمَّت الدِنْيَه علينه و هَبَّت ارياح
و العدو بالحومه كَبَّر و بالسمه اصياح
و اسْمَعِت صوت بأنينه يرفع انياح
طاح لحسين ابطفوفه و ينزف ادموم
------------------------
صرت اطالع لن خِيَمْنَه وحشه للصار
و المُهر جانه بحنينه و ينذر أخطار
يا بنات الهادي فِرَّن هالعدو جار
حسين طايح ع الوطيه و جسمه محطوم
------------------------
و بن سعد ما يقبل إلا بسبي لأطياب
اتْحَيَّر ابطيحة وليكم و مِنَّه إرْتاب
اسْتَحْسَن الشور بهجومه لهاي لأطْناب
وكل فوارسكم وسافه امْصَرَّعَه اجسوم
------------------------
و آمر العسكر يجونه و تحمل النار
حرگو يا بونه خِيَمنَه گوم لأشرار
و كِلْنَه ياوسفه فزعنه بلوعه و امرار
و تدري ما إلْنَه مُحامي عگبك اليوم
------------------------
و السَلِب ليتك حضرته و عينك اتشوف
بين ازلام الضلاله نصرخ ابخوف
وين عباس الشهامه بغيره معروف
يا عجب ع الشاطي طايح و ليته ايگوم
-----------------------
بويه يا بويه إلطموني هالملاعين
و صارت الدمعه بعيوني تكتب احسين
وينك ابضيمي أجيلك طايح افوين
أرد أگِلَّك يا دلالي حالي ميشوم
-----------------------
شِفْتَك ابعالي سِمانه و أشْهَگ أنفاس
ع الرمح شفتك يَغالي مرتفع راس
و الجسد وينه أنادي بحيرة إحساس
و راسك ابعينه يجاوب و غارگ ادموم
------------------------
من خِيَمنَه جيت أدَوْرَك بالميادين
بين شفرات المَنايه و جرح لونين
آنه يا بويه سكينه و ناري نارين
چيف أطَبِبْها جراحَك و أشكي لهموم
------------------------
شفتك ابسوح البساله ويلي مذبوح
و الجسد بجراحه ذايب وسفه مطروح
امْهَشّمَه اعظامَك يبويه و تشعب الروح
لكل ألم نالك يروحي گلبي مالوم
--------------------------
صرت أقَبِّل بويه نحرك و أشكي بَلْواي
امدوهِنَه جيتك كئيبه و حزني وَيّاي
گلت أنا يمكن اشوفك بروح يَحْماي
و تنهض اويايَه لخدرنه و تمنع الگوم
------------------------
عمتي زينب يوالي بأصعب أحوال
تجمع النسوه المروعه لو بالأطفال
امحيره ما عِدْها والي لا ولا ارجال
و بن سعد آمر رجاله و قاسي لهجوم
------------------------
ع الهزل لو يحملونه و باچر انشيل
بويه طَلْبَه تعذرونه ما لنا حيل
نمشي نترككم ضحايه بلايا تغسيل
ولا دفن لاچن علينه هذا محتوم
------------------------
الشاعر : أبو شهيد الأحسائي
الأحد ١٤٤٠/٥/٣٠هـ
-----------------------
@Hossain1_2#الناشرالحسيني_حسين_جاسم_الطائي
