الشاعر حسين صادق العقابي

( قصيدة 14 نور ) متباركين بولادة الاقمار المحمدية

صلو على محمد

يا طه يا بو الزهرة
يا اصل نور العترة
بيك الله تمم امرة
والكون بسمك ردد / صلو على محمد

حيدر يحماي الجار
العالم بوصفك محتار
كرار لا مو فرار
بموقفك خيبر تشهد/ صلو على محمد

فاطمة يا ام حسين
يا شافعة بيوم الدين
يالشيعتچ مفطومين
من النار امر مأكد. / صلو على محمد

الحسن ثالث رحمة
بالكرم واضح اسمة
مشكورة هاي النعمة
ما تنحصي ولا تنعد. / صلو على محمد

يحسين يابو الاكبر
للشمس انت المصدر
يا ماي نهر الكوثر
حبيتك ومدري شكد. / صلو على محمد

السجاد في كل سجدة
للشيعة تنحل عگدة
اليگصدلة لا ميردة
للباري بي نتودد. / صلو على محمد

هيكل قداسة الباقر
يجبر بذكرة الخاطر
بگلوبنه يضل حاضر
باقر العلم الاوحد. / صلو على محمد

يبقى الامام الصادق
قرآن بالحق ناطق
يا جبل عالي وشاهق
نور البقيع الغرقد. / صلو على محمد

يدور الفلك وابراجه
بكاظمنه باب الحاجه
واللي مشة بمنهاجه
ما يجري دمعة اعلة الخد/صلو على محمد

يا شمس مدفونه بطوس
يالتنحني گباله الرووس
لكل المعارف قاموس
مشهدك شرف مشهد. / صلو على محمد

تبقى الجواد انواره
شمعة بدرب احراره
ترست الدنيا انصاره
وشعت انوار المرقد. / صلو على محمد

يا علي الهادي محلفك
تلزم ادينه بچفك
بحبك درينه وعطفك
نار الله تطفة وتخمد. / صلو على محمد

يا جود ماي الجنة
يالعسكري انته المنه
اطاك الله ما تتمنة
المهدي اللي بي نتوعد. / صلو على محمد

اسال الرايح والرد
جزتهه هالدنيا الحد
لبسهه بيدك چرغد
يالمهدي يا. سر. احمد. / صلو على محمد

الشاعر حسين صادق العقابي

مولد النبي ص

ياروحي روحي لحضرته وشمي هوه الجنه نذر انتي اله
محبوبي عايش بالكلب وادري جمال الله بشر ما اجمله

صلو على محمد النبي. صلو.

……

لاجمل بشر. وجه الكمر. هاي الولاده بفرحه نحييهه
كلب المحب. بسمه يدك. هالدنيا وجه النبي محليهه

رباني . واضح جماله كل خصاله وبصفاته والله رباني
خلاني. الهج بأسمه كل نهاري ويه ليلي اني خلاني

يسري بشراييني. هوه النبض بيه
فدوه اله فدوه. عمري وطواريه
عالامل عيشني. باحلام ورديه

رب الذين امنو. عالمصطفى صله. عظيم المنزله

محبوبي عايش بالكلب وادري جمال الله بشر ما اجمله

صلو على محمد النبي. صلو.

……..

ما اجمله. ما اكمله. يارحمة الله الساكن بروحي
نسمة هوه. ذكره دوه. لو كلت بسمه تنشف جروحي

من عيونه. اشراقه ضوت. بالمحنه. چنهه جنه تضوي بعيونه

خيعونه. طير الحباري. چنه كلبي. للمدينه. يروح خيعونه

من ايتامه يحسبني. امنيتي وحساسي
وبچفوفه اتمنه. يمسح على راسي
وبعطفه يشملني. اغلى واعز ناسي

من عنده بالدنيا مثل والد ابو الزهره. بشر نتقبله

محبوبي عايش بالكلب وادري جمال الله بشر ما اجمله

صلو على محمد النبي. صلو.

…….

الكل تنتظر. يوم الحشر. وامة محمد بيك مرحومه
من نرتجي. شافع تجي. هذا الشفيع الاعظم ويومه

خدامك. احنه الكضينه كل عمرنه. وافتخرنه. نصير خدامك

خدامك. وحسين يدري. ويعرفنه. من عشكنه. احنه خدامك

ياسيدي ارزقنه. هالليله لو نظره
وكلوبنه ترفرف. طير وعلى الحضره
شكراً اذا تقبل. ياوالد العتره

شمس الله ضوت بالسمه. بميلادك وانته تقود القافله.

محبوبي عايش بالكلب وادري جمال الله بشر ما اجمله

صلو على محمد النبي. صلو.

……….

نسألكم الدعاء
حسين صادق العقابي

مولد النبي ص

……..

سلامي. حبيبي . يامحمد
هيامي. غرامي. يامحمد
صوت جبرائيل غرد هالمسيه
الليله ميلاد الرساله العالميه
يامحمد
……..

مولد الحنين. الصادق الامين.. ياضوه السنين. ياحبيب الله وبدر شع بجماله
ياهو الشمال. ياعذب زلال. مظهر الجمال.بيك دين الله تمامه واكتماله

حبك يسري ويكبر. بالشريان الابهر. ومضوي السمه
يامفتاح الرحمه. بيك اتمام النعمه. يابو فاطمه
شمس الله الماشافك. وتمعن بوصافك. بعيونه العمه

لاح. بدرك ويضوي بسمانه
لاح. تارس الدنيا بحنانه

دعائي. رجائي. يامحمد
شفيعي. ضماني. يامحمد

ياجمالك ياحبيب الله ونبيه
الليله ميلاد الرساله العالميه
يامحمد.

…….

الرحمه والسلام. منقذ الانام. مبدد الظلام. يا امان الكره الارضيه بحياتك
السيد الرؤوف. النبي العطوف. موحد الصفوف. من صفات الله طبع تاخذ صفاتك

چفك خبز الفقره. تسير يمهم كمره. يانسمة هوه
لوما وجهك ضيه. تضيع الانسانيه. وظلمه بلا ضوه
شكراً يابو الزهره. الحصل منك نظره. بالحب ارتوه

شوك. ابعث بليلي ونهاري
شوك. وي جنح طير الحباري

حياتي. هويتك. يامحمد
اماني. نجاتي. يامحمد

نور وجهك تارس عيون البريه
الليله ميلاد الرساله العالميه

يامحمد

………

للكلب وداد. نعمه للعباد. رحمه بالمعاد. الله صلى اعليك واملاكه وعباده

هادم الذنوب. مالك القلوب. بعشكك اليذوب. حبه عذري ويبقه كل يوم بزياده

جاء الحق بچفوفك. يتوسل بحروفك. ياخير العمل
الدنيا انته مضويهه. من اولهه لتاليهه.
بس انت الامل
شكراً جد الساده. بحسين واولاده.
دين الله اكتمل

صار. حبك يصحي الضماير
صار. احلى نغمه اعله المنابر

نبينه. ولينه. يامحمد
قبولك. علينه. يامحمد
انته فرحتنه الچبيره الدائميه
الليله ميلاد الرساله العالميه

يامحمد.

……..

حسين صادق العقابي

فرحة الزهراء

هوسات

…….

اليوم الزهره تلبس المهدي. إلتاج وفرحانه هوايه
يشبه عمه ونفس رسومه. العباس البيمينه الرايه
هوه ملوحة كل العشره. وننطيه احنه اليوم حچايه

للموت ويا كم وفايه

…….

يمنصب من الله القائد. ياهيبتنه ويا كشختنه
يكلولك ارجع من تظهر. لا ما تحتاجك دولتنه
واحنه نكلك يبن الزهره. تفضل واهلا كل صيحتنه

جنود الله احنه وانته الايه

…….

شامه بخدك وجهك كمره. وعيونك جنه بصف جنه
يابعد الما شافن طولك. يايوم نشوفك نتمنه
شاغل كل عقول العالم. وچم چف امن دموعه اتحنه

سوالف عندي وياك هوايه

…….

كل متغرب رد لأهله. وما نعرف احنه بأحوالك
بديوانك ياشيخ العالم. يايوم نعزب بدلالك
لاتنسانه بداعة زينب. دوم تخلينه احنه ابالك

منك منتظرين حچايه

……

هوسه الدنيا وبيدك انته . تحلهه وانته اللي تصفيهه
رجع الوادم لله التاهت . عن دربك ماندري شبيهه
بدونك صرنه شجره بصحره. والحيره شلون بتاليهه

بچفك يمته ادك الثايه

…….

نسألكم الدعاء
حسين صادق العقابي

قصيدة لاستشهاد الامام العسكري ع


بداية غيبتك بيهه ابتدت رحلة غيابي
بأمان الله رحت وانه اكتبت قصه عذابي

اعله دهري شكد اعاتب.
انه الفاكد كواكب

………

ماظال كلشي من الدمع. ياوالدي وروحيتي
بينك وبين الطف كضت. من ضيمي كل عافيتي
بسامره ذبحولي حلم. وبكربله امنيتي
اعله كبوركم صحت بهضم . يادنيتي شخليتي

طواريك تهد خيل واحس بيهه بضلوعي
وماي دموعي خلص وبدمه تنزل دموعي.

انه الشابع مصايب. انه الفاكد كواكب

……..

ياهو الغريب بدنيته. مثلي ومثل احزاني
لا والد ولاعندي اخو. هيج الوكت خلاني
البكّاء من كثر البچي. والدنيا دار احزاني
من مثلي عماته انسبن. ومتغيرات الواني

انه العرفو اسم عمته وحبل خلو بديهه
انه ابن العايله الحركو خيم عزهن عليهه

صرت من ضيمي شايب. انه الفاكد كواكب

……..

يابيت اهلنه بلا ابو. ولاصوت للحنيه
هالليله ميتلي وطن. ودعت الانسانيه
خليتني بعمر الورد. بس الله يدري شبيه
نعشك احس هودج سبي. وروحي المشت مسبيه

كضو اهل الله والباقي انه وغربة زماني
مناره بديره مهجوره ومنو اليسمع اذاني

اعيش بلا حبايب. انه الفاكد كواكب
………

فوك الجتاف جنازتك. وكل خطوه عثره بدربي
مااحس حفرولك كبر. يحفرون احس بكلبي
جوه الترب صار الضوه. والهوه الچان بگربي
صحت ان وعد الله حق. يادمعه بالخد كتبي

انه وعمري ووجع روحي وعشرتي وذكرياتي
الثامن من ربيع اول. حضر موت امنياتي

شفت بيه العجايب. انه الفاكد كواكب

……..

الدنيا شكبرهه والبشر. يابويه ادري هوايه
هل من مناصر لو صحت. ياهو اليشيل الرايه
محد يجاوب صرختي. بس اسمع اني حچايه
لبيك يامهدي اعتله. صوت الخدم وفايه

صبراً ياخدم راجع واعيد الغاضريه
وعله الرايه اخط بدمعي. ياثار الزچيه

مع الوقت المناسب. انه الفاكد كواكب

………

نسألكم الدعاء
حسين صادق العقابي

كدامك كل يوم. مفتوح الگلب
تفضل يامولاي بيتك من تطب

عاشرتك اني من سنين.
ولا صاحب مثلك يحسين. دلاني الدرب
.....................

بسمك ابديهه.. روحي اخليهه.. نذر يم بابك.. يالمنطيني هواي
يانبض گلبي.. وبس الك حبي.. عايش بخيرك.. منك اخذ راي

يابشر مثلك وحتى ترابه ينحب
الكره الارضيه مدينه وانت كوكب
ونحرك اليحچي الصدك والدهر چذّب

دنيا بلا طاريك.. ماتحله الي
حبك ويه الروح.. اي يابو علي

انته أقرب ليه امن العين..
ولا صاحب مثلك يحسين. دلاني الدرب

.....................

يوسف الزهره. ملوحة العشره.
يابعد حيلي. يحله العمر وياك
انته ابو اليمه. لو ابو الرحمه
لو ابو جروحي. محتار بمعناك

كل جمال الدنيا ما خلاني لاهي
حسين بس انته اللي تلفت انتباهي
بوصلة حبي عليك واتجاهي

قبلة كلبي الصار. ذايب بالعشك
عشرة جرف وماي. لا مانفترك

مثلك مولاي الكه منين..
ولا صاحب مثلك يحسين. دلاني الدرب

....................

ياكهف روحي. واهس جروحي
شكراً لكلبك. يمسويني انسان
فدوه لعيونك. اني ممنونك
لولا حنيتك. ابقه بلا عنوان

كلشي بالدنيا ملل الا الخدامه
بدون عاشورك اصير من اليتامه
منبرك يبقه صديقي وللقيامه

كلبي يصير تراب. لوما مأتمك
يمضويه الافلاك. شذرة خاتمك

معاشر عدلين وميتين..
ولا صاحب مثلك يحسين. دلاني الدرب

........................

مني اخذ كلمه. وداعة الخدمه
صدري دكيته. وياك لحد الموت
خادمك اني. قنبر الثاني
ابقه اصيح اسمك. لو جثه بتابوت

من كلب ولسان والعباس احبك
طلب عندي ورايده من عرش كلبك
كون اظل لآخر انفاسي اعله دربك

بظلمة روحي تصير. اشراقة شمس
من كلب امي هواي. حنيتك احس
هواي معاشر واعرف زين..
ولا صاحب مثلك يحسين. دلاني الدرب

........................

كاتب بعيني. قل هو حسيني
اليشرك بحبه. مايعرف معناه

كلبي من شافك. احتار بوصافك
بالعشك ناده. شكد سبحان الله

حسين ياهيهات وتهز المسامع
يا اذان بكل منارات الجوامع
اخذ بيدي لعالمك لا ابقه ضايع

ماتتعوض دوم. خدمه من العمر
وتجدد كل عام. رايات النصر

كلمه ولا متصير اثنين.
ولا صاحب مثلك يحسين. دلاني الدرب

………

نسألكم الدعاء
حسين صادق العقابي

قصيدة لاستشهاد الرسول ص

البگه براسك بهاي الليله مهدينه
بحزن نرفع الك خالص تعازينه
...................

نعزيك بحزن ياخاتم العتره
عله المختار جدك بالگلب جمره
چم مقتل الك يبن الحسن نقره
شبع كلبك مصايب الله اليعينه
.....................

بس انته الوحيد الكسرته بروحه
التتلاشه فرحته وتكثر اجروحه
يمهدي امنياتك كلهه مذبوحه
وعمرك بالهموم اتخلص اسنينه

………..

من يوم اربعين حسين والدمعه
بعدنه بثوب الاسود والحزن ينعه
اجه مصاب الرسول وصوتنه تسمعه
ونظل وياك ماتخلص بواچينه
......................

غريب ومن غربتك گلبك اتفطر
ويوميه عزه لهلك تجي وتحضر
وهلليله اعله جدك ينحب المنبر
محمد غاب نوره وغمضت عينه
........................

الليله نواسي اجينه عيونك الحمره
ونواسي الزجيه الطاهره الزهره
محتاجتك ماي كلبونه الصحره
عله دروبك نريد اللي يدلينه
.....................

دلينه اعله دربك وين نتعنه
يمهدي هل وكت كل خير مامنه
هل دنيه بوجودك احله من جنه
يكل الخير يملوحة محاچينه
..................

خسارتنه الچبيره بفكد ابو القاسم
ويظل هذا العزاء بنظرتك دايم
الى ساعة ظهورك سيدي القائم
من ترفع الرايه وانته تحدينه

………

نسألكم الدعاء
حسين صادق العقابي

قصيدة لاستشهاد الرسول ص

صوت بعبره وآه
ماتَ رسول الله

منبره.. الوحشه هدت حيله
والوحي..ينزل اخر ليله

وامحمداه
........................

ماشفته صح بدنيتي. بس سامع اخباره
حب عن روايه والكلب. شافه وصبح داره
اهل العقول تحيرت. ماتعرف اسراره
منقذ الناس من الجهل. بقرآنه وافكاره

رحمه لكل الناس
منبع للاحساس

الموت اجه.. للسفر يوميله
والوحي.. ينزل اخر ليله

وامحمداه

.........................

بسيرة حياته ماشفت. بس الانسانيه
متعوب من الدنيا بس. تارسهه روحيه
هوه الامان من السمه. عالكره الارضيه
احرار صرنه برحمته. وعفنه العبوديه

من فكر المختار
نعيش نموت احرار

بمصحفه.. المحكم وتأويله
والوحي.. ينزل اخر ليله
وامحمداه

.......................

محد تأذه من الرسل. مثله وخلص عمره
كالو الابتر والله كال انطيتك الزهره
وانطاه حيدر والفقار بيمنته السمره
وتستاهل اكثر گله هاك حسين والعتره

سبحانه السواه
طاريه شمحلاه

يانبي. الكون صاح دخيله
والوحي.. ينزل اخر ليله
وامحمداه

.........................

هالليله حيدر چم گلب. ينراد لحزانه
ويشوف روح المصطفى. من المرض خلصانه
والزهره خاطرهه انكسر. وهوايه تعبانه
كلشي اختلف حتى الهوه. متغيره ألوانه

بس دمعه بلا صوت
دك الباب الموت

فاطمه.. امن اليتم تشكيله
والوحي.. ينزل اخر ليله
وامحمداه
.......................

قرآن مشيول بنعش. آيه بأثر أيه
وبفراگه صار المرتضى. يتمايل هوايه
دعوه يمهدينه تجي. وتحضر بالقرايه
خدام نبقه اعله العهد. منطينك حچايه

ياصوت الآذان
ياروح القرآن

نودّعه. بدمع دم نبچيله
والوحي. ينزل اخر ليله

……….

نسألكم الدعاء
حسين صادق العقابي

قصيدة للامام الرضا ع

السلام على السلطان الرؤوف
الذي هيج احزان الطفوف

ياعلي الرضا. ياعلي الرضا

……….

ياسلام الله على الحبل المتين
يا انيس ارواح خدام الحسين
بنفس ثوب الاسود من الاربعين
بالدمع لمصابك احنه معتنين

اقبلت ارواحنا نحو العزاء
وننادي ياغريب الغرباء

ياعلي الرضا. ياعلي الرضا

……..

انته تحقيق الحلم والامنيات
يل كضيت العمر آه ونايبات
بغربه انت ودم دموعك تجري دوم
عالذي عطشان مات اعله الفرات

ايها القلب الذي عاش المصاب
وقضى العمر بحزنٍ واكتئاب

ياعلي الرضا. ياعلي الرضا

……….

وصل لانفاسي عطر من حضرتك
وهيّج بكلبي عشك لزيارتك
اعقد النيه واجي اشتم هواك
راحه نفسيه من اشوفن كبتك

ايها المدفون في احضان طوس
يا اماناً للقلوب والنفوس

ياعلي الرضا. ياعلي الرضا.

…….

ماترد سائل واعرفك من اجيك
بحاجتي من اجي واوكف بين اديك
كبل ما احچي البكلبي تكلي هاك
ياسلام الله وملائكته عليك

انني والله فيكم مهتدي
ارتضيني خادما ياسيدي

ياعلي الرضا. ياعلي الرضا.

……..

خدمتي عندك امانه يالحبيب
يارجائي ولو صبح موتي قريب
الكبر غربه ولا عرف الكالي غاد
سيدي وحگ الغريب اعله الغريب

انني ذلك المسكين الفقير
راجياً مولاي تقرير المصير

ياعلي الرضا. ياعلي الرضا

…..

حسين صادق العقابي

قصيدة لرجوع الضعن. الاربعين


منهو يتلگاهه يحسين. اجت لگبوركم
والدمع ظل يحچي بالعين. تريد تزوركم

لسانهه يمك نطق
إن وعد الله حق

.....

لاحت ام عون اعله الدرب
بكسرة الخاطر والكلب
وحدهه تبچي ولايصح. چف يمسح دموع

شمت ترابه وبي عطر
من الناگه طاحت عالگبر
والوحشه ترس المكبره. ولاصوت مسموع

خويه صاحت جبت راسك كوه من فوك الرماح
وعالگبر آنه وينحرك. ياهو كبل الثاني طاح

ضعن الهواشم باقي نسوان. بدموعه ونوحه
وبس العليل ويانه تعبان. جبيره جروحه

لچن حكم الله سبق
إن وعد الله حق

......

متكوم من گبرك ردت
يحسين بيك توسلت
غافي عله صدرك طفل. خافنه ايطيح

انته بحصيره منجمع.
لو كمت يوكعلك ضلع
ويضيع خافن خنصرك. وجروحك تسيح

كلشي ضايع من اديه. وعمري هم لازم يضيع
بس عبايه ومن رقيه. وبيهه غطيت الرضيع

وصتني كالتلي الرمل حار. خطيه وليده
گليله ماتت بيهه اثار. وابوهه تريده

بالسبي عاشت قلق.
إن وعد الله حق

......

بالخير دومك تنذكر.
عباس خوه من العمر
جيتك واخبرك من طحت. مر بيه چم عوز

مخنوگ چفي بالحبل.
كوه اصعد ظهور الهزل
لو شفت اديه تنهظم. ترسوهن حزوز

شكد صحت خويه دخيلك. يابو فاضل بس تعال
انفلت عمامه حسين وطاحن خيام الدلال

شال الشمر راسك يعباس. يراوي سكينه
ونسد اذنه من حچي الناس. تره اتأذينه

وآنه اقره بالفلق
إن وعد الله حق

........

راح ارجع آنه لياوطن
ماظل اخو بهذا الضعن
لأم البنين شأعتذر. عن اربع خوان

والگه العليله بيا وضع
بالانتظار وبالدمع
منتظره عبد الله يرد. وتشوفه كبران

ضامه لعبد الله اخوهه. چم دللول وحنين
وعدهه ترچيه لختهه من ترد ويه الحسين

بس النفس من ارجع وياي. من ارد لبيتي
سبعطعش مني راحو هواي. اموت امنيتي

حلم ظل اعله الورق
إن وعد الله حق

.....

لا راحه لا موكب خدم
يحسين لا رفت علم
يوم اربعينك ما شفت. بس ذاري التراب

هالسنه يابن فاطمه
خدام الك متحزمه
داسو على الموت واجو. ياخويه الاحباب

الف شكراً يالنشامه. وحده ماظل الغريب
بشرو يالمشايه كاتب. كل اساميكم حبيب

كل خطوه چنهه صيام الف عام. اجرهم باچر
كربلا انترست والله خدام. هلا بكل زاير

صاح تطبير المشق
إن وعد الله حق

......

حسين صادق العقابي

ميمر

منك الك يامولاي. درب العشك ممشانه
..................

نمشيلك وكل كلب رافع رايه
ممشه الدمه بشريان وانته الغايه
ان الذين امنو المشايه

من كلب ولسان وياك. ونظراتك انته ويانه

..............

السبعه العجايب مو عجيبه الفكره
تبقه انته الاعجب والله يبن الزهره
مركز العالم صار وسط الحضره

ومن كربلاء الاحرار. صار الفلك دورانه
.................

بس الك معقوده تظل النيه
ياملك وزيارتك مليونيه
حزام احنه صرنه عالكره الارضيه
بكل اتجاه وكل صوب. مشايتك تلكانه
................

ياخامس اصحاب الكساء الازهر
كلشي ايتغير ونته ماتتغير
يوم اربعينك جنه يابو الاكبر

كل الرسل والاملاك تتعنه الك مولانه
................

متفضل انته وكل فضل ما عدنه
ومن خيرك احنه نخدم وعزبنه
نلوگ لخدمتك وانته التلوگ النه

والخادم انعرفه شلون ؟. اسمك بطرف لسانه
....................

بمدرسة حبك خادمك متعلم
قانون بيهه الخدمه للمتفهم
حِب واسكت وحِب واعمل وحِب واخدم

العارف بحقك مولاي. انته صرت قرآنه


حسين صادق العقابي

قصيدة لشهادة السيدة رقية ع


مشتاكه. شگد لعيونك. مشتاكه
اتلاكه. يمته بكلبك. اتلاكه

بس تعال طفله بانتظارك

….

اخر وداع اتذكره. بعينك صفنتي
كتلك تجي وانته كلت. بيد الله بنتي
حتى آنه اذكر طولِت. حيل بشبگتي
وانفاسك انته من العطش تچوي برگبتي

آه. كلبك ليش يدك كوه
آه. بابا ارجع كتلك فدوه

تخليني. الوادم غربه. تخليني
وديني. لعالم كلبك. وديني

وحشه صار. يابويه دارك

………

تذكر هديتك بويه الي. من لبستني
مني خذوهه بطيحتي وجرحولي اذني
بويه شعجب ياهو اليجي. يطكني اعله متني
ياسوط شمسويه صحت. مو تعبتني

ليش. تصد الناس لستر الله
ليش. منّ اوكع ماكو اسم الله

تعبانه. من هالدنيا. تعبانه
خلصانه. روحي من الهم. خلصانه

انت وين. شيطفي نارك

……

كلما يمر خيّال اشم. ويمرني عطرك
ثاري الحافر بي دمه. الداس اعله صدرك
جابولي ماي وردت اجي. يمك واحضرك
اليشرب الماي اعله الرمح. شيشربه نحرك

راح. راسك وي ممشه ضعونه
راح. وجسمك مسحوكه متونه

مسبيه. ازغر طفله. مسبيه
مابيه. حيل الفرگه مابيه

عمري ضاع. من يبس خضارك

……..

ماعنده چفين الرمح. بويه ارد احضنك
بس راسك وحضني بقن. شخلولي منك
شما ردت اتكرب الك. يبعدوني عنك
ابخت الحوافر دمعتي. هنه الخذنك

وين. يا چلمة بابا الماتت
وين. ذيج الحنيه الراحت

بعيوني. هواي سوالف. بعيوني
خلوني. سكته من ابچي. خلوني

كون اموت. بكيفك وقرارك

……..

طبينه للشام ونمت. من الاذيه
شفتك بطيف انته وصحت. بنيتي رقيه
من صحت اريدك لن طشت. مابين اديه
اخر نفس من شفتك. وجانت منيه

مات. كلبي المشتاك لعينك
مات. ورد عاش البيني وبينك

ياروحي ارتاحي الليله. ياروحي
وجروحي. وياك ارتاحن. وجروحي

ياضواي. لهفتي لنهارك

……..

حسين صادق العقابي

قصيدة للمشايه



يوم القيامه لافته. تقراهه كل عين
ياهلا ويا مية هلا. بزوار الحسين

صاحو ياجنه نطب ليهه
الا حسين الكاعد بيهه

…….

العمر حلاته بمساره. خدمه وزياره. لجمل مدينه
مدينه الغاضريه. اجمل هويه. ديرة ولينه
مشينه لا مو خرافه. دين وثقافه. دمعة بچينه
مشت الك ديره ديره. اكبر عشيره. لاوسع سفينه

چفوف احنه نفزع كل وكت. لو شفنه رايه
الخدام صاحو جنتك. بس هيه غايه

صاحو ياجنه نطب ليهه
الا حسين الكاعد بيهه

…….

نهر بشر معتنيلك. احنه بسبيلك. انته البدايه
رقم صعب من يحسبه. ياهو اليكتبه. مالك نهايه
يكعبة الحب نشوفك. الكل تطوفك. وانته رايه
الزمن يترجم كلامه. يوم القيامه. هالخدمه هايه

الحج الاكبر كربله. وتشوفه كل عين
يشبه هوه جنة عدن. بين الحضرتين

صاحو ياجنه نطب ليهه
الا حسين الكاعد بيهه

…….

شمس تضّوي بسمانه. چفك لكانه. حتى نخدمك
خدم اجينه اعله بابك. احنه بثوابك. الدنيا بسمك
نعزب بكلشي عدنه. حتى بولدنه. منوفي دمك
سفر عمر ماتعبنه. احنه اليمهنه. خلينه يمك

يحسين كلشي يهون الك. والتعب راحه.
للموت وياك وابد. ماكو استراحه

صاحو ياجنه نطب ليهه
الا حسين الكاعد بيهه

……….

مشينه ماكو استراحه. ماعدنه راحه.حد المنيه
رفعنه راية عشكنه. بيهه كتبنه. يابو رقيه
اجينه مثل النوارس. وشفنه عابس. بصافي نيه
حبيب اجه وكلبه ضامي. سجّل اسامي. وانطه الهويه

ونسمع هلا تنگل هلا. من الحضره واصل
كواكم الله اعله المشي. صاح ابو فاضل

صاحو ياجنه نطب ليهه
الا حسين الكاعد بيهه

……

زحف ملايين اجينه. يوم المشينه. كد الكواكب
يخدمه ماصح مثلهه. محد عقلهه. هاي المواكب
يسُفره كلش جبيره. متروسه غيره. بيهه العجايب
يخيمه وتلم شملنه. بيهه انجمعنه. كل الحبايب

كل الكره الارضيه اجت. للحضره تمشي
لولاك چا صرنه عدم. ويموت كلشي

صاحو ياجنه نطب ليهه
الا حسين الكاعد بيهه


………

حسين صادق العقابي

موشح للامام الحسن ع

اليوم دار الكرم طايح سورها
يالحسن مظلمه وغايب نورها
.....................

بدمعه لمصابك يهنياله الحضه
العين تعمه اعليك يبن المرتضى
الليله اخوك حسين بي ضاك الفضه
بالحزن هل دنيا لعبت دورها
....................

اليوم ابو فاضل جرالك دمعته
والله يدري شلون چانت حيرته
سحب من سيفه شبر من غضبته
وچان هدّم لال اميه قصورها
.......................

يانعش مثلك وبسهام انرمه
بغضاً بحيدر وامك فاطمه
اعليك ناحت سيدي ارض وسمه
الوادم العادتك ضايع شورها
....................

يامؤسس كربله بيوم الصلح
والصلح خله ال اميه تنفضح
هاي وادم بيها ماغزر ملح
طيبتك جازتها ليش بجورها
.....................

صاحب الراي وعظيم المنزله
يا امام حسين ابن عقد الوله
منك تعلمنه نمشي لكربله
من مشيت لكعبة الله تزورها
......................

يا چبير الساده ولهاشم فخر
عالعهد تلگانه كل سبعه بصفر
مأتمك يبقه لظهور المنتظر
الدمعه الك يالحسن من عاشورها

……..

نسألكم الدعاء
حسين صادق العقابي

قصيدة للامام الحسن ع

خليتني ابلايه اخو واصفك باليدين
والله عمر عشنا سوه ياكرة العين
ضهري انكسر من فركتك يحزام الحسين
..........................

يخويه امن اذكر العشره. وذيج ايامنه الحلوه
وكلبك ذاكه الحنين. التارس گلبي بالخوه
تعال وشوف يبن امي. عليك الكلب يتلوه
بأمان الله رحت وحسين. ضل ابدنيا ماتسوه

يالحسن لو ساعه غبت. لعيونك اشتاك
ضل يلجم ابنبض الگلب. ياخويه الفراك
مو وكته موتك يالاخو عني رحت وين
..........................

جنت ياخويه من اشتاك لبوي ولمي الزهره
اجي الديوانك اشبع شوف وتفتح كلبي هل نضره
وادعي الله بصلاتي هواي. من عمري عله عمره
يعينه الله البلايه اخوان يحير بروحه وبامره

يالماخذ اوياك الفرح. عايفلي الاحزان
وخليت گلبي لشوفتك. كل ساعه لهفان
وديار اهلنه من رحت. تارسهه الونين
........................

گلبي هوايه شاف اجروح. و اصعب جرح بسنينه
اخوك ابحضنك امن ايموت. وبجفوفك تسد عينه
امناغه الخوه انته اويا. انكطع مابينك وبينه
يبعد العافيه الراحت. وضلت بس بواجينه

بجبدك يخويه السم مضه.وياريته بحشاي
واحتار اشبكك يالاخو. لو نگِط الماي
يالحسن وبهايه متت. ياخويه مرتين
.........................

اخوي الفاتح الديوان. وابد ماينطبك بابه
باب الحاجه للمحتاج. وتبوس الوادم اعتابه
من جدي النبي حرموه. وجم سهم النعش صابه
ولاكن من دره العباس.. سيفه اغتاض بكرابه

كل العجايب والمحن. راوتني الايام
يا نعش ميت عالمتن. يرمونه بسهام
عباس صبرك والصبر. وكت الحزن زين
..........................

آخر ساعة يبن امي. وعيني تفارك اعيونك
صرت اتمايل اويه الريح. من كامو يدفنونك
گلبي اندفن خويه اوياك. وكلمة خويه وشلونك
يمن دين الله والفقره. هليله يخسرونك

باجر اصيح بعازتك. مابين السيوف
واتلفت ومحد الي. وحاير بالطفوف
وتفزع عليي خيل وزلم. ياخويه صوبين

……….

نسألكم الدعاء
حسين صادق العقابي

قصيدة للسبي


ضموني جوه جروحكم خاف. خويه
امشي سبيه وطولي ينشاف. خويه

لا مو بديه . امشي سبيه

....

والله ماظل حيل بيه. الهوه لو يدفعني اطيح
بلا اخو بين الشماته. خويه بعد المن اصيح
هنا رماد هنا جثثكم. وين اكعد واستريح
واسمعت جوه الحوافر. صوت من نحر الذبيح

راح اليكول الچلمه بحساس. زينب
مو حلوه بس بلسان عباس. زينب

بضيم العليه. امشي سبيه

.....

بالچثث كل خطوه اعثر. وعالوجه لن طايحه
چم صلاة الوحشة اصلي. وكل اخوتي مذبحه
كمت ما لحّك يهلنه. اقره آنه الفاتحه
نوّمت آنه رقيه . ولبو فاضل رايحه

شفته وصحتله راسك الحار. وينه
جسمك مغطه سهام وحجار. وينه

بهاي المنيه. امشي سبيه.

........

رايده احچي وياك وانته. بس نحر شابع نبل
يابو فاضل ضمني يمك. حضرو خويه الهزل
كبال راسك همه صاحو. لخته حضرنه الحبل
إلذبح والرمح عدهم. منه مايسلم طفل

تعبانه يابعد اختك هواي. تدري
مشكوله ذمت العطش والماي. تدري

وبلا خويّه. امشي سبيه.

......

حسين تدري شلون اجاني. من طحت يم النهر
بأيد يتوچه اعله سيفه. وخله ايد اعله الظهر
كتله ها يابعد اخيتك. صاحلي مات الكمر
مو ظهر مكسور منه. كل الحسين انكسر

صابغ لحيته الشيب الحسين. ينحب
من كتله ننطي وجوهنه وين. ينحب

عيني جريه. امشي سبيه

.......

الفجر طر وآنه اشوفن. صعد كل راس برمح
اظل المن يابو فاضل. امشي كل خطوه بجرح
عالرماح انظر اخوتي وين ابو الوجه السمح
وهاي قافلة السبايا. انتصارات الذبح

الوجهه اليسومر ابيض يصير. كلبه
الله يذكره حسين بالخير. كلبه

. امشي سبيه

.........

نسألكم الدعاء
حسين صادق العقابي