وأما بنعمة ربك فحدث
دي عربيتي الجديدة .. وأولادي كلهم في مدارس international .. وساكن في مدينتي ! وبقولك الكلام ده دلوقتي مش علشان أتنطط عليك أنا راجل عارف ربنا كويس لكن ربنا بيحب النعمة تظهر على عبده وقال في سورة الضحى "وَأَمَّا بِنِعْمَةِ رَبِّكَ فَحَدِّثْ"
ينزل صورة لشقته الجديدة أو صورة للجنينة والأولاد بتجري أو صورة مفاتيح العربيات وتلاقي أول جملة في البوست "وَأَمَّا بِنِعْمَةِ رَبِّكَ فَحَدِّثْ" .. اللهم قوي إيمانك !
بالله عليك يا أخي تعبت نفسك مرة ودورت على تفسير الآية اللي انت بتستدل بيها دي وقاعد ترددها في كل مكان ؟! خدت المعنى الظاهري للآية وعايش حياتك تطبق فيه من غير ما تفهمه ودخلت كل المعاني في بعضها وثقة في النفس ما شاء الله عليك وانت بتبرر اللي بتعمله على إنه كلام ربنا !
فاكر إن النعمة المقصودة في الآية هي ممتلكاتك وإن التحدث بيها إنك تذكرهالنا ليل نهار وتصدعنا بيها فتجرح قلب فلان مفتقد للنعمة اللي عندك .. وتكون سبب في سخط حد على حياته بسببك .. وتجيب لنفسك العين والحسد بعمايلك ! طب اسمع الله يهديك
عدد كبير من العلماء فسروا "بنعمة ربك" إنه المقصود بيها هو الإسلام .. وبالتالي فالآية فيها أمر للرسول عليه الصلاة والسلام ولينا بالتحدث عن الدين وتذكير الناس بأهم نعمة وهي عبادة الله
مجموعة تانية من العلماء فسروها إنها مرتبطة بسياق الآيات اللي قبلها "فَأَمَّا الْيَتِيمَ فَلَا تَقْهَرْ (9) وَأَمَّا السَّائِلَ فَلَا تَنْهَرْ (10) وَأَمَّا بِنِعْمَةِ رَبِّكَ فَحَدِّثْ" .. وبالتالي المقصود منها يا محمد بعد ما تعمل أول أمرين حدث بهم الناس وحثهم على الاقتداء بيك
مجموعة تالتة من العلماء فسروها إن المقصود هي النعم المرتبطة بالآخرة .. وبالتالي الآية بتحثنا على إننا في أي قعدة نفكر بعض بنعمة الأخلاق .. نعمة غض البصر .. نعمة العفة .. نعمة الصدقة .. نعمة مجالس العلم (النعم الحقيقية الدائمة اللي هتنفعنا في آخرتنا مع تجنب الرياء طبعاً)
مجموعة رابعة من العلماء فسروها إن المقصود بيها كمان هو النعم الدنيوية ولكن ! فسروا كلمة (فحدث) إن التحدث عن النعمة يكون بشكر ربنا عليها والثناء على الله وبذلها في سبيل الله ومساعدة الناس بيها .. فأنا ربنا أكرمني ومعايا فلوس يبقى التحدث بيها إن أقول الحمد لله مستورة (لا أقول أنا معايا كام ولا رصيدي في البنك كذا ولا ممتلكاتي فين) وأطلع زكاة مالي وأطلع صدقات منها وأساعد المحتاج وأقولهم إن ده من فضل وكرم ربنا عليا (بدون تفاخر أو إعجاب)
إذن كل تفاسير الآية تتنافي تماماً مع اللي انت فاهمه وقاعد تطبق فيه !
فرجاءاً تراجع مفاهيمك ومعتقداتك من جديد وتتقي غيظ القلوب وبدل ثقتك العالية في إنك راجل عارف ربنا تخاف على نفسك من "لا يدخل الجنة من كان في قلبه مثقال (ذرة) من كبر"
#رحلة_تدبر
#أحمد_سمير
