س / عـلاش تكتـب ؟
⁃ نـُورا نصـر : اختـرت نكتب باش لسـاني يبدا في ايدي ، نكـتب بـاش نقدر نعيـش بالطريقـة الي حلمت بيها .
⁃ سـارة خالد :فالحـقيقة أنا منكتبش بس ، أنا نعيط ، نبكي ، نعترض ، نتذمر ، نحطم ف عظام الحروف ، ونتهاطل مابين الفواصل والنقط ، أنا نمارس في حياة كاملة من خلال الكـتابة .
⁃ مروة عبد الحميد/ ، اِمرأة من زئبق : نكتب لإنه عندي رسالة نبي نوصلها، عندي قضايا نباها توصل للناس.
⁃ زرقاء / حلم يغمرني : لما مانعرفش نفهم شعوري، لما نسلم الأمر لـ قلبي، نعالج فـ روحي بالكتابة، نحاول نعيش شعور الناس إللي مش قادرين يكتبو، ندمج ف كل شيء سيء برحمة ربي عشان ماحدش يكون حزين، نحاول نكون بلسم بـ حروفي البسيطة !
⁃ حنينـي : كُـنت لما ننخنق نبـكي بس ، تـوا لما ننخـنق نبـكي وأنـي نكتـب وهكـي أحسن بهلبا .
⁃ تسنيم / أكتب لـ أبي : نكتب لـِ بابا لانه بابا متوفي لانه فـِ غيابه مَحدش رحمنا لانه فـِ غيابه الناس تستقوى بدت عليا نكتب لانه نبي نبين لناس إنَ غياب الأب كسرة،هدا علاش نكتب .
⁃ نِضـال : نكتب لأن مانقدرش نحكي .
⁃ سالـي محمد : نكتب اهني على خاطر نحس اني نقدر نحكي بيلي خاطري نقوله بدون حواجز ،انا مانكتبش باش يقرا شخص معين نكتب باش نشوف روحي بعد وقت كيف كنت وكيف اصبحت.
⁃ نسـرينة : نكتب في كلام حُـب فمي الخجول ما يقدرش يقوله ، ونكتب في وقت الحزن باش الحروف ماتخنقنيش .
⁃ نيـهان : نشوف فِ روحي في الكتابة،نلقى في نفسي الضايعة عن طريق الحروف، وفِ داخلي هلبا شخصيات تبي من يحكي احاسيسها.
⁃ مروة أبو زيد : علاش نكتب ممكن الشي الوحيد اللي ينفس عليا الكتابه وللامانه نوصل في هلبا حاجات في خاطري بحروف معينه .
⁃ اسراء مـراد : نكتب عشان نطلع من العالم اللي اني فيه ، كانت الحروف ملجئي الوحيد .
⁃ سليـمة بشينة : نكتب لان نلقا في روحي وحيدة ،ماعنديش حد نحكيله همومي وضيقتي، نكتب بسبب تزاحم الأفكار والكلمات بداخلي ، نكتب لان الكتابة تضئ العتمة اللي أني فيها، نكتب لانه نحس براحه في الكتابة، نكتب باش نخفف الدوشة والصراعات اللي في قلبي ، نكتب لان الكتابة ملاذ الروح ،نكتب لان الكتابة تنهي في أحزاني وتريح في قلبي .
⁃ هنـاء الهـادي/ شحائح شـعور : لأني نحب نكتب بالفطره ، لأنّ عندِي مصدر إلهام قويّ يخلي من الشئ العادي مُبهرج ، سمعي و حسّي مرهف ، لأني اني لسان كل من غرقت روحه الدنيا و خرساته عن الكلام.
⁃ سـارة المالكـي : عَ خـاطـر هـدف نـبـي نحققـه،عَ خـاطـر ندعـم كل بنـت عنـدها موهبـه الكتابـه،عَ خـاطـر نزرع أمـل و الحُب في قلوبكم،وعَ خـاطـر عـيون نـورا نـصر يـلي تـقـرا .
⁃ بيـان : الحروف العربية احتوتني، ساندتني، لملمت تشتتي، فهمتني وسمحتلي نعبّر عن كل ما في داخلي، أني نكتب بيش نشفى .
⁃ إسراء البدرانِي : نكتب لاني لقيت في روحي الموهبة و لقوا فيا الناس اني نعبر بدالهم و وصفت اللي ما قدروش يكتبوه و من صُغري نحب نعبر يعني موهبتي كبرت معاي .
⁃ الحـراري : مهربـي من الدنيا .
خـتام : قررنـا نكتبوا رواحنا علـى خاطركم انتم ، كـل شعور يطلع منكم يستقر فينـا ، وبكـل حروف نكتبوه نحكوا فيكم ، مـش حنبطلوا نكتبوا ، ومتبطلوش تقرولنا .
