Коронавирус таҳдиди: Хитойдаги ўзбеклар Ўзбекистонга қайтарилиши керакми?
Айни дамда Хитойда бошланган янги бало — коронавирус балоси бутун дунёни ташвишга солгани бор гап.
Ҳозирда Хитойда кўплаб ўзбеклар бор. Ухан вилоятида, касаллик ўчоғи бўлмиш ҳудудда ҳам ўзбек талабалари, илм кишилари, ўзбек фуқаролари етарлича. Улар Ўзбекистонга қайтарилиши керак, аммо маълумотларга кўра, Хитой ҳукумати ҳеч бир фуқаронинг Ухандан чиқиб кетишига йўл қўймаётган эмиш. Ўзбекистон ТИВ бу борадаги сўровга рад жавоби олганини маълум қилган.
Шу ўринда бошқа бир масалага эътибор қилайлик: орамизда Хитойдаги ўзбеклар Ўзбекистонга қайтмаслиги керак, улар касалликни юқтиради каби фикрлайдиганлар ҳам бор, ҳатто бундайлар мансабдорлар орасида ҳам учрамоқда. Лекин бир нарсани билиб қўйинг: инсон тақдири ўртага қўйилганда фақат ақл эмас, юрак ҳам, ҳиссиёт ҳам, таъбир жоиз бўлса виждон ҳам ишга тушади.
Хитойдаги, Ухандаги 72 та ўзбек (биздаги маълумотларга қараганда, сони шунча) — Ўзбекистон фарзанди. Ота ҳеч қачон иккита фарзандини деб учинчи фарзандини оловга ташлаб қўймайди. Униям қутқаришга ҳаракат қилади. Ҳукумат ҳам фуқаролар учун ота-она ўрнида, демакки, Ухандаги ўзбекларни ҳам Ўзбекистонга қайтариш керак. Текширувдан ўтказишсин, алоҳида назоратга олишсин, керак бўлса, даволанишга жалб қилишсин, тинимсиз текширишсин, майли, аммо Хитойда қолдиришмасин. Ўз фуқаросини ҳимоя қила олмаган ҳукуматнинг нима кераги бор?
Ҳозирда ТИВ бу борада жон куйдираётганини инкор қилмоқчи эмасмиз, асло. Шунингдек, Ўзбекистондаги фуқароларнинг саломатлигини ҳам ўйлашяпти, тўғри. Аммо Хитойдаги ўзбекларни ўз ҳолига ташлаб қўйиш учун бу сабаб бўла олмайди. Улар кимнингдир акаси, укаси, фарзанди. Бу ерда ким қанча ота-она кўз ёш тўкиб ўтирибди ўғлим эсон-омон қайтиб келсин деб. Ҳар нима бўлганда ҳам Хитойдаги ўзбеклар Ўзбекистонга қайтарилиши керак.
Айтганча, сўнгги маълумотларга кўра, АҚШ фуқароларини Ухандан олиб чиқибди. Демак, имкони бор.
Каналга уланиш
https://t.me/nizomjonislomov