Ostonov Minbari

Vatanni rock bilan sev!

Oldlar biladi. Bolaligimizda maktabda Vatan tuyg‘usi degan fan bo‘lardi. Bu fan bizga qay darajada zarur yoki kerak emasligi haqida gapirmoqchi emasman. Baribir bizning g‘o‘rlik davrimiz o‘tib bo‘lgan. Qolaversa hozirgi maktab darsliklaridan u fan chiqarilib tashlangan yoki bir nechta fanni birlashtirib, negizida qanaqadir fanlar yaratilgan.

Men aytmoqchi bo‘lganim andak fantaziya va illuziyaga boy gap bo‘lishi mumkin. Hullas, o‘sha Vatan tuyg‘usi fanimizda vatanni sevishga qaratilgan biror mavzu o‘rniga 2012-yilda Ali Ismoilov boshchiligidagi ‘‘Mawaraunnahr‘‘ guruhi folk-rock janrida yaratgan musiqiy asarini qo‘yib berishganida, balki biz vatanni ko‘proq sevarmidik. O‘sha ruhda katta bo‘lsak, boshqacha bo‘larmidi biroz dunyomiz. Aksiga olib o‘zim ham maktabni o‘sha yili bitirganman. Qulpinay marketdan vaqt mashinasi buyurtma qilib sotib olishgayam limitim tugab qolgan.

Yana bir gap, nom. ‘‘Mawaraunnahr‘‘ yo falak!!! Guruh nomiyoq insonni o‘ziga ohanrabodek chorlab, tortib oladi(Taqriban, agar u odamda did yaxshi bo‘lsa). Yo‘q, bu kuchli fanatizm emas. Qanday bo‘lsa shunday, boricha aytyapman holos. Ijodkorlar guruh nomi hal qiluvchi ahamiyatga ega ekanligiga to‘g‘ri tashxis qo‘ya olishgan. Axir sen guruh tuzib qo‘shiq kuylasang seni eng avvalo kim eshitadi. Shu yon atrofingdagilar albatta. Nom shuning uchun ham yaxshi tanlanishi zarur va zarur. ‘‘Movaraunnahr‘‘ so‘zi arab tilidan daryoning narigi tarafi degan ma‘noni anglatishini barchamiz yaxshi bilamiz. Ali aka birgina shu trek bilan ham ‘‘daryoning narigi tarafi‘‘da turib biz yoshlarga nimadir demoqchi. Daryodan kechuv vaqti allaqachon yetib kelgan.

Nima demoqchiman. Agar juda bir vatanni, millatni, xalqni sevging kelib turgan bo‘lsa(ko‘p-ku bizda bundaylar), buni rock bilan ham amalga oshirishning iloji bor.

@Noyabr_simfoniyasi