Ozodbek Nazarbekov

Ayni paytda Tojikistondamiz…

Xabaringiz bor, ayni paytda Tojikiston Respublikasida "O‘zbekiston madaniyati kunlari" bo‘lib o‘tayapti.

Shu munosabat bilan bir guruh madaniyat va san’at namoyandalari, jumladan, O‘zbekiston va Tojikiston xalq artisti Farrux Zokirov, O‘zbekiston xalq artisti Abduhoshim Ismoilovlar hamrohligida qardosh Tojikistonning Dushanbe shahriga yetib keldik.

Aytish kerakki, O‘zbekiston Qahramoni, xalq artisti Munojat Yo‘lchiyeva, O‘zbekiston xalq artistlari Yulduz Usmonova, Og‘abek Sobirov, O‘zbekistonda xizmat ko‘rsatgan artistlar Gulbahor Erqulova, Ilyos Arabov, Ma’suma Boltaboyeva, Oygul Nodirova va boshqa san’atkorlar ham Do‘stlik konsertida O‘zbekiston nomidan qatnashadi.

O‘zbekiston va Tojikiston ikki mustaqil davlat sifatida turli chegara hududiga ega bo‘lishiga qaramay, azaldan ularni bog‘lab turuvchi umumiy jihatlar bisyor. Davlatimiz rahbari ta'kidlaganidek: “O‘zbek va tojik xalqi bir daraxtning ikki shohi, bir daryoning ikki irmog‘iga qiyosdir. Bizning dinimiz, yerimiz va suvimiz bir. Bir maqsad yo‘lida birlashgan holda, quvonchu shodligimizda ham, qayg‘uyimizda ham doimo birgamiz. Ajdodlar an'anasiga sodiq qolgan holda, xalqlarimiz o‘rtasida do‘stlik, yaxshi qo‘shnichilik va o‘zaro hamkorlik aloqalarini yanada mustahkamlamog‘imiz darkor."

Bu kabi madaniyat kunlari esa kki davlat o‘rtasidagi madaniy hamkorlik yangi bosqichga ko‘tarilayotgan bir pallada o‘zaro madaniyatlar almashinuvi va targ‘ibotiga xizmat qiladi.

Darvoqe, “O‘zbekiston madaniyati kunlari” doirasida “O‘zbekiston va Tojikiston ijodkor va ilmiy ziyolilari anjumani” – o‘zbek va tojik san’at ustalari ishtirokida do‘stlik konserti, “O‘zbek kinosi kunlari”, O‘zbekiston teatrlarining Tojikistonga gastrollari, O‘zbek Milliy maqom san’ati markazi Yunus Rajabiy nomidagi “Maqom” ansambli konserti tashkil etilishi rejalashtirilgan.