ها يمة ماكافي هجر وشلن كل دمعاتي
ها يمة اليتامة هودو وانة انچوي بحسراتي
ها يمة ها ها يمة ها
***
خاطر الغربة منكسر ونتي ولا هزچ ريح
گليلي شنهي الغيرچ قنعيني النجمة اطيح
لوليتلچ گد العمر وچان الدمع كله يصيح
ها يمة يوليني الدمع وگمت اغرك بحسباتي
ها يمة ها ها يمة ها
*
ماعلميتچ عل بعد رضعتچ الحب والطيب
تجازيني چاليش بهجر والهجر يمة تعذيب
يرجف دليلي بروحتچ نابت بدلالي الشيب
ها يمة شحچيلچ بعد توجع صفت چلماتي
ها يمة ها ها يمة ها
*
وردة اواشمنچ چنت ورويچ من ادموعي
شگد ما ادنگلچ انة محنية احس اظلوعي
متغيره بفراگچ تره وختلف شكلي ونوعي
ها يمة يرضيچ الجره تخنك صفت اهاتي
ها يمة ها ها يمة ها
*
يايمة گلبچ مايحن عاد انتي اذكري العشرة
الغصن لو يكبر يظل ميعوف لحضه الشجرة
وشلن بعيوني دمع ودموعي صارت حسرة
ها يمة بسمچ صيحت وكثرن علي شوغاتي
ها يمة ها ها يمة ها
*
بلبيت ادور كون اثر لوذكره من عندچ تصح
بلسم اسويهه الي بلكت تهودلي الجرح
كل ساعة بغيابچ تمر بيهه احسن انذبح
ها يمة حيرني الوكت وتصفن علي صفناتي
ها يمة ها ها يمة ها
*
حشمت ليلي والدمع ارتاح اريدن ليله
يعگوب چني فارگت يوسف اخذ كل حيله
يمة البعد يوجع گلب والدمع ينهد سيله
ها يمة گوليهه الي وخل تنسعد شماتي
ها يمة ها ها يمة ها
*
ابو حيدر الصبيحاوي

ملا يوسف العبودي
https://t.me/sewDtXQAw_s4RqA
،،،،