'
KUZ ketmoqda...
Yana bir fasl,
Yigʻa boshlar koʻch-koʻronini.
Allaqachon QISH yoʻlga chiqqan,
Tugib oppoq dasturxonini.
Xazonlarin toʻkib ulgurmay,
Yaltoqlanar noshud kelin - KUZ.
Qoʻli belda, hech narsa demay,
QISH oʻqrayib turadi hanuz.
-Uyni boʻshat! -
doʻq urgancha QISH,
Uzar sariq darpardalarni.
Va keltirgan oq toʻrlar bilan,
Bezatadi derazalarni.
Ketar chogʻi soʻng bor moʻltirab,
KUZ koʻziga qalqib chiqar yosh.
Koʻngli boʻlmay bulut ortiga,
Oʻtib olib, yigʻlaydi QUYOSH!
Sovuq hukmin oʻtkazar butkul,
Yoʻlkalarni supurar shamol.
Bilmay gʻuncha tukkan atirgul,
Ochilmayin soʻlar, ehtimol.
Endi uch oy gulxan yonida,
Bizga ertak aytar izgʻirin.
KUZ norizo ketgan bu uydan,
QISH ham bir kun ketishi tayin...
@yangi_yulduzcha
